بالنسبة للدولار انا بتابع الموضوع هنا بتاع سعر الصرف بس مشوفتش مشاركة ان حد غير بسعر 8.8 و اعتقد دى ممكن تكون غلطة كتابة و الا ايه اللى جابره على شراء سلعة بهامش زيادة اكتر من 15% من سعرها الا اذا كان مضطر و حالة طوارئ حد مسافر يعمل عملية مثلا او كده انما اى حاجة استهلاكية او شراء سلع اعتقد متستاهلش الخسارة دى كلها . . . مش عارف. . .
بالنسبة للبنك المركزى عنده هم ما يتلم سياساته تؤثر على حياة شعب تعداده 100 مليون فى ظل وجود قوى معاكسة و متربصين معندهمش اى مانع و لا ضمير انهم يعملوا المستحيل لاسقاط الاقتصاد ده ده غير بلوة المتربحين و بتوع السبوبة و اللى عنده استعداد يعمل اى حاجة عشان يكسب بالحرام و لو بأستغلال حاجات الناس بدون ادنى ضمير و و و . . . و لازم من وجود فترة انتقالية للتهدئة بها بعض الاعراض الجانبية. . . و مرة تانية البنوك المركزية مينفعش تصرح بأجراءاتها و لا توقيتها. . . عالميا ده اللى بيحصل حتى لو بيسبب صدمات
بالنسبة لسعر انتاج البترول . . . اقرأ التقرير ده على سبيل المثال هتلاقى فيه اللى بقولك عليه:
تقرير: تكلفة إنتاج النفط في الشرق الأوسط الأرخص عالميا - rt arabic
على فكرة كل معلومة انا بكتبها فى مشاركاتى مش مبنية على استنتاجات انما لها مصادرها الكثيرة. . . زمان كانت كل مشاركاتى دايما مدعمة بمصادر معلوماتها. . . لكن دلوقتى مش ملاحق فبكتب الخلاصة و بكتفى ان لو حد ناقشنى فى مصدر المعلومة بجيبه له. . . العالم يتحرك بسرعة الضوء يا صديقى بينما قدرتنا على المتابعة و القراءة و التحليل يادوبك بتتحرك بسرعة الصوت فى احسن الاحوال ان لم يكن بسرعة السلحفاة عند الاغلب الاعم :-)
معاك طبعا فى كل كلامك الاخر عن ضرورة التحول الاقتصادى لمجتمع منتج حتى لو بالعافية لأن مفيش اختيار تانى . . . بس لازم شوية معاناة طبعا للتحول من اقتصاد ريعى بقالنا عشرات السنين بنقول مصادر دخل الاقتصاد المصرى الثابتة من سياحة و قناة سويس للكلام المعروف اياه بس الوضع العقيم ده لازم يتغير و هيتغير ان شاء الله