تقرير واحد موسوس عن الشارك بعد 3000 كم

**hossam102000** · 06-07-2015 12:06 AM

العربية بصفة عامة كويسة مقارنة بسعرها لكن في بعض الملاحظات اللي ممكن تعصبك وتنرفزك خاصة إن كنت شخص حنتوف في حاجتك

1-الشنطة ضيقة فعلا ضيقة بمعنى الكلمة وهتقرفك خاصة لو كنت زيي حاطت فيها الغطاء أو عندك عربية طفل فيها بإستمرار

2-ناشفة في المطبات خاصة من ورا ناشفة جدا وبتتهبد على المطبات رغم إن الكاوتش عندي على 32 فبضطر أهدي جدا في المطبات لكن لو مطب ناشف بردو بتتهبد

3-كمالبات العربية: أنا معايا الفئة التانية وكيل ودي مستفزة جدا يعني كان علشان أجيب الفئة اللي فيها إنذار كان لازم يبقى فيها سبويلر ولا شاشة ولو عايزها بسينسور لازم يكون معاها أي هبل تاني يعني بيلحملك حاجة أساسية بحجات تافهة وفرعية ويزود في السعر 10 و20 أو حاجة قرب كده دي إسمها وسا.....(سوري)

4-صيانة الألف عدت الحمد لله على خير في التوكيل ومرعوب طبعا من صيانة ال10 ألاف لإنه توكيل دايموند مشهور عنه إنه سيء جدا جدا جدا جدا....جدا ويمكن وقتها أطنش الضمان وأروح أعملها بره قدام عنيا

5-السنتر مابيقفلي أوتوماتيك بعد ما بتعدي سرعة 20 كيلو زي عربيات تانية إلا لو إنت هتقفله بإيديك

6- أكيد طبعا سمعت عن صوت الموتور إبن الو.....(سوري) والكاوتش إبن الو....(بردو) ودي حاجة قولت هتعود عليها لكن بعد سواقة وقت طويل او سفر دماغك بتصدع

7-الصاج ضعييييف جدا جدا خصوصا السقف حتة ورق مرة كلب طلع دقيقة واحدة طبقه من عند إريال السقف ومهما خبط على السقف من جوا مفيش فايدة عربية زيرو وسقفها معروج (عيب عليكي يا ميتسوبيشي الله يرحم زمان)

8-معرفش ليه ؟ مع أني جايب الفئة التانية لكن حتى الكنبة مفيهاش مسند في النص والرفارف مفهياش صدادة طين

9-آخر حاجة مخوفاني طبعا هو سعر قطع الغيار فواحد كان بيقول مراية الجنب في التوكيل ب 3500 جنيه ومش موجودة معرفش الكلام ده صح ولا غلط بس حاجة وس.....(سوري) إنك تبقى راكب ولا راكن عربية وخايف حد يلمسها لا يلبسك في مبلغ وقدره

10- سيبك من كل ده أكتر حاجة مضيقاني من العربية دي دلوقتي وهتخليني أفكر أتخلص منها لو ملقيتلهاش تفسير وحل هتلاقي في موضوع لسة كاتبه من شوية عن بوية العربية
http://www.nilemotors.net/Nile/471119-2015.html (مشكلة غربية في دهان لانسر شارك 2015 وكيل)

لكن لو إنت مش موسوس زي حلاتي هتلاقي العربية كلها مميزات هي بصفة عامة حلوة لكن واضح إن الحاجة اللي بتنزل مصر بيعتبروا إنهم منزلينها لبلد و...... وحسبي الله ونعم الوكيل

نصيحة أخيرة لو حد بيشتري ياريت يجيب هونداي أو أي حاجة تانية أو بومة مستعملة نضيفة لو لقيت

ملحوظة علشان أكيد المسوقين وبتوع التوكيل ومالعارض هيطلعوا يطبلوا ويغروشوا دلوقتي ويقولي ركبت إيه قبل كده

أول عربية جبتها في حياتي وأنا في أولى جامعة كانت المتألقة دائما فاتنة القاهرة فيات 128 هههه
ثاني عربية فيات 131 كانت أحلى عربية بصراحة حديدة على الأرض
ثالث عربية فيات 132 كانت مدرعة بمعنى الكلمة
رابع عربية شاهين
خامس عربية هيونداي أكسنت لما كان ليها شنة ورنة
سادس عربية لانسر بومة زيرو
سابع عربية أوبترا
ثامن عربية هيونداي سوناتا (بالخليج)
تاسع عربية تويوتا كامري(بالخليج)
عاشر عربية(بومة للمرة التانية)
حاليا لانسر شارك وبفكر أغيرها للأسباب السابقة خصوصا السبب إنها عندها جزام في الإكصدام والبوية بتقع من عليه لوحدها

**mif** · 06-07-2015 01:31 AM

العيب مش في ميتسوبيشي
العيب في مستورد عديم الضمير

و لو عايز تشوف العربية الوحيدة في مصر تقيل اليابان اتفرج على مازدا 3 (وكيل )

انت مش موسوس ولا حاجة .... انت بس بتحب لانسر بس الاخيرة طلعت بعيدة عن توقعاتك للاسف

**hossam102000** · 06-07-2015 01:37 AM

عندك حق والله هي فعلا طلعت غير ما كنت متوقع أبدا
والله الواحد لما بيشوف بلاي الناس بتهون عليه بلوته
شوف التوكيل عمل إيه مع الراجل اللي لسة شاري العربية زيرو حسبي الله ونعم الوكيل
........................................

**ENG.MaRk** · 06-07-2015 02:19 AM

لما تنزل من سوناتا و كامري أكيد هتحس إنك راكب حاجة مش حلوة و ده اللي حصل معايا فعلاً أول ما جيت مصر من 5 سنين ... اشتريت فلوانس و جبت للمدام بيكانتو علشان ماكناش عارفين نسوق خالص في مصر و إحنا لاغني عن العربية عندنا ... قعدت معايا الفلوانس شوية حلوين و جبت معاها قاشقاي 2012 و بعت الاتنين و جبت Peugeot 508 و عجباني جداً بالنسبة للعربيات في مصر لكن برضه مش عملالي full satisfaction و خصوصاً إن أنا عربياتي في ألمانيا Elegant علشان كدة أخدت قراري و هأجيب Audi A8 قريب إن شاء الله ... خلاصة الكلام الياباني في مصر يعني راحة بال و اعتمادية زي ما فهمت من دراستي لسوق السيارات في مصر و الأوروبي هنا إما غالي و unaffordable أو فيه مشاكل زي الDSG ... فما بالك بقي انت جبت ياباني علشان تريح دماغك و لقيته مش كويس و بكدة يبقي فقد الميزة اللي بتميزه ... ممكن تجيب فلوانس أو سكودا رابيد أو سيات توليدو و ال 3 كماليات و سحب و ثبات و تقفيل ممتاز بالنسبة لباقي السيارات في الفئة ديه و ربنا يوفقك لما فيه الخير إن شاء الله و ماتتضايقش من العربية و احمد ربنا علي النعمة ديه :)

**hossam102000** · 06-07-2015 02:23 AM

الحمد لله لكن أنا واحد فعلا كنت بحب ميتسوبيشي وبعتز بيها جدا لكن العيوب دي ممكن تطلع من عربية صيني مش ميتسوبيشي

**عﻻء سالمان** · 06-07-2015 03:18 AM

معلش ياحسام الشارك بنشتريها عشان سعرها بيميزها بس قطع غيارها غالية ومتانتها وصاجها مش حلوين ساعة الصدمة صحيح مصممة تحمى المقصورة من اﻻنهيار بس بينهار جيبك..فى مركز صيانة معتمد لدياموند اسمة المصلحى فى قليوب رحتة مضطر عشان مركز جسر السويس علية ضغط وندمت انى رحت هناك عشان غيرو حاجات على ال30 الف بتتغير على ال40..وكانوا عاوزين يفتحوا شغل يمين وشمال من غير ضرورة وحراقين فى مصنعياتهم..تصور ضبط اﻻكصدامين ورفعهم زى الفابريكة ب 500 جنية.. الشارك فعﻻ زى ما بتقول اول نقطه زعلتنى فيها شنطتها الى متشيلش غير بطيختين جنب غطا العربية..تاخد بقى وضعها فى السوق وﻻ متاخدش احنا المصريين غﻻبة بنرضى لنفسنا الى مبيرضاهوش غيرنا لنفسة..بس انا عاوزك تتفاءل وتركز على اﻻيجابيات وتفتكر التكييف القوى والسحب الجامد والمحرك المايفيك الرياضى والفرامل اﻻعتمادية والكهربا المضمونة وال best value for money..والحقيقة مؤخرا انا اتفاجئت بحجم اﻻنتشار السريع للكورى C segment فى الخليج وصادفت كمان فلوانس كتير .. يعنى الماركات دى يتعمل سمعة طيبة حاليا فى اشد اﻻجواء قسوة..عموما دى مﻻحظات بتأكد للمشترين الجدد ان الشارك الخليجى اضمن .. متستعجلش عالتغيير اصبر عالعربية دى فيها خير كتير واتمتع بسرعتها وقوة موتورها واعتماديتها..وافتكر دايما انها اكتر حاجة مطلوبة فى اى لحظة لو قلت يا بيع..وادرس البدايل على مهلك.. وشوف كل حاجة .. سوق العربيات بيحصل فية مفاحئات.. واخرها الخصم 15000 على المحترمة السوزوكى S cross.. وكمان عشر عربيات جربتهم مفهمش المانى ..موضوع يستحق النظر وبالتوفيق

**monamize4** · 06-07-2015 03:48 AM

طول عمر الشارك فاشله ف مصر من 2008
لحد ما البومة اتوقفت و الشارك بدأت تشم نفسها شوية و
بدأ الاستهبال و بقت تنزل بفئات غريبة متنفضه عكس موديلات
2008 و 2009 اللى فئاتها فيها اوبشنز اكتر بكتير من موديلات 2015