اقتباس المشاركة الأصلية كتبت بواسطة mody1982 مشاهدة المشاركة
ابو مازن انت اديت تفسك الحق في انك تحكم عليا و علي موقفي من 15 بنت بدون وجه حق و اعتبرت اني هائم علي وجهي و مش عارف عايز ايه
اولا مين قالك ان ال 15 معجبونيش و ان مفيش رفض تم من نحيتهم
ثانيا من قالك ان الشخص اللي كان بيرشخ الناس دي ليا كان بيوصف ليا حاجه و تروح تلاقي حاجه تانيه خالص من خيث الاسلوب المستوي الاجتماعي و الشكل و غيره
ثالثا : تعرف ايه خضرتك عني علشان تقولي انت مش محدد هدفك هو حضرتك اصلا تعرفني تعرف تعليمي تعرف مستوي تفكيري تعرف انا بفكر ازاي
رابعا مش علشان حضرتك من تاني مره و لا ثالث مره ربنا كرمك و لقيت بنت الحلال يبقي ده الطبيعي و الصج و المفروض و اللي يزود عن كده يبقي غلط و مش محدد هدفه و هائم علي وجهه مسمعتش حضرتك عن حاجه اسمها التوفيق من ربنا و النصيب و القدر ( هل ربنا كتب في القرأن عدد مرات معين بعدها يحصل التوفيق و لو محصلش يبقي الغلط فيك )
خامسا : لو حضرتك قريت كلامي مش هتلاقيني معترض علي الموضوع و لا شايف انه فاشل بالعكس ان شايف انه الاصح دينيا بس اللي فاشل هو اسلوب الناس و طريقتهم في البيع و الشراء
و اسف لو كان ردي عنيف شويه
وأنا كمان معنديش مشكلة في إنك تدخل 15 بيت وتشوف 15 بنت ..أنا ردي عليك كان في سياق كلامك إن الطريقة دي دخلتك 15 بيت وشفت 15 بنت ورغم كده لسه مش لاقي اللي حضرتك عايزها ...

أعرف ناس كتير قعدت بالسنين تدور على عروسه ..وقعدت تلف على بيوت كتير ..وفيهم اللي لقي طلبه ..وفيهم اللي مش لاقي...وفي ناس بقالها 20 سنه بتدور على عروسه ..تصدق بقى ..20 سنة بيدور على عروسه ومش لاقي ..لدرجة إنه بدأ يدور في محافظات تانيه ..تخيل بقى ..محامي من بنها ..من سنة 94 لغاية النهارده بيدور على عروسه ..وأخباره إتقطعت عني من سنين ..ولسه بسأل عليه واحد يعرفه من قريب ..بتريق ..بقوله وإبراهيم المحامي عمل إيه ..إتجوز ولا لسه ..قالي تصدق لسه بيدور على عروسه !!!!!!!!!!!!!!!!!!!!!!!!!

واحد تاني خطب 8 خطوبات ..أظن ده بقى مش دخل 8 بيوت ..لأ ..ده دخل في علاقات رسمية 8 مرات ..وفي الآخر ..إتجوز التامنه ...أهو ده بقى عنده التامنه تابته ..

إذا كنت بقول إنك هائم على وجهك ومش محدد طلبك فده لإن كلامك يتفهم منه إن ال 15 مرة اللي شفت فيهم بنات كانت المشكلة من عندك ..إنت اللي رفضت ..وإنت اللي مش لاقي ..إذا كان ليك قصد تاني فأكيد حضرتك وضحته لي

أخيرا بقى ودي أهم نقطة عندي بصراحه ..حضرتك بتقول إنك شايف إن زواج الصالونات ..كما هو متعارف على تسميته هو الصح دينيا ..وشايف إن المجتمع هو اللي خلاه يفشل ..مش ده كلامك؟؟؟ ...

أولا الأصح دينيا محدش يقدر يفشله ..والدليل على كده إن في ناس ملتزمين ..واللي متعارف عليهم في بعض المجتمعات الشعبية بإسم ..أومات دقونه ..بيخطبوا بطريقتهم ..اللي هي لازم تكون واحده منتقبة وما يشوفهاش غير تلات مرات قبل الخطوبه وبعد الخطوبه ملوش تعامل معاها وده تأصيلا لحديث النبي عليه الصلاة والسلام لا إشهار في الخطبه ..ومش من حقه يشوف وشها ولا شعرها غير بعد العقد ..ورغم كده بيتجوزا ويعيشوا مع بعض عادي ..ولا المجتمع ليه دخل بيهم ..بص ..هي إتقالت في مشاركة في الموضوع ده ..كل واحد بيختار على طريقته وبيختار اللي يريحه ..بس أهم حاجه تكون طريقتك دي متوافقه مع شرع الله .أو أقرب ما تكون لشرع الله ...وملكش دعوه بالمجتمع ...كل واحد بيختار وبيتحاسب على اختياراته وعلى طريقة إختياره كمان ..

على فكره ..أنا آسف على كلمة هائم على وجهه ومش محدد هدفك ..أنا مقصدش شخصك ..أنا بتكلم عن موقفك ..متشخصنش الحوار ..وعدم تحديد الهدف من الشخص في حاجه معينة ملهاش دعوه لا بتعليم ولا بثقافة ولا بمجتمع ..عادي ..المحامي اللي بقولك عليه ده وبقاله عشرين سنة بيدور على عروسه محامي ناجح في بنها ..وأبوه الله يرحمه كان محامي كبير جدا في بنها ...وعيلته عيلة كبيره من فلاحين بنها ..ورغم كده ..مش محدد هدفه ..عدم تحديد الهدف في الزواج مش شرط يكون معناه إنك فاشل في حياتك عموما