للأسف... 90% على الأقل من مصانع السيارات في مصر هدفها أساسا فتح بوابة للدخول في السوق المصري فقط.. يعني محدش بيدور على زيادة وتحسين الإنتاج.. ولا خطط مستقبلية .. ولا تصدير طبعا.
بدليل إن موديلات كتير توقف إنتاجها في الخارج وخطوط إنتاجها اتنقلت لمصر لإنها ما بقتش تنفع في مصانعها الأصلية..
تقدر تقول لي ليه اللانوس بتتعمل في مصر لحد دلوقتي؟؟ ولا الفيرنا.. ولا اللادا 2017.. ولا الأفيو ؟؟؟؟
العربيات الصيني المجمعة في مصر ليها استثناء له علاقة بصناعة السيارات في الصين... ومع ذلك .. العربيات الصيني المجمعة في مصر مش بتتصدر بردو لأي سوق مجاور على الأقل زي السعودية مثلا .. اللي شوارعها مليانة عربيات جيلي إمجراند EC7 و EC8!!!
الحكاية عايزة رؤية للمستقبل بإنشاء صناعة وطنية حقيقية... والكلام ده لا يمكن يحصل إلا إذا كان عندك صناعة وطنية فعلا.. مش ماركات عالمية جاية تجمع عندك
بص للهند.. وشوف "تاتا" اللي بقى عندها سيارات بتتصدر في أغلب دول العالم "النامي".. وبدأ يبقى ليها اسمها اللي بقى بيتقال في أغلب مجلات السيارات في العالم.. وكمان بقى عندها أرباح ورأس مال يخليها تشتري ماركات عريقة زي "جاجوار" و"لاندروفر" حاليا.
الكلام ده محصلش من فراغ.. لازم يبقى فيه صناعة وطنية ليها رؤية وبتشتغل بجد علشان تحققها.
بس معلش .. اسمحلي.. بصراحة مش مصدق إن مصر تصدر عربيات للصين!!!
إزاي تصدر عربيات للصين والصين بتصنع كل ماركات العالم تقريبا دلوقتي؟؟ وده لو كان حصل.. فأغلب الظن إنه "لوط lot" واحد وخلاص..
عموما.. أنا أعرف إن مصنع مرسيدس في مصر كان أساسا مصدر أساسي للعفشة الأمامية في بعض طرازات مرسيدس على مستوى العالم.. وتحديدا كقطع غيار ما بعد البيع.. وهو ده اللي هيفضل شغال بعد توقف تجميع السيارات.
الكلام ده من ناس أعرفهم شغالة جوه المصنع.. وأعرف ناس كمان من المصنع اللي بيورد لهم خامات المعادن.
...
المفضلات