الموضوع: شباب المنتدي الاعزب فوق الثلاثين رجاء الدخول

المشاركة الأصلية كتبت بواسطة hitman235

انا كسرت ال29 و كنت بدور من 25 قريت فتحه مره و خطبت مرتين يعتبر الاسباب الرئيسية للتـأخير هو التردد + السفر لأنى بخطب فى الاجازات و بتكون ضيقه يعنى 2 من ال3 الى خطبتهم قعدت معاهم يومين بالظبط و سافرت فطبعا الفتره القليله بتخليك مش مرتبط بحد نفسيا و مع اول مشكله بتلاقى الموضوع اتفشكل
طبعا سبب السفر هو شراء شقه فى الاساس بس امتد لما بعد ذلك لأحوال مصر لأن سوق الانشاءات الى هو مجال عملى اصابه الركود من وقت الثورة للان
سبب تانى ان اول بنت خطبتها و انا 25 كان فيها صفات شكليه صعبت عليا الاختيار بعديها لأن خليتنى مقبلش اى حد و ارفض كتير بصعوبة بالغه لقيت حد مناسب اخر فى سن 26 خطبت سنه و الموضوع مكملش قبل الكتاب بأيام ... اخر مره خطبت فيها فى اول 28 و كانت برضه فيها مميزات كتير من ضمنها ان شكلها عجبنى و ده يعتبر معجزه لأن كتر ما تشوف كل ما صعب حاجه تعجبك .... و الموضوع تم فشكلته برضه من طرف البنت و كان فيه نوعا ما عدم توافق اجتماعى بينى و بين اهلها خلى فيه فجوه بينى و بينهم بشكل ما خلت البنت تتضايق
باقالى سنه بدور تانى من اخر خطوبة او اكتر شوية طبعا انا جاهز ماديا بس العوائق ان استنفذت كل اتصالاتى و شوفت فوق ال25..30 بنت ثانيا المواضيع الى مريت بيها و التجارب بتخلى اقتناعك بأى جد حديد اصعب لأن بيبقى فى ذهنك صورة و شخصيه التجارب الى فاتت ... ثالثا ان البنات فى مصر فعلا المتوسط شكله اقل من المقبول و دى الحقيقه او القاهراوية تحديدا لأن بالصدفه الى خطبتهم كانوا من جزور شرقاوية و اسكندرانية ...
حاليا بحاول اتأقلم على العيشه لوحدى طبعا الموضوع صعب بس انت تجاربك خلتك تعلى سقف متطلباتك و مع كل يوم سنك بيزيد فيه فرصتك بتقل انك تلاقيه
طبعا لما بتمر بتجربه مع واحده شكلها فوق المتوسط ( و هما قليلين ) و شخصيتها مقبوله بتخليك تنفر من اى بنت صفاتها دون ذلك ....
اى حد مكانى لو مش متشدد فى الصفات كان اتجوز من الى انا قابلتهم و فيه منهم اتجوز فعلا طبعا ال3 الى خطبتهم الى كانوا افضل صفات فى رأى اتخطفوا و ما قعدوش فى البيت كتير بالكتير شهرين و اتخطبوا و اتجوزوا ناس قاعده فى مصر و فيه منهم الى خلف كمان و ده برضه خلانى احس انى اتأخرت اوى فى موضوع الجواز
يمكن انا مثالى او اختلاف الطباع الو خلا ال3 مواضيع دى ما تستمرش او يمكن الظروف الخارجيه حكمت ساعتها معرفش بس الى اعرفه ان الموضوع بقى معقد جدا بالنسبة ليا حاليا و يخليك تفكر لو حد فى ظروفى ان السفر هو السبب فى التأخير مع انه ضرورة للظروف الماديه بتاعت شباب كتير و دلوقتى بعد ما استقريت فى مكان المفروض تضحى بشغلك و تنزل مصر تدور على شغل الاول و لما تلاقى شغل تدور على واحده مناسبة او تفضل مسافر و تحاول فى الاجازات و هو الاسلوب الى اثبت فشله على مدار 4 سنين

بص ساعة ما يجي نصيبك هتلاقى الامور متيسرة
انا خطبت و اتجوزت فى اجازة السفر(او بمعنى اصح بين سفاريتين)
مادام العملية معقده عندك كده لماذا لا تيحث عن مكتب للزواج--الخيارات عندهم هتبقى اوسع من المعارف و انت تختار
مش عاجبك القاهرية-انزل الشرقية-او اسكندرية و شوف مكتب زواج

بص يا عم
انا اتجوزت على سن ال 35
فضلت بتاع 6 سنين ادور
اللى تعجبنى و انوى عليها بجد بجد ماتوفقش معاها لسبب من اتنين:

1- اما ان مستواى المادى مبيبقاش حسب المطلوب (لانى كنت باشوف بنات بينى و بينهم 9 او 10 سنين) و بالتالى كان الاهل بيطمحوا فى مستوى مادى عالى بالذات لما بيحسوا انك كبير و ناضج و مفروض تنهى و تجوز خلال مدة اقصاها 6 شهور
2- اما البنت نفسها ما توافقش بيا

اما بقة اللى اشوفها و اهلها يفتحولى ابوابهم و قلوبهم فبيكون اقتناعى بيها من اول مقابلة بنسبة 70 فى المائة
و الغريب انها بتكون موافقة جدا

و فضلت على هذا الحال سنين طويلة
و خلال المدة دى طورت مستواى المادى و الاجتماعى و الوظيفى كويس اوى.. و دورت تانى لغاية لما و صلت لدرجة اقتناع بواحدة من ناحية الجمال 85% و الاخلاق و الطيبة و الرقة 100 % قررت انى اقبل بالنسبة دى و استمر و الحمد لله على التوفيق انا حاليا سعيد بقدر كبير .. ما اخدتش كل حاجة بس عرفت ان اللى فى بالى مستحيل الاقيه انى الاقى واحدة 100 فى المية كل حاجة
و الحقيقة ان الواحد كل ما بيكبر و يشوف بنات كل ما بيزيد سقف متطلباته فى الجمال و بالتالى بيقلل دائرة الاختيار لان الجميلات فعلا مع اخلاق نادرين بحق و دا عن تجربة

اذن سبب التأخر:
1- عدم توافق رغبات الشاب مع المعروض فى السوق
2- وجود حالات نادرة اخلاق و جمال بس بأسعار عالية
3-ارتفاع سقف مطالب الشاب باضطراد كل ما يزيد سنه لانه شاف كتير و عاوز ينول بعد صبر
4- البدء فى البحث اصلا متأخراً فى اواخر التلاتينيات غلط لانك هتاخد وقت
5- التردد بسبب التعود على الحرية التى بجمالها لا تقاوم .. و الخوف من الربطة و التقيد و الروتين