هــربــت مـن المــدرســه كــام مــرة !!!

**نور القمر** · 13-11-2008 10:16 PM

المشاركة الأصلية كتبت بواسطة Bossy_Fadl

:k48::k48::k48::k48::k48::k48::k48:

ازاي يا نور هانم يعني؟

نوقف حد علي باب الموضوع ميدخلش الا فوق ال21 ؟ :k48:

و الله يا نور انتي عسل

بما اتك يا بوسي هانم يا اختشي اكتر واحدة معارضة لموضوع التزويغ اذن مفيش أأمن منك نوقفه على باب الموضوع
ياريت كمان متدخليش كل دكاترة المنتدى لانهم مكنوش بيزوغوا

بس على فكرة معلومة زغنونه كدة على الماشي لو عايزين نحدد قسم لفئة عمرية معينه .. للبنات بس .. لمجموعه معينه وهكذا ... ليها طريقه طبعا
بجد انتي اللي زي العسل

**نور القمر** · 13-11-2008 10:19 PM

المشاركة الأصلية كتبت بواسطة the_terrible

انا مش عايز احكى انا كنت بعمل ايه ايام ثانوى دى لحسن لو حد قلدنى تبقي مصيبـــــــــــــة

لا احكي متقلقش بوسي واقفه على الباب مش هتدخل الطلبة
وسرك في بير غوييييط يجي شبرين ونص

**Nour_Peugeot** · 14-11-2008 12:46 AM

لمفروض السوال يكون رحت المدرسه كام مره و مهربتش كام مره اسئلوني انا

انا بروح الساعة 9 اخرج 9:30 من الباب و لو رخم السور عالي بس جمبيه شجره فبتحول قرد و انط و اروح

انا بروح بقي انام شويه و اصحي اعد علي الكمبيوتر و اعد اذاكر شوية و انام عشان ابدا اليوم الجميل ده

انا رحت في 2 ثانوي المدرسه بظبط شهر و نص و في 3 ثانوي حتي الان يومين فقط

**youssefmustang** · 22-11-2008 06:26 AM

والله انا كنت بهرب عشان الحق اطلع الكمبيوتر من الكراتين بتاعته والعب عليه حبه (كنت مدمن كمبيوتر) قبل ايويا ما يجى من المدرسة (مدرس رياضيات) لحد ما جه فى مرة واكتشف انى بشغل الكمبيوتر من وراه (انا كنت فى ثانوية عامة) وهو مالهوش فى الكمبيوتر طبعا المدرسة فيها مدرسين كمبيوتر راح اشتكى للمدرس بتاع الكمبيوترالمدرس بقى الله يسامحه مطرح ما راح علم ابويا يفك الكيسة وعلمه يشيل الرامات !!!!
المهم انا كان عندى رامتين واحدة محروقة والتانية اللى فى الجهاز افجأ بعد تلات ايام بردو هربت من المدرسة ان الكمبيوتر بيصفر الصفارة اللى ترعب دى لما ما يكونش فى رامات او فى حاجة غلط فى الهارد وير .. اجيبو يمين اجيبو شمال مش راضى يشتغل بفك الكيسة لاقيت الرام المحروق هو اللى موجود واللى كان شغال مش موجود انا اتجننت وشكيت ان فى حد من صاحبى هو اللى اخدها منى . المهم شيلت الكمبيوتر وانا كتنكد على الاخر .. ابويا جه فا شافنى وانا مخنوق ما بتكلمش واذا بالحوار الاتى :

1-مالك ياض انت اتخانقت انهارده ولا ايه
2-لا لا مفيش حاجة
3- يبقى الكمبيوتر فيه حاجة
4- لا مافيش حاجة
5-طب هو انهارده مش الخميس
6- اه
7- طب خش طلع الكمبيوتر واقعد عليه شوية
8-المهم عملت نفسى ان انا فرحان وقولتلو "طيب"
9- يالهوى الكمبيوتر مش شغال
10-ليه
11-الرامات اتحرقت
12-تانى الرامات تانى اوعى كده اشوفه انا
13- استغربت جدا جدا " انت ما بتعرفش تفتحه هتعرف تصلحه"
14- يا ابن الـــ.... الحق عليا انى انا بشوفهولك
15- طب خلاص خلاص شوفه
16- المهم دخلنا شوفناه قالى اطلع بره الاوضة ..
17- نعم
18-اطلع ياض بره
19- رحت طالع وقعد 10 دقايق
20- راح نده عليا وقالى "شغل"
21- بشغل واذا بالمفاجأة الكمبيوتر اشتغل طبعا الاندهانش والاستغراب غلب فرحتى لما الكمبيوتر اشتغل ..
ما حططش فى بالى وقعد العب واقضيها
المهم وانا بشيل الكمبيوتر قولت لما اشوف هو عمل ايه فى الرامات بص لاقيت الرامات اللى كانت محروقة مش موجودة والسليمة هى اللى موجودة قولت اه يبقى انت يا نمس اللى عملت كده ...
عرفت بقى ان ابويا كان هو اللى بيشيل الرامات ويخبيها وانا كنت ادور عليها واجيبها تانى لحد ما اتخنق منى وقالى طلع الكمبيوتر على طوووول ..

**MoDyBeNz2008** · 22-11-2008 09:00 AM

يااستاذة نور مافيش اصلا مدارس دلوقتى علشان يكون فية تزويغ
المدرسة بتنتهى مع نهاية المرحلة الابتدائية دى الى فيها حضور
بعد كدة الكل بيعتمد على الدروس بشكل كامل ومحدش بيدخل المدرسة اصلا
والمدرس عايز المدرسة فاضية علشان يزوغ ويظبط مواعيد الدروس بتاعتة

مين اللي قال ان من بعد ابتدائي دروس انا كنت لغاية اولى ثانوي من غير دروس و جبت 97% كنت بذاكر ايام الامتحانات بس غير كدة كنت منفض لكن مع بداية 2 ثانوي بدأـ مشكلة الدروس

بالنسبة للتزويغ جربته قبل كدة و محبتوش يمكن علشان مجتهد شوية بس انا في 3 ثانوي مرحتش غير اسبوعين و الباقي مذاكرة و دروس و كمبيوتر و نوم

**MoDyBeNz2008** · 22-11-2008 09:13 AM

نسيت اقول اني كنت بزوغ من المجاميع في اعدادي زي مجموعة الرياضة و العلوم و العربي و الدراسات و كنت بحضر انجليزي و رسم و فرنساوي (كنت لغات علشان كدة باخد فرنساوي)

**Ahmed REDA** · 22-11-2008 09:42 AM

مرة واحدة بس للامانة زو غت بس هي مكنتش تزويغة بالمعني المفهومهي كانت حاجة كدة زي هروب جماعي
الكلام دة كان في تانية ثانوي و كان لسة فيلم تايتانيك نازل و مكسر الدنيا
مش عارف اية بقي اللي خلاني انا و اصحابي نتفق ان يوم الصبح ننزل عادي بلبس المدرسة بس منروحش
و نروح الفيلم في هيلتون رمسيس(طب منروح باليل يعني اشمعني الصبح!!!)
بس القيلم كان حلو قوي طبعا و روحنا عادي بعد كدة في معاد المدرسة :wacko:

**elassar2010** · 22-11-2008 12:19 PM

المشاركة الأصلية كتبت بواسطة MoDyBeNz2008

مين اللي قال ان من بعد ابتدائي دروس انا كنت لغاية اولى ثانوي من غير دروس و جبت 97% كنت بذاكر ايام الامتحانات بس غير كدة كنت منفض لكن مع بداية 2 ثانوي بدأـ مشكلة الدروس

بالنسبة للتزويغ جربته قبل كدة و محبتوش يمكن علشان مجتهد شوية بس انا في 3 ثانوي مرحتش غير اسبوعين و الباقي مذاكرة و دروس و كمبيوتر و نوم

انا بتكلم على الاغلبية الساحقة كلة دروس من اعدادى وخصوصا مدارس الحكومة

**kimo-nubira** · 22-11-2008 12:30 PM

المشاركة الأصلية كتبت بواسطة adwyy

أنت كنت في الأرومان النموذجية

انا كمان كنت فى الاورمان النموذجيه واصلا معرفش يعني ايه هروب لاني مكنتش

بدخل المدرسه اصلا يعني مش محتاج اهرب كنت طالب فاشل بمعني الكلمه :D:D وده كان نظام يومي

1-اروح اشتري سجاير فرط كانت المالبورو بربع جنيه عند عم عبده

2-اروح طالع على حوده بتاع الشاى اشربه بقي مع السيجاره

3- اروح طالع على قصر البلياردو اللي كان فى ميدان المساحه واقعد العب لحد ما ازهق اوي يجي ميعاد المرواح

4- ممكن لما نكون زهاقنين انا واصحابي من لعب البلياردو كنا بنروح جنينه الحيوانات وندي للراجل بتاع بيت الكلاب جنيه وندخل

البيت من جوه نتفرج على الكلاب وساعات كنا بنروح نلعب فيديو جيم لان مكانش فيه ساعتها بلايستيشن

وعلى فكره اانا عامل في الثانويه العامه 5 مرات اعاده قيد على مدار ال 3 سنين 4 منهم علشان الغياب

والخامسه علشان هديت جزء من صور المدرسه علشان نخرج انا واصحابي :D:D

ومن الطرائف اللي عملتها فى ايام اننا كنت انا واصحابي في الفصل كنا نبظبط بعض

في الغياب يعني لو انا مش موجود يظبتني ومايكتبنيش في ورقه الغياب والمعامله

بالمثل وكنا بنكتب اى اسامي تيجي على دماغنا وبتعدي زي السكينه فى الحلاوه

ومش عارف ازاي لحد دلوقتي كانت بتعدي المهم جيت في يوم كنت بظبط انا ورقه

الغياب ومن كتر الناس اللي كانت بظبتها فى اليوم ده مكنتش لاقي اسامي اكتبها فى

الورقه رحت كاتب اسم المدرس اللي كان واقف علينا فى الفصل على اساس انه طالب وكمان غايب :k48:

والمهم انه مضي و ماخدش باله منها واللي اخد باله مدير الدور وكانت ليله زي الفل الصراحه :k48:

بس بجد كانت احلى ايام فى حياتي ومش هاتتعوض تاني ابدا

اسف على الاطاله بس انتو فكرتوني ب ايام جميله

**أشرف العدوي** · 22-11-2008 12:32 PM

اروح اشتري سجاير فرط كانت المالبورو بربع جنيه عند عم عبده

2-اروح طالع على حوده بتاع الشاى اشربه بقي مع السيجاره

لوكنت في الفترة من 1994حتى 1996 يبقى اكيد نعرف بعض
انا كنت بعمل كدة فعلاً
حتى كوباية الشاي كانت بلاستيك صح ؟

مشاهدة نتائج الإستطلاع: كــنــت بــتـهرب مـن المـدرسة ؟

الموضوع: هــربــت مـن المــدرســه كــام مــرة !!!

LinkBack

أدوات الموضوع

عرض

-

-

-

-

-

-

المواضيع المتشابهه

كــام واحــد بيفكــر يشترى بروتون ... وجاد فيهــا وحابب يعمل Test Drive ؟؟؟

الكلمات الدلالية لهذا الموضوع

المفضلات

المفضلات

ضوابط المشاركة