الموضوع: ماله جواز الصالونات ..ولا هو أي أمريكاني وخلاص ؟؟؟

المشاركة الأصلية كتبت بواسطة باسم يوسف

كلهن غفر :)

الحمد لله الواحد ممتنع عن الجواز في مصر حفاظا علي كرامتي و اعصابي و فلوسي

الحمد لله

ما هو لو البنات غفر اكيد بردو الرجاله غفر ما هم اخوات

موضوع شكل البنات فى القاهرة طلع مشكله عامه انا كنت فاكره مشكله شخصيه ههه كنت فاكره غضب من الله و قربت اوصل لدرجه الالحاد بسببه هههه

سيرة الجواز بقت بتجيبلي مغص
لا نافع برا ولا جوا كله زبالة

المشاركة الأصلية كتبت بواسطة kemoelord

انا لازم اقابلك واتعرف عليك ع فكره ههههههههههههه

استاذ مودي حضرتك كانك قعدت معايا وكاتب الي حصل معايا بالمللي متر وبالتفصيل الممل + ان راي وتعليقي متفق مع كل حرف انت كاتبه ونفس الي حصلك حصلي لما جيت اعتذرت عن الجوازة !!!! وبقيت قاعد مستغرب جدااااااااا ,, انا كمان لسه خارج من تجربة فاشله " جواز صالونات " وفعلا كرهوا الناس في الطريقه الحلال

يا باشا تشرفني معرفتك طبعا و مقابلتك يمكن نألف كتاب سوا عن عجائب و طرائف جواز الصالونات
انا مقدرش انكر ان في ناس كتير نجحت في ايجاد عروسه ممتازه من الطريقه دي و يمكن متعاداش عدد اللي شافوهم 4 او 5 بنات
بس في المقابل في ناس مثلي و مثلك طالع عينهم و نفسهم يلاقوا بنت الحلال و مش بيحصل
و بيت ورا بيت و عروسه ورا عروسه هتلاقي سنين العمر بتجري و عداد البنات اللي شوفتهم بيزيد
لأن اساسا اللي بيجبلك واحده يقعد يوصف لك فيها و في اهلها و طباعهم و اخلاقهم و لما تروح تلاقي حاجه تانيه و لما تتقدم رسمي تلاقي حاجه ثالثه و لما تخطبها و تتعامل معاها تلاقي حاجه رابعه
ربنا ينعم علينا بالزوجات الصالحات جمبعا

المشاركة الأصلية كتبت بواسطة abo_mazen

وأنا كمان معنديش مشكلة في إنك تدخل 15 بيت وتشوف 15 بنت ..أنا ردي عليك كان في سياق كلامك إن الطريقة دي دخلتك 15 بيت وشفت 15 بنت ورغم كده لسه مش لاقي اللي حضرتك عايزها ...

أعرف ناس كتير قعدت بالسنين تدور على عروسه ..وقعدت تلف على بيوت كتير ..وفيهم اللي لقي طلبه ..وفيهم اللي مش لاقي...وفي ناس بقالها 20 سنه بتدور على عروسه ..تصدق بقى ..20 سنة بيدور على عروسه ومش لاقي ..لدرجة إنه بدأ يدور في محافظات تانيه ..تخيل بقى ..محامي من بنها ..من سنة 94 لغاية النهارده بيدور على عروسه ..وأخباره إتقطعت عني من سنين ..ولسه بسأل عليه واحد يعرفه من قريب ..بتريق ..بقوله وإبراهيم المحامي عمل إيه ..إتجوز ولا لسه ..قالي تصدق لسه بيدور على عروسه !!!!!!!!!!!!!!!!!!!!!!!!!

واحد تاني خطب 8 خطوبات ..أظن ده بقى مش دخل 8 بيوت ..لأ ..ده دخل في علاقات رسمية 8 مرات ..وفي الآخر ..إتجوز التامنه ...أهو ده بقى عنده التامنه تابته ..

إذا كنت بقول إنك هائم على وجهك ومش محدد طلبك فده لإن كلامك يتفهم منه إن ال 15 مرة اللي شفت فيهم بنات كانت المشكلة من عندك ..إنت اللي رفضت ..وإنت اللي مش لاقي ..إذا كان ليك قصد تاني فأكيد حضرتك وضحته لي

أخيرا بقى ودي أهم نقطة عندي بصراحه ..حضرتك بتقول إنك شايف إن زواج الصالونات ..كما هو متعارف على تسميته هو الصح دينيا ..وشايف إن المجتمع هو اللي خلاه يفشل ..مش ده كلامك؟؟؟ ...

أولا الأصح دينيا محدش يقدر يفشله ..والدليل على كده إن في ناس ملتزمين ..واللي متعارف عليهم في بعض المجتمعات الشعبية بإسم ..أومات دقونه ..بيخطبوا بطريقتهم ..اللي هي لازم تكون واحده منتقبة وما يشوفهاش غير تلات مرات قبل الخطوبه وبعد الخطوبه ملوش تعامل معاها وده تأصيلا لحديث النبي عليه الصلاة والسلام لا إشهار في الخطبه ..ومش من حقه يشوف وشها ولا شعرها غير بعد العقد ..ورغم كده بيتجوزا ويعيشوا مع بعض عادي ..ولا المجتمع ليه دخل بيهم ..بص ..هي إتقالت في مشاركة في الموضوع ده ..كل واحد بيختار على طريقته وبيختار اللي يريحه ..بس أهم حاجه تكون طريقتك دي متوافقه مع شرع الله .أو أقرب ما تكون لشرع الله ...وملكش دعوه بالمجتمع ...كل واحد بيختار وبيتحاسب على اختياراته وعلى طريقة إختياره كمان ..

على فكره ..أنا آسف على كلمة هائم على وجهه ومش محدد هدفك ..أنا مقصدش شخصك ..أنا بتكلم عن موقفك ..متشخصنش الحوار ..وعدم تحديد الهدف من الشخص في حاجه معينة ملهاش دعوه لا بتعليم ولا بثقافة ولا بمجتمع ..عادي ..المحامي اللي بقولك عليه ده وبقاله عشرين سنة بيدور على عروسه محامي ناجح في بنها ..وأبوه الله يرحمه كان محامي كبير جدا في بنها ...وعيلته عيلة كبيره من فلاحين بنها ..ورغم كده ..مش محدد هدفه ..عدم تحديد الهدف في الزواج مش شرط يكون معناه إنك فاشل في حياتك عموما

انا مقدر ردك يا ابو مازن
بس اللي عايزك تحاول تشوفه هو الجانب الاخر من كلامي
زي ما قولت لحضرتك انت متعرفش تفاصيل ال 15 مره دول ايه و متعرفش ايه اللي حصل بس الخلاصه ان عامل التوفيق بتاع ربنا هو الفيصل بعد مره و لا مرتين و لا بعد 1000
اكيد حضرتك لو انا شخص مش مقتنع بالموضوع ده دينيا مكنش ده بقي حالي
سهل اوي اني اتعرف علي بنت و ادخل في دور حب و اونطه و اخليها متعلقه بيا و بعدين استخدمها للضغط علي اهلها لكن ده لا ديني ولا اخلاقي
زائد اني عمري الحمد لله ما دخلت في علاقه مع بنت من اي نوع لا زماله لا صداقه و لا الكلام ده ( دي قناعتي و في ناس ممكن تشوفني متخلف و رجعي ) بس انا مرتاح نفسيا كده
فبالتالي من اول ما بدءت البحث و انا بعاني من تبعات التدليس و الكذب بتاع الناس اللي بترشح ليك العروسه
في بنات شوفتها ممتازه بس دي من الاخر كانت ممكن ترد عليا بعدها ب 3 اسابيع و تقولي كل شئ قسمه و نصيب و اسمع انها في الاسبوع الرابع اتخطبت و اكتشف انها كانت جاي ليها كام عريس و شافتهم و قارنت بنهم و اختارت احسن واحد ليها من وجهه نظرها اللي غالبا ما بتكون فيها جانب الجوانب الماديه ليها وزن كبير بجانب الشكل و القبول و غيره
يعني انت في الاخر لما بتكون في بنت كويسه ممكن تقيمك لوحدك او ممكن تشوف 5 او 6 معاك و تقييمك وسطهم و تختار اللي هي شايفاه انسب
و طبعا كل واحد فيهم مش فاهم ولا عارف انه موضوع في مقارنه مع غيره
اللي نفسي انك تقدره يا ابو مازن ان اكيد محدش من اللي بيشوف 15 او 16 او 20 ده راضي بحاله و راضي انه عمال يدخل و يخرج من بيوت و راضي انه عمره بيجري من غير ما يرتبط و يكون اسره و العداد عمال يعد
لا حد فينا بيدور علي هيفا و لا مارلين مونرو ده واحد زيي مش بتكلم في مواصفات شكليه خالص غير انها تكون وزنها مش زايد و شكلها مقبول و الله زي ما بقولك كده لا بقول بيضا و لا سمرا و لا شعرها طويل و لا عينها مش عارف ايه و لا طولها مش عارف ايه كل اللي عايزه اني ابقي متقبل شكلها حتي لو لونها برتقاني
بس اللي بيهمني الاخلاق و البيت و الاسلوب و العائله بتتعامل ازاي
اتمني تكون فهمتني