ههههه ماهو ده الحال اللي ماشي اليومين دول هنا
تحياتي يا استاذ ماهر و متابع لتحليلاتك
عرض للطباعة
حضرتك وضحت امتا نفضل نعانى .... لغاية لما لا نرى من الحكام جهد واضح فى العمل على رفاهية الشعب ... و هنا تتوقف المعاناة و تتحول الى شيء اخر ....
سؤالى السابق .... ليه نفضل نعانى ؟؟!!! ليه مينفعش نشتغل و ننتج و لا نعانى من مشاكل يومية اساسية ؟؟!!!
نتائج الاستطلاع الى حضرتك عملته متوقعة فى بلد من اعلى دول العالم فى حوادث الطرق ... و ده موضوع كبير اوى و محتاج قوانين و متابعة مستمرة
النقطة الى اختلف فيها مع حضرتك جملة و تفصيلا .... موضوع الهجرة ..... مفيش بلد محترمة تقول لشعبها الى مش عاجبه الحال يهاجر .... لأى سبب من الاسباب ... و لا عاوزين نتحول الى بلد طاردة للسكان ... و ده موضوع تانى كبير جدا جدا
الزيادة السكانية تعتبر احد نقاط القوة فى المجتمع ... عدم استطاعة الحكومات على حسن استغلالها يعتبر عجز من الحكومة مش عيب فى القوة البشرية ... و من الممكن اذكر لحضرتك الكثير من الامثلة على حسن استغلال القوة البشرية .... و تحويلها من كثرة عددية عشوائية التوجيه .. الى قوة بشرية حقيقية و يتحول الى سلاح مؤثر فى كل المجالات
مشروع قناة السويس ... المفروض .... يكون افضل بكثير من منطقة جبل على ... و على حسب الكلام الى بيتقال .... المفروض ان ينافس جبل على بقوة ....
فيه مشاريع ممكن تتعمل فى اى حتة ... و مشاريع مش حينفع تتعمل غير بالقرب من ميناء و ممر مائى
مشروع قناة السويس .. حيضم الاثنين معا ...
فيه مشاريع خدمات نقل و تخزين ... بمعنى ان السفن من الممكن ان تنزل كل حمولتها فى الميناء ... كترانزيت ... و ترجع بلدها ... و تقوم سفن تانية تحمل الحمولة الاولانية بعد ما تتوزع على البلاد الى رايحالها .... ميناء مركزى
مشاريع التموين و الصيانة الخفيفة للسفن .... عمرات للمحركات ... عمرات للاوناش ... مشاكل فى انظمة الملاحة و التوجيه ... حاجات تتعمل و السفينة راكنة على جنب او فى وسط البحر
الحاجة التالتة الى مش موجودة فى كل الموانى ... ما يطلق عليه .. الاحواض الجافة ... و ده السفينة بتدخل فيه و يتم تفضية المياه من حولها تماما و يتم تثبيتها بطريقة معينة .... ثم تبدأ عمليات الصيانة الثقيلة .. التى يتم فيها اصلاح الهيكل الخارجى و اللحامات و استبدال اجزاء الهيكل المتاكلة ...
و دى بتتأجر باليوم ...
و المهم فى هذا الموضوع ... ان دى بتفتح معاك حاجات تانية كتير جدا .... منها عمليات الدعم الهندسى و الفنى للسفن الى بتتصلح فى الاحواض الجافة ... شركات كتيرة جدا ممكن تشتغل فى الموضوع ده
المشروع ده لو اتنفذ .... مصر حتتغير ... قناة السويس ممكن تكون زى محطة رمسيس فى الزحمة
الامارات حتوافق على المشروع ده و لا لأ ؟؟!!! الايام القادمة حتوضح حاجات كتير فى الموضوع ده
سؤالك ليه نفضل نعانى هتلاقى اجابتها فى كتاب اخر ارشحه لك لقراءته هو كتاب مجتمع جديد او الكارثة لزكى نجيب محمود الله يرحمه. . .
موضوع الهجرة انا قلته كحل فردى لمن لا يطيق الظرف اللى فيه البلد. . . و مفيش دولة هترعى هجرة ابناءها لكنها الظروف التى تحكم و تتحكم حسب الظرف االتاريخى و دورات النور و الظلام التى تمر بها الامم . . . لكن انا قصدى برضه من موضوع الهجرة بعد تانى. . . بص لدولة زى لبنان. . . هتلاقى قيمة و قوة و فعالية جالياتها فى كل انحاء العالم فى مجموعها اقوى من لبنان نفسها كدولة على كل المستويات اقتصاديا و اجتماعيا و سياسيا . . . و ده ليه . . . لانهم من اكتر من قرن فات قالوا بلاد الله لخلق الله و سافروا و استكشفوا و نجحوا لنفسهم و لبلدهم. . . و.حضرتك عارف طبعا مدى اعتزازهم بلبنانيتهم
موضوع الزيادة السكانية و الدول اللى فى دماغ حضرتك انا عملت عليهم كلهم فى شغلى case studies واحدة واحدة فى دراسات لخصت فيها اسباب صعود هذه الدول. . .اما ان احنا هنا نطبق الدروس دى فيامسهل لاننا لسه فايقين زى اهل الكهف كده على اوضاع و حقائق هائلة تنخر فى عضم البلد من عشرات السنين. . . بمناسبة شغلى اللى العديد من الناس سالنى عنه فى اكتر من مناسبة. . . انا مش بحب اكتب تفاصيل خاصة على الملأ كده. . . بس هقول كلمة بسيطة. . . انا بشتغل شغلانة نادرة شوية فى بلدنا. . . شغلانتى ان اعرف. . . . فقط لا غير . . . ديكارت قال je pense donc je suis . . . انا بقى شغلانتى je connais, donc je suis . . . .
حلوة الفزورة دى :-) . . . بس مش مخبر و لا حكومة عشان بس محدش يتخض ;-)
انا نزلت كتاب مجتمع جديد او الكارثة دار الشروق 1983 ... و ان شاء الله حبدأ قرائته فورا
و لازلت ابحث عن الكتاب الى حضرتك ذكرته يتحدث عن الصين
انا فهمت وجهة نظر حضرتك .... و لكنى لازلت لا اشجعه كحل جماعى او منظم او موجه
اتعاملت مع الكثير من اللبنانيين فى بلاد المهجر زى ما هما بيسموها ..... و فى الغالبية .. ناس محترمة جدا .... صاحب عمل و تاجر شاطر ... مدير عمل رائع ... بس عمال مش اد كدة و افكارهم مختلفة شوية عننا .... علاقته بالبلد ( لبنان ) لم تنقطع ... بس الناس عايشة فى بلاد المهجر كأنها بلدهم ... و مش ناويين يسيبوها
بس متنشاس حضرتك ان اللبنانيين فى الاصل تجار .... عندهم حب للمغامرة و التنقل ... و بالمناسبة معندهمش حاجات ثابتة فى حياتهم كتير مسلمين بيشربوا خمور عادى جدا و هكذا
هما الى عاوزين يهاجروا و يعملوا حياة جديدة
و اختلف مع حضرتك انهم نجحوا لنفسهم و لبلدهم .... و مدى اعتزازهم ببلدهم الام .... الامر لا يتعدى ضرورة وجود جزور و اصول .... انما الناس كلها الى اتعاملت معاهم بيقعدوا بالسنتين ميرجعوش لبنان ... و الى بيعملوه لبلدهم انهم بيجيبوا اقاربهم و معارفهم يشتغلوا معاهم ...
و من الملاحظات المهمة ... اتخاذ كل الاشخاص لاسماء تتناسب مع المجتمع الى بيعيشوا فيه ...
احمد بيسمى نفسه اليكس .... و نماذج كتيرة ... و للأسف انا مش فاكر بقية الاسماء ... علشان احنا كنا بنناديهم بأسمائهم العربية
انا كمان معترض على موضوع اننا لسا فايقين زى اهل الكهف .... الى اصبحت فيه مصر .. ناس كتير كانوا بيحزروا منه من زمان اوى ... و اتمنى .... ان الفكر يتغير ....نعمل دراسات و ابحاث .. و نقوم بالتنفيذ
و حضرتك باين انك مثقف ... و الاهم من ده .. ان اسلوب حضرتك متحضر و راقى جدا
و انا مستمتع بالحوار مع حضرتك بالرغم من الاختلاف فى الرأى
لازم نتغير على كل المستويات افراد و كمجتمع . . . طبع الحياة النهرية الثابتة من الاف السنين لازم نغيره. . . محتاجين نبقى مغامرين. . . محتاجين مستكشفين فى كل المجالات مش مجرد نماذج فردية. . . و المحصلة فى النهاية مفيدة للافراد و المجتمع. . . نقطة اهل الكهف انا قصدى بيها ان المجتمع ككل فاق بأسلوب الصدمة لدرجة ان بياع الطماطم البسيط بقى يفهم و يهتم بالسياسة . . . احنا اتأخرنا اوى للوصول للمرحلة دى. . . بس برضه better late than never . . . ياه كلمة مثقف دى بقالى كتير اوى مسمعتهاش و حتى فى التليفزيون . . . الله يمسيه بالخير فاروق شوشة و يديه الصحة. . . انا اتربيت على برنامجه امسية ثقافية و ربنا سهل فى حياتى العملية و كنت محظوظ ان شغلانتى العملية هى هى مجال اهتماماتى . . . المعرفة بكل مجالاتها و التحليل و استقراء المستقبل
حاجة كمان . . . حاول متملش من اسلوب كتابة زكى نجيب محمود لانه احيانا بيبقى صعب فى توصيل فكرته و لغته احيانا كتير مش سهلة و مقعرة زى لغة العقاد كده. . . لانه من جيل العمالقة بس اللى للأسف منالوش حظهم من الشهرة و الاهتمام عشان الناس تعرفهم بشكل واسع