لأ هى مش مسألة تفاؤل و تشاؤم. . . المسألة انك لما تشوف الصورة الاكبر تعرف ان اللى بيحصل عندنا ده حاجة بسيطة بالمقارنة يما يحدث فى العالم و اننا عدينا الاصعب منه قبل كده و بالتالى لما تكون اصتدمت بصخر القاع الاقتصادى فى 2011 تعرف ان القادم مهما كانت قساوته سيكون اهون
داو جونز بقاله تالت يوم على التوالى بيكح دم و معه كل بورصات العالم
البترول النهاردة وصل لاسعار موصلهاش من 40 سنة و قريب هتحصله كل السلع فى العالم بما فيها الذهب
و قيس على ده الكثير و لسه
و حضرتك بنفسك ذكرت الحل لما ذكرت مثال المغرب
ازاى
المغرب بتحاول تدخل بقوة فى مصاف الدول اللى عندها صناعة قوية. . . لان ده الاساس الحقيقى لاى نمو حقيقى فى الاقتصاد للدول اللى زينا
طيب تعالى بص عندنا. . . هتلاقى اقتصاد قائم على التجارة و الارزقية اللى كل همهم يجيبوا زبالة الصين و يبيعوها هنا بضعف تمنها محققين هامش ربح خيالى و شكرا. . . يعنى اقتصاد هامشى هش ممكن انهياره فى اى لحظة. . . و هو ان نجح فى امثلة زى دبى او هونج كونج او سنغافورة الا انه صعب يقوم اقتصاد بلد كثيف السكان كثيف العمالة زى مصر. . . اللى الحل الوحيد لها هو نماذج فيتنام و ماليزيا و اندونيسيا لضمان نمو حقيقى فى الاقتصاد الحقيقى مبنى على مشاريع صناعية تقوم بتشغيل العمالة الكثيفة و توفر الكثير من فرص العمل فى بلد يزيد 2.5 مليون نسمة سنويا
بص بقى فى ظل ما سبق لاجراءات البنك المركزى الاخيرة. . . هتلاقي ان هدفه الحقيقى هو تجفيف منابع الاستيراد و الارزقية اللى عايشين على الاستيراد. . . حتى لو تخذ اجراءات هتضر مؤقتا بمناخ الاستثمار بل و التصدير الذى تريد البلد تشجيعه.
تيجى بعد كده مرحلة تهيئة مناخ الاستثمار و تقديم تسهيلات للمشاريع و غيرها بعد ان تم تجفيف منابع ضياع دولارات البلد كلها فى الاستيراد الاستهلاكى
النظرة الشاملة الاعم هتديك صورة اوضح للامور. . . .اما النظرة المقتطعة للاجراءات الفردية مش هتخليك تشوف الصورة كاملة
حاجة اخيرة بخصوص اصل المقال اللى حضرتك جايبه
هدى لحضرتك مثلين جايز تكون متعرفهمش و مثل حضرتك اكيد عارفه
الامثلة دى للاجراءات الاقتصادية اللى بتتخذها الدول لحماية اقتصادها
بين يوم و ليلة . . . البنك المركزى السويسرى فك ارتباط اليورو مع الفرنك السويسرى. . . ليه. . . لانه كان عايز يفك ارتباطه مع اقتصاد راكد و منطقة مشاكلها المالية كتير. . . و النتيجة . . . البورصة السويسرية نزلت من 10000 نقطة الى 8000 محققة خسائر بالمليارات و ايضا ارتفاع خرافى للفرنك امام الدولار مسببا ايضا خسائر اخرى كبيرة جدا للاقتصاد السويسرى القائم على التصدير. . . بس ده اجراء كان لابد منه مهما كانت خسائره القصيرة الاجل
المثل الثانى و هو السبب فيما فيه العالم الان. . . بين يوم و ليلة الصين صحيت و راحت منزلة قيمة اليوان 2% امام الدولار. . . ليه . . . عشان تدى حقنة منشطات قوية لاقتصادها الذى يتباطأ نموه بتشجيع الصادرات التى يفيدها تخفيض العملة . . . و النتيجة. . . ان بورصة امرييكا شطبت حتى الان خمسة تريليون دولار من القيمة السوقية لشركاتها و العالم كله كذلك و لسه
قيس على كده اجراءات البنك المركزى بتاعنا بتاعة العشرة الاف و الخمسين الف دولار. . . ساعتها هتفهم الغرض الحقيقى منه . . . عشان متضيعش دولارات البلد فى شراء التكاتك و فوانيس رمضان. . . ثم يأتى بعد ذلك وضع البلد فى المسار الاقتصادى الصحيح
بالنسبة للظروف الخارجية. . . لم تختلف كثيرا عن اسوأها فى 2011 . . . تبدل وضع بعض الحلفاء الى اعداء و العكس. . . صحيح الظروف العالمية تضغط على الجميع. . . بس السعودية تحالفها مع مصر استراتيجى طويل المدى و عارفة كويس ان ان تحالفها مع مصر هو مصدر قوة للسعودية بقدر ما هو مصلحة لمصر. . . و كمان السعودية عندها احتياطى دولارى قدره تريليون يعنى الف مليار دولار من ارباح مبيعات البترول فى اخر عشر سنين و عندها استعداد توصل سعر البرميل ل 8 دولار زى ما حصل سنة 1986 و 1999 فى مقابل انها تطفح ايران الكوتة لان ده هدف يستاهل انك تصرف عليه تريليون دولار من وجهة نظرها. . . زى ما قلت لحضرتك اللعبة كبيرة اوى اوى و على مستوى العالم اللى الكل بيتطاحن فيه على سرقة معدلات النمو الاقتصادى للدول من بعضها البعض و على السيطرة و الهيمنة الاقليمية و العالمية لان دى اجزاء رئيسية من لعبة الامم