ارجو الاجابه بسرعه لوسمحتم

**dser** · 25-06-2015 04:42 AM

السلام عليكم ورحمة الله وبركاته

انا اشتريت عربية موديل 2011 واللى باعها لي كان شاري العربية من واحد تبع مرور اسكندرية

المهم هو باع العربية لى وعمل توكيل ليا للبيع للنفس وللغير الكلام ده كان من سنه وانا كسلت ومروحتش سجلت العربية بإسمي

دلوقتى العربية رخصتها انتهت بقالها شهر وانا ساكن في فيصل

هل لازم اروح اسكندرية اجدد رخصة العربية ؟

انا عاوز الرخصه تكون بإسمي لان الرخصه المنتهيه بإسم الراجل اللى باع العربية للراجل اللى انا اشتريتها منه

وكمان بخصوص تسجيل العربية فى الشهر العقاري ( التوكيل كان من سنه هل التوكيل كده مدته انتهت ولا التوكيل اقدر فى اي وقت ابيع لنفسي العربية )

ما هي الاجرائات اللى اعملها بخصوص تجديد الرخصه للعربية وكمان موضوع التوكيل اللى فى الشهر العقاري

وشكرا لكم واعتذر عن الاطاله

**Mo Dayem** · 25-06-2015 12:53 PM

اعتقد لازم تجيب شهاده مخالفات وكمان لان الرخصه انتهت ف لازم تجيب شهاده بيانات.
وتعمل عقد مسجل فى الشهر العقارى. (لازم يكون معاك اصول التوكيلات و بطاقتك و صور منهم كلهم) مصاريف العقد بتكون على حسب عربيتك.
*ملحوظه شهاده الخالفات والبيانات صالحين معاك لمده 15 يوم والعقد المسجل صالح لمده شهر من تاريخه.يبقى طالما عملتهم لازم تنجز.
تروح على مرورك ومعاك المخالفات والبيانات والعقد المسجل وبطاقتك وتشترى ملف جديد وحافظه وبعدين تفحص وبعدين تروح المرور القديم تتطابق بصمه وتجيب ورقه استعلام امنى.
وترجع لمرورك الجديد لنفس الموظف اللى عملك الفحص يختملك وبعدين تدفع ضريبتك وتأمينك وتفك نمرك وترخص وتاخد نمر جديده.

**dser** · 27-06-2015 03:21 AM

اؤلا شكرا لردك

ثانيا اعتذر لكثرة اسئلتى بس لي استفسار بسيط

رخصة العربية المنتهيه اللى تابعه لوحدة مرور ابيس ادارة مرور اسكندرية وانا ساكن فى فيصل

هل ممكن اطلع شهادة البيانات من المرور اللى فى فيصل وذلك عن طريق الكمبيوتر ؟

ولا لازم اروح اسكندرية اطلع شهادة مخالفات وشهادة بيانات من هناك ؟

وكمان فى ملحوظه ( انا من ساعة ما اشتريت العربية راكنها فى الجراج لاني معنديش رخصة قيادة ) يبقى ازاي امشي بيها فى الشارع عادي وانا معييش رخصة قيادة وكمان رخصة العربية منتهيه علشان يتم فحصها ؟

وارجوك لا تنزعج من كثرة اسئلتى فى سؤال اخير

كم المبلغ المطلوب لتكملة كل هذه الاجرائات ( العربية اسبرنزا a516 ) موديل 2011

يعني ادفع كام لتسجيل العقد فى الشهر العقارى والتأمين و تطليع الرخصه وتكلفة الاوراق اللى هشتريها الاجمالي فى حدود كام علشان اعمل حسابي ؟

وهل لازم اعمل صيانه للعربية واشترى مثلث عاكس و طفاية حريق و شنطة اسعاف ؟

وهل اعمل رخصة القيادة الاؤل وبعدين اكمل اجرائات ترخيص العربية بإسمي ولا اعمل ايه

انا اسف انا جديد جدا جدا جدا فى عالم السيارات ومعلوماتي فيها = صفر