مشــكلة تأخيــر دوران فى بيــجو 205 موديــل 1984

**madkoos** · 16-11-2008 11:12 AM

انا عربيتى موديل 84
وغيرتلها مشت الكترونى واسبراتير

وعملت الكربيراتير

بس فى مشكلة الصبح فى الدوارة

بتغيب الصبح فى الدواره
وبتقوم وتبطل
لحد ما شويه وتتظبط

مش عارف حلها اية؟؟؟ وعلى فكرة البوجيهات والبطارية جديدة

تانى حاجة ينفع اركب الاكسدام الاودمانى بتاع ال جى تى اى؟؟؟

**madkoos** · 16-11-2008 11:12 AM

وممكن حد يقولى ميكانيكى كويس

يكون فاهم فى الموديل دة علشان الاغلبية مش عارفين وبيفتو

**Nour_Peugeot** · 16-11-2008 01:53 PM

حضرتك ساكن فين ؟

و ينفع تركبي اي حاجه ي تي اي علي العربيه ممكن يكون المارش فيه مشكله كمان شوف كهربائي كويس يبصلك عليه

**madkoos** · 16-11-2008 05:54 PM

انا ساكن فى الجيزة فى شارع المحطة

والمارش جايبو جديد ....اصلى يعتبر غيرت العربية كلها

**madkoos** · 16-11-2008 05:55 PM

شكرا يا نور على الرد

**Nour_Peugeot** · 16-11-2008 07:01 PM

تحت امرك يا باشا انا عموما هكلملك هاني هو اكتر واحد يعرف الورش الكويسه و الوحشه و هقولك ان شاء الله انا بامانه بعشق ال 205 دي

**bee** · 16-11-2008 09:21 PM

مبروك اولا ع العربية

موضوع الدوارة ده بيبقى متعب للاسف وبتغير شوووووية حاجات لحد ما توصله وده في أي عربية ..

شوف يا باشا

بما انك غيرت شوية من الحاجت دي اتأكد من فلتر البنزين انه كويس او غيره على طول هو بخمسة جنيه اصلا ..

وبالمناسبة اوعي تتعود على كده ..
ودايما لما العربية متبقاش راضية تدور خد بالك واتاكد انه لا قدر الله مش سير الكاتينه :k41:

نصيحتي ليك اتاكد من الفلتر بتاع البنزين ودورة البنزين عموما شوف الرداخ شغال كويس ولأ ؟؟

وليا سؤال كمان انت قصدك مش بيقوم المارش الا بصعوبة ولا بتعتل وهي بدور ؟؟ ولا صوتها عادي طبيعي يعني لكن مش بتدور؟؟؟ ولما تبدور بتفصل مرة واحده وانت ماشي ؟؟ وبعدين تدور تاني عادي ؟؟
والنسبة لقطع الغيار يا ريت لو تشرف في بورسعيد وانا اجبلك الي انت عايزه باذن الله
مستني ردك

**ahmedfouad** · 17-11-2008 01:43 AM

يا باشا بالنسبة لموضوع الدوارة ده انا عانيت منه حوالى شهرين لما جبت العربية جديدة

لحد ما فتحت المانيوال بتاع العربية بالصدفة وكان فيه فصل اسمه دريفنج قراته لقيت انى علشان ادور العربية الصبح او بعد توقف الموتور لمدة 6 ساعات لازم اشد الشفاط على الاخر واضغط دواسة الوقود ضغطة كاملة متكررة وبعدين ارفع رجلى من على الدواسه تماماً واضغط على دواسة الدبرياج ضغطة مستمرة لحد ما العربية تدور وبعدين اسيب الدبرياج واسخن

وفعلاً عملت كدة والعربية دارت من اول سنة مارش والحمد لله

علشان متروحش لميكانيى جاهل ويخربلك حاجة

وابقا طمنا ياباشا

وعلى فكرة انا معايا رينو بنت عمة البيجو

وسلام

**madkoos** · 17-11-2008 11:53 AM

شكرا ليك يا احمد انت و بى على الرد

بس صوت العربية بيكون طبيعى وانا شاكك فى موضوع الرداخ دة

بس الفكرة لما بتدور بتبطل لحد لما تقوم مظبوطة واول لما تسخن ولا كأن فى اى حاجة وفى المشى تمام مفيش حاجة

انا حتى جبت اسلاك البوجيهات الفرنساوى بتاعتها ولسة هركبها

واجرب ...ويا ريت حد يقولى فكرة الشفاط دة اية علشان انا عندى الميكانيكى تقريبا فصلو

وهغير فلتر البنزين واشوف

وبعدين يا شباب العربية وهى على السلنسييه تحس ان فيها قطعة صغيرة

مبتتعدلش الا فى حاله ظبط الاسبراتير الالكترونى ....والسير جايبو جديد بتاع الكاتينة