مطلوب نصيحتكم فى شراء أول عربيه .. اونو - سيينا - بونتو ..

**rashad91** · 28-08-2015 04:40 AM

لو سمحتم انا جديد هنا و طالب نصيحتكم فى اختيار اول عربيه ليا ان شاء الله ..
المبلغ المتوفر 30 ألف ..

كلمت ناس معارفى و قدامى 3 عربيات :

1. فيات اونو موديل 2000 حاله جيده.
2. فيات سيينا موديل 2001 محتاجه مصاريف نضافه.
3. فيات بونتو 94 معقوله.

و انا معلوماتى مش قد كده فى العربيات و محتار ..

اللى يهمنى فى العربيه حاجتين .. اولا انها تكون مريحه فى سواقتها و مساحتها لانى طويل القامه 189 .. ثانيا انها تكون اعتماديه فى المشاوير اللى جوا البلد و مش كل شويه تعطل و تعطلنى .. و 90 فالميه من سواقتى جوه البلد مش بسافر الا قليل جدا ..

محتاج نصيحتكم جدا رجاء ما تبخلوش عليا بالنصيحه و جزاكم الله كل خير ...

**khalid_adel** · 28-08-2015 04:56 AM

متابع لاني في نفس الموقف بالمللي بس عايز عربيه للمدام عندي ومحتار مابين اونو وبونتو وماتيز (حاجه هاتشباك وتكيف وسنتر وباور) وطبعا ميكونش فيها مشاكل واعطال فجائيه

**morooo89** · 29-08-2015 12:50 AM

بالعكس انا طولي 196 ومش بعرف اقعد غير ف العربيات الهاتش باكي ونا معايا اونو ومستريح فيها جدااا
مش بعرف اقعد لا ف اكسنت ولا لانوس ولا فيرنا ولا كرستاله _ مجربتش الاكسيل
والميزه الي عجباني ف الاونو انا مريحه في الكرسي بتعها بعكس العربيات التانيه
انا رائيي خليك في احسنهم حاله واعالاهم ف المديل بس الحاله اههم وانتظر رد باقي الناس

**eng.mohdm** · 29-08-2015 01:51 AM

بونتو وبعديها اونو

**rashad91** · 29-08-2015 04:30 AM

متشكر اوى على ردودكم يا رجاله جزاكم الله خيرا
بالنسبه لموضوع الطول ف انا اتعلمت السواقه هلى عربيه لادا مصرى 2107 و كنت مش مرتاح ف القعده نهائى ..
و اتقاللى برضو ان الاونو واسعه اوسع من اللادا و ان الكرسى بيرجع لحد الكنبه مش زى اللادا .. هل الكلام ده صحيح ؟
و هل الموضوع ده فى البونتو كمان ولا الاونو اوسع ؟

**Diaby** · 30-08-2015 12:14 AM

اهم حاجة تسيبك من العربيات المعروضة عليك حاليا ﻻن اللى فهمته منك انهم حالتهم تعبانة بما انك لسه جديد ف السواقة حالة العربية حتفرق معاك اكتر م النوع دور على حاجة متحطش فيها جنيه ومتوقفش بيها عند صنايعي ربع ساعة بالنسبة للنوع احنا كان معانا سيينا قبل كده عربية فوق الممتازة ومكنتش واخدة حقها ف البلد دي بس الكﻻم ده كان ف 2006 وكانت موديل 2004 يعني كانت زيرو لكن حاليا صعب تﻻقي حاجة نظيفة بس لو لقيت متسبهاش غير انها حتبقي مكيفة وكماليتها كويسة وكمنظر برضو بس زى ما بقولك الحالة ثم الحالة بالنسبة للاونو معانا واحدة حاليا 2002 عربية ما شاء الله جديدة بس مشكلتها ان الجاكمان بتاعها واطي جدا وﻻزم تكون حذر ف المطبات غير كده يعتبر مفهاش مشاكل بحمل فيها 7 صحابي وﻻ بتقول ياعيني ومشيها ناعم واستهﻻك البنزين كويس بس للاسف ﻻزم 92 عشان نص انجيكشن بالنسبة للبونتو مجربتهاش وفى حاجة تتفوق فيها الاونو على الباقين هي سرعة البيع وماسكة سعر كويس خﻻصة كل ده من تجربتي للاتنين دور ع الحالة ومش حتندم

**morooo89** · 30-08-2015 01:10 AM

انا معايا برده اونو 2002 ومش مزعلاني جميله
المهم بس الحاله مكنش خلي الفلوس معاك احسن

**rashad91** · 30-08-2015 08:00 PM

شكرا يا جماعه على المعلومات دى .. فى بس نقطه مش فاهمها ..

ايه النص انجكشن ده ؟ و هل الاونو كله كده حتى الموديلات القديمه 93 و 94 ؟ و لا القديم كربيراتير ؟

**morooo89** · 30-08-2015 11:13 PM

لا القديم كاربراتير مش فاكر لحد موديل كام
بعد كده هاف انجكشن فيها كمبيوتر كنترول .. وحساسات علي البوابه كده
مميزات الانجكشن : استهلاك البنزين والسحب لصالح الانجكشن

الكارب افضل من ناحيه ااعطال بلنسبه للصناعييه وبالصاحبها