بص انا يمكن مريت بموقف مشابه ليك شوية
انا برضة رحت للناس وقولتهم امكانياتى وبمنتهى الصراحة لانى رايح نيتى صافية
وما بقولش مبلغ قليل عشان هم يزودا شوية فاوصل للمبلغ اللى انا عايز لانى مش رايح افاصل
فمثلا قولتهم امكانيتى شبكة ب 15 الف ومؤخر 25 الف
لقيتهم بيقولوا الشبكة مش اقل من 20 والمؤخر دة ما ينفعش نهائى وياريت كدة وبس وحسيت بسخرية شوية من مبلغ الشبكة وقولتهم دى امكانياتى وبامانة نويت انى مكملش اصلا وفعلا البنت كانت محترمة وصعبانة على وساعتها قولتهم هو دة اللى عندى واصلا اسلوب الكلام كانه فصال واسلوب السخرية خلانى نويت انى مكملش
وانا من نفسى تانى يوم اتصلت واعتذرت عن الموضوع كلة ولقيت اسلوب الكلام بتاعهم لما اعتذرت عن الموضوع اتغير نهائى خلاص اللى انت عايزة ومش هنعترض على حاجة بس انا قولتهم اسف مش هكمل لانى كنت صريح جدا وفى ناس مينفعش معاهم الصراحة عايزين يفاصلوا

بعد كدة رحت للناس تانية وقولتهم دى امكانياتى وانا لو امكانياتى اعلى مش هبخل عليها بحاجة قالولى خلاص ومعترضوش على اى حاجة ومزودوش جنية على اللى قولتة لا وكمان قالولى لا لو دة اقصى ما عندك حاول تقلل شوية عشان متضغطش على نفسك والموضوع مشى الحمد لله وبقيت انا من نفسى بشتغل باقصى مجهودى ونفسى اجبلهم احسن من اللى قولت علية باى طريقة عشان ناس محترمة
من الاخر الناس المحترمة بتبان والحمد لله انا الموضوع الاول كنت هكمل فية برضة عشان البنت صعبت على بس كان زمانى ندمان اشد الندم فاوعى تكمل فى موضوع عشان البنت صعبانه عليك لان دية حياة
واوعى تقول البنت مختلفة عن اهلها حتى لو بانت كدة

وللتوضيح مستوى الناس التانين اعلى ماديا واجتماعيا من اول ناس رحتلهم