الموضوع: ثقافة الشعب المصري في إختيار سياراته

المشاركة الأصلية كتبت بواسطة fepsceasar

دى كارثة انسانية لما تلاقى العربية مكلحة ومخبطة ومش عاوز يرشها
ويقولك عربيتي فابريكة وتتباع اغلى من واحد منضف عربيته ورشها..طب ما هو المنطقى ان انا اخدها ارشها ولا اكمل علىيها لحد ما تبقى صفيحة زبالة!!!!!!!!!

بالفلسفه المصرية ..تكمل عليها لحد ما تبقى صفيحة زباله

بالمنطق ..تاخدها ترشها

المشاركة الأصلية كتبت بواسطة ENG.MaRk

شبه مستحيل :)

يعني حضرتك بتقول على حاجه وعارف إنها مش هتحصل ..؟؟؟

المشكله فى الاساس ماديه

لما تروح سوق السيارات وتشوف سيارة المانى محترمه محدش بيعبر صاحبها
وتلاقى سيارة نوبيرا داخلة السوق التجار بتتلهف على سائقها وهو لسا سايقها فى الشارع على مدخل السوق
وتلاقى تاجر فتح الباب الخلفى وركب على الكنبة الخلفية (دليل انه حجز السيارة للشراء) وتلاقى تاجر اخر يقول للسائق نمرة موبيلك كام ورنلى لو مشتراش منك (التاجر اللى قعد على الكنبة الخلفية) وتاجر تالت على الجانب الاخر عمال يقوله ياعم انا قلتلك على السعر ده قبلة وتلاقى لمه وكانه فرح المولد على سيارة (كورى) مع الاحترام للى راكبينها
وفى المقابل سيارة اوبل محترمة والبائع الناس بتسالة كده عشان تعرف السعر مش اكتر

فطبعا التفكير بيتجة انك تشترى سيارة بياعة تعرف تبيعها بسرعة لو اتزنقت فى الفلوس

المشاركة الأصلية كتبت بواسطة egyplan

لما تروح سوق السيارات وتشوف سيارة المانى محترمه محدش بيعبر صاحبها
وتلاقى سيارة نوبيرا داخلة السوق التجار بتتلهف على سائقها وهو لسا سايقها فى الشارع على مدخل السوق
وتلاقى تاجر فتح الباب الخلفى وركب على الكنبة الخلفية (دليل انه حجز السيارة للشراء) وتلاقى تاجر اخر يقول للسائق نمرة موبيلك كام ورنلى لو مشتراش منك (التاجر اللى قعد على الكنبة الخلفية) وتاجر تالت على الجانب الاخر عمال يقوله ياعم انا قلتلك على السعر ده قبلة وتلاقى لمه وكانه فرح المولد على سيارة (كورى) مع الاحترام للى راكبينها
وفى المقابل سيارة اوبل محترمة والبائع الناس بتسالة كده عشان تعرف السعر مش اكتر

فطبعا التفكير بيتجة انك تشترى سيارة بياعة تعرف تبيعها بسرعة لو اتزنقت فى الفلوس

بتفكرني بموقف واحد حكاه وحصل معاه شخصيا ...

بيقول كان راكب عربيه نوبيرا وماشي وداخل على نفق الأزهر ..وبعدين الطريق كان واقف ..فعرف إن في حادثه حاصله في الطريق ..المهم الطريق كان ماشي على مهله وواحده واحده كده لغاية ما وصل لمكان الحادث ..وطبعا هو كان ماشي بس وصل لمكان الحادث وشاف الحادثه بنفسه ..المهم بيقول لما قربت لقيت عربية بي إم دبليو لابسه في الجزيرة اللي في النص ووش العربيه كله رايح ..والكلام ده كان بعد الساعة 12 بليل تقريبا على ما أذكر في الرواية بتاعته ...وبيقول لقيت واحد كبير شكله محترم قوي كده واقف وبيزعق لشاب شكله نضيف وابن ناس وبيهزأه طبعا ونازل في شتيمه ..وكان من ضمن الكلام اللي قاله (أنا غلطان إني عملتك بني آدم وجبت لك عربيه بالشئ الفلاني ..كان المفروض أجيبلك أي عربيه كوري معفنه من بتاعة اليومين دول عشان تعرف قيمة القرش يا بن الكلب) ...طبعا الراجل اللي بيحكي بيقول أنا حسيت إن هو بيتكلم عليا ..بس لما بصيت حواليا ولقيت في عربيات كوري تانيه واقفه إطمنت وعرفت إني مش لوحدي في الموضوع ده ...

أنا طبعا بعتذر لكل مالكي الكوري وبقدم إحترامي لهم ..لكن أنا بحكي القصه زي ما صاحبها سردها ..عشان عاوز أوصل لفكرة إن الظروف اللي إحنا فيها فرضت علينا حاجات معينة وإنتشرت وبقت ليها قيمة مع إن هي في الأصل ملهاش قيمة بالنسبة لحاجات تانيه