الموضوع: أخطر الأضرار التي يسببها تسقيف الموتور؟

اللي أنا اعرفه وباشوفه إن كل عربيات الشاهين حتى الإنجكشن بتحط بنزين 80
وبالتالي بيحدث التسقيف ويكون أقوى وأعنف وصوته وصداه بيملأ الشارع وأحيانا بيصحيني من النوم ( طبعا على عكس اللانوس اللي التسقيف بتاع المتور بيكون لحظي لمدة ثانية أو أقل وصوته يكاد يكون منعدم)
المهم إن مع كل ظروف التسقيف دي المتور بيعمل بكفاة في التاكسي طبعا (نبطشيات صبح وليل وتفويل مرتين أو تلاتة يوميا ) لمدة لا تقل عن 3 سنوات وده اللي انا عرفته من أكتر من شخص

وسألت أكتر من ميكانيكي على موضوع التسقيف فكلهم أجمعوا إن لو بسيط والواحد مأجبرش العربية على المشي وهو اخد غيار تقيل أو ضاغط بنزين للآخر هيكون تأثيره محدود أو منعدم (قالولي مش هيعمل حاجة)
وقالوا إن لو التسقيف قوي وشديد مرة في مرة هيحصل تلف في حاجة مش عارف البساتم ولا الصبابات حاجة زي كده وقالوا إن ممكن المتور يفوت.

وكلهم أجمعوا إن أكتر عيب في بنزين 80 هو إنه بعد فترة من الإستخدام (في عربية كاربيراتير) بيلاقوا بودرة برتقالي أو حمراء موجودة في الكاربيراتير ومع الوقت بتسده وممكن تأثر على إنجكشن اللانوس وهي دي أكتر مشكلة ، وفي مستخدمين كتير لأنواع مختلفة من السيارات مثل الشاهين واللادا والكثير من السيارات القديمة أخبروني بتلك المشكلة

وطبعا لو هنحسبها ماديا هنلاقي إن بنزين 80 بيوفر 40 جنيه في التفويلة ولو اتحسبت تجاريا هتلاقي إنك هتوفر أكتر من تمن المتور أو الإنجكشن قبل ما يحدث عطل بمراحل ده إذا حصل عطل أصلا بسبب البنزين. وغير كده ايه اللي يخليني أدفع أكتر طالما ممكن أدفع أقل ؟

ونظرا لتوافر بنزين 80 ومحطاته بتكون فاضية فقررت إني أكمل بيه ولو حدثت مشكلة هاصلحها ومش هاستعمله تاني

وبالنسبة للتسقيف لاحظت إن التسقيف مش بيظهر إلا لو كان التنك قرب يفضى يعني فيه أقل من 6 لتر أو لو العربية سخنة في حالة إني أضغط على البنزين بقوة قبل ما ال Rpm يوصل إلى 2 لكن بعد ما بيعديها ممكن اجيب الدواسة للأرض من غير تسقيف.

وكل اللي قلته يعبر عن رأيي وتجاربي وشوفوا رأي خبراء المنتدى