الموضوع: سلسلة فضايح و سلبيات توكيل بيجو مصر

فضيحه رقم 4 :


بعد ما شوفنا التوكيل بيسلمنا عربيات فيها شبكه ثابته على كلبسات ضغط فى الاكصدام الامامى فقط و يقولنا دى المواصفات الفنيه المصريه
و بعد ما راسلنا بيجو فرنسا يقولوا لينا روحوا ل CDCM علشان يفحصوا العربيه - و انا اروح ليه لما ممكن يفحص اى عربيه واقفه فى المعرض ما كل ال بيجو 301 كده - وفى الاخر توكيلنا الفاشل CDCM بيثبت الشبكه بكوليه ..
مواصفات فنيه تفكوا من عربياتنا قطعه تسبب ضرر !!؟؟
هههه ازاى يعنى بنستورد عربيات شبكتها بتقع !!
المواصفات المصريه بتقول نستورد تربيذه واقفه على رجل واحده مثلا !!
و طبعا فى صوره من رساله بيجو فرنسا
.
.

نشوف بقا حاجه سلبيه جديده و معروفه جدا فى توكيل بيجو
الوقت .. نعم ؟ الوقت .. فى توكيل بيجو يعنى ايه وقت ؟؟

ان ربنا يكرمك و تشترى عربيه زيرو و عايز تحافظ عليها فبتروح التوكيل تعمل صيانه هناك على امل انهم يحافظوا على العربيه و يهتموا بيها علشان تستمتع باول كيلو متر فى عربيتك الزيرو.

تتصل تحجز صيانه 10 الاف فى غمره يتسجل عربيتك اول عربيه يا فندم فى اليوم الساعه 9 الصبح.
توصل 8 و نص تلاقي عربيتين واقفين قبلك على البوابه .. عادى انا حاجز و مش فارقه لما ادخل حيستلموا منى العربيه اول واحد..

تدخل تسلم عربيتك الساعه 9 و تلت هههه رابع واحد يستقبلك مهندس الاستقبال ( مع العلم فى ورقه متعلقه فيها رقم عربيتك انها اول حجز )

لو سمحت عايز اعمل صيانه ال 10 الاف
العربيه تدخل جوه فى مكان الورشه و انت مش شايفها .. تخيل لسه تصميم توكيل بيجو فى 2015 انك تسلم عربيتك يتعمل فيها صيانه و من غير ما تشوف هم بيعملوا فيها ايه و شغالين فيها و لا لاء اصلا و كمان فرد امن ممنوع دخول الورشه يا بيه !!!

الساعه توصل لحد 1 تقريبا .. لا بقا فى ايه يا جماعه كل ده تغيير زيت و فلتر زيت و تنضيف حوض موتور و تربيط عفشه !!
ده يخلصوا فى 20 دقيقه بالكتير.

الساعه 2 و نص تمام كده العربيه خلصت اتفضل ادفع و استلم ... استلم ايه ؟؟؟ ايه التراب و بقعه ايد الفنى اللى على الكرسي بتاعى ده ؟؟ هو انا جاى ورشه ؟ ولا توكيل !!! تتنرفز تزعق تتشقلب عادى جداااا يكملوا عليك استفزاز..

اه حاضر حنضفها حالا يا فندم .. طيب بما انها تاخير فى تاخير ممكن تشوفلى مشكله صوت الهوا اللى بسمعه فى الباب ..
حاضر يا فندم حنشوفها .. دخلوا العربيه تانى .. خرجت الساعه 4 مغسوله بمايه و الفوطه ملحوسه على الازاز و طبعا مفيش حاجه اتعملت غير كده
ادفع الفاتوره و تمشي الساعه 4 و نص مع موظفين التوكيل كانك موظف معاهم فى توكيل غمره و مبروك عليك صيانه ال 10 الاف

و بعد كده عرفت من باقي ملاك بيجو 301 ان ده اسلوب حياه فى توكيل بيجو CDCM فرع غمره الفرع الرئيسي لتوكيل بيجو الفاشل انك تعمل صيانه 10 الاف فى 7 ساعات

و الغريب انك تعمل نفس الصيانه لعربيات تاني فى توكيلها فى ساعه او 2 لو اتاخرو

و الى اللقاء فى الفضيحه 5

تحياتى
Muhammed Ahmed


#مطلوب_تغيير_توكيل_بيجو_مصر

#Peugeot_change_CDCM_Egypt


صور اثبات و دليل


مراسلات بيجو فرنسا على الفيس



مالك بيجو 301 عمل صيانه فى 6 ساعات يا بختلك لاقيت حاجتك بعد الصيانه.



مالك بيجو 301 اخر امام CDCM غمره

فضيحه رقم 5

بإختصار انك تروح التوكيل CDCM - القاهره للتنميه و صناعه السيارات - و تضيع يومك فى عمل الصيانه شىء مش مقبول و انك تشوف مكان مش منظم من العاملين فيه شىء سخيف

لكن لما تدخل و مهندس الاستقبال قبل ما ياخد منك مفتاح العربيه علشان يدخلها الورشه يفك الميداليه و يديها ليك مع الجمله المشهوره - لو فى متعلقات شخصيه فى العربيه .. نضاره او فلاشه او غيره يا ريت تشيلها معاك.

عادى ممكن نسمع ده كإجراء احتياطى

لكن انى افضى العربيه من كل حاجه و اسيب كميه (بونبوني) فى درج مسند عربيتي و العربيه تدخل الورشه تخرج فيها بقايا البونبونى ده .. هار اسود هى بتوصل لكده !! يعنى عربيتي بتتفتش جوه فى الورشه انا طالب اعمل صيانه مش تفتيش على درج المسند .. تفتح درج المسند و درج التابلو ليــــــــــــــه فى العربيه الا لو انت ناوى تسرق ؟؟


تم تقديم شكوى من ضمن شكاوى كتييييير و كانت النتيجه بعد ما الموضوع وصل للاداره .. الفنى الشرير اللى سرقنى خد كلمتين فى جنابه جااامد لكن لسه مكمل شغل فى المكان علشان ربنا يكرمه و يسرق المره الجايه حاجه اغلى و يمكن يسرق حاجه من العربيه او يغير قطعه من عربيتي و يديها لعربيه واحد تانى كانت فيها مشكله و البس انا مثلا ..
ما هو فى حرامى فى ورشه توكيل بيجو و الاداره أكدت ده و كمان مترفدش يبقي حيكمل سرقه و ان شاء الله ربنا يوفقه فى سرقه كبيره المره الجايه

لما اتكلمت عن الموضوع ده مع باقي ملاك بيجو 301 على الفيس و مباشره .. طلع ان فى ناس اتسرق منها فلوس و فلوس فضه و قلم دوكو و شويه حاجات صغيره كده اتكسفوا يشتكوا من سرقتها بعد استلام العربيه ما انت بتكون مقضي 7 ساعات فى الصيانه و ما صدقت خرجت من عندهم

لدرجه ان فى الصوره الجايه احد الملاك بيقول كنت سايب حاجات منها فلوس فضه كتير فى العربيه و لا اتلمست .. لان ده كان متعارف عليه فى التوكيل .. يظهر الحرامى كان اجازه اليوم ده

الخلاصه :
خد بالك من عربيتك و اجزاءها و متعلقاتك الشخصيه و انت بتسلم عربيتك لورشه بيجو CDCM لان في حرامى فى الورشه...

و الى اللقاء فى الفضيحه 6

تحياتى
Muhammed Ahmed


#مطلوب_تغيير_توكيل_بيجو_مصر

#Peugeot_change_CDCM_Egypt




صور اثبات و دليل


بعد عدد من سرقات المتعلقات الشخصيه من العربيات فى توكيل بيجو ( حد الملاك بيقول كنت سايب حاجات منها فلوس فضه كتير فى العربيه و لا اتلمست )

صوره الباقي من البونبوني :

هنفضل وراهم مع بغض لحد لما يتعدلوا أو يقفلوا التوكيل خالص ... و هنسيحلهم فى كل حتة ( الكل يشير الموضوع )

فضيحه رقم 6


العربيات البيجو فيها وحده تحكم ECU مسئوله عن حاجات كتير فى العربيه
منها تسارع العربيه و استهلاك البنزين و نقلات و توقيت نقلات الفتيس على وضع D و غيره من الوظايف الكتير

و علشان كده العربيه ليها سوفت وير بيشغل كل حاجه فيها و اللى يشتغل فى الجزء ده من العربيه لازم يكون فاهم كويس لان ده مخ العربيه بس لما التوكيل يكون مش فاهم !!!

رحت غمره الفرع الرئيسي للتوكيل الفاشل .. طلبت يبصوا ليا على تيل الفرامل بيصفر و قالوا يتغير مع ان كان فاضل فيه شويه كويسين بس انا قلت ماشي علشان ابقي مطمن على الطريق .. و غيرت التيل .. خلاص يا بشمهندس العربيه خلصت ؟ لا لسه السوفت وير ... طيب

نزلوا تحديث لسوفت وير العربيه .. و المهندس العبقرى اللى عمله خلى العربيه مفيش فيها اى تسارع .. تدوس على بدال البنزين لحد الربع علشان العربيه تفكر تطلع و تطلع براحتها جداااا .. اول يوم مخدتش بالي كان سواقه جوه البلد و زحمه .. بعد كده على الدايرى العربيه بتزحف .. نقلت على Ds ال sport mode علشان احاول اجرى شويه كان اداء اقل من ال D العادى
من 3 اسابيع لشهر مشغول فى شغلي و مش عارف اروح ليهم تانى .. لحد يوم طالع كوبرى اكتوبر و بطلع من عربيه مسكت الشمال و بقرص بنزين و فى المرايا ورايا اتوبيس عمال يقرب منى و انا لسه ماشي 50 او 60 .. ان العربيه تتحرك مفييييش غير لما عملت كك داون علشان ادى الاتوبيس فرصه و هو كمان كان بيهدى و عدت على خير

و طبعا مكانش عندى استعداد استحمل العربيه بالشكل ده و اضيع وقت و اروح غمره تانى .. فرحت مركز معتمد عملوا ليا السوفت وير فقط لاغير ولا تغير فلتر و لا تنضيف بوجيهات و لا اى حاجه اتعملت فى العربيه و انا قاعد فيها غير سوفت وير بكمبيوتر الاعطال و مروح بالعربيه بلمس بدال البنزين العربيه بتجرى بجد و تسارع هايل و استهلاك بنزين طبيعي جدا و ده مش حصل معايا انا لوحدى لاء مع كل ملاك بيجو 301 و اى حد عربيته فيها حاجه مش مظبوطه يا ريت يراجع سوفت وير العربيه عند حد بيفهم لان العربيه دى فيها امكانيات هايله و قوه موتور ممتازه بس محتاجه مهندس بيفهم يظبطها .

انا حكيت ليكم الموقف ده علشان تعرفوا ان فى مهندسين فاشله فى توكيل بيجو الفاشل فرع غمره و للاسف مش فاهمين فى شغلهم حاجه .. مش كفايه الوقت اللى بنضيعه فى الصيانات لا كمان و النتيجه تحت الصفر و نتيجه ممكن تتسبب فى كارثه لانه مش مقدر شغله بيترتب عليه ايه ..

الخلاصه :
خد بالك من عربيتك البيجو متعملش سوفت وير فى توكيل بيجو فرع غمره علشان ده مش امان و العربيات فيها ارواح ناس ممكن تتأذى بسبب مهندس مش فاهم او فاشل او معندوش ضمير شغال فى المكان ده

و الى اللقاء فى الفضيحه 7

تحياتى
Muhammed Ahmed


#مطلوب_تغيير_توكيل_بيجو_مصر

#Peugeot_change_CDCM_Egypt

نتمنى زيارة مركزنا (احمد عمارة)مصر القديمة) لتلقى افضل دعم و خدمة