الموضوع: كوميديا الجمارك فى مصر

المشاركة الأصلية كتبت بواسطة أشرف فتحى

كوميديا الجمارك المصريه والقرارات الحكيمه
عاوز تضحك..
اليومين اللى فاتوا الشغل عطلان وغرامات وارضيات بالكوم ومستوردين حلفوا بالطلاق ما هيشتغلوا فمصر تانى ...
أل ايه يا خويا المخابرات الحربيه خاطبت الجمارك بعرض كل ما هو سائل او بودر على مصلحه الكيمياء للتحليل..ليه بقى...قلك عشان نمنع دخول المواد الداخله فى صناعه المتفجرات....الله يا سيدى..ما ابدعك...هو محدش من الناس دى عنده معلومه ان المتفجرات دى مركبات...مش ماده صريحه...طب لو فى ماده لا تستخدم الا فى صناعه المتفجرات...هيستوردها مصنع شيكولاته ولبان؟

مش عاوز تضحك اكتر....لغايه النهارده كان القرار ده بيخلينى على الرغم من انى سبق وسحبت عينات واتحللت فى معامل وزاره الصحه وهيئه الرقابه على الصادرات والواردات ابعت برضو عينه لمصلحه الكيمياء وادفع عليها 1500 جنيه واستنى اسبوعين على نتيجه التحليل...لكن الحمد لله الموضوع فك شويه النهارده وبقى تحليل واحد بس..يا مصلحه الكيمياء يا معامل الصحه.....

عاوز تسخسخ بقى..فاكر حادثه التسرب الاشعاعى بتاعه اليابان؟
ايوه اللى كانت من اربع خمس سنين دى نزل ساعتها قرار بعرض كل ما هو من منشأ يابانى على هيئه الطاقه الذريه...عشان تفحص التعرض الاشعاعى للوارد... طب ومالو......ادفع الحواله ب 550 جنيه..واستنى تانى يوم لما يجى المندوب بجهاز الفحص ويلف حوالين الطرد واخر اليوم اخد افراج اشعاعى....طب لو انا جايب قطع غيار من المانيا أو أمريكا او اى بلد بس فيها حاجه وليكن بطاريه او شاشه منشأها الاصلى اليابان....الشحنه كلها تقف وتعطل يوم كامل عشان البطاريه دى تتفحص اشعاع....على اساس ان احنا هنعرف اللى ما شافوهوش فى البلاد دى .......
طب فين المشكله ما الناس بتحافظ علينا وعلى صحتنا اهو...
حضرتك الموضوع ده من 5 سنين تقريبا واليابان نفسها اعتبرت منطقه التسريب الناتجه عن الزلزال منطقه أمنه..واحنا لسه لغايه دلوقت بنوقف كونتينر اربعين قدم او شحنه اطنان عشان فيها مع المكن شاشه من منشأ اليابان علما اننا اصلا مستوردين المكن من فرنسا ..

هتقع من طولك بقى لما أقولك...
لو حاجتك جايه من الهند بتعرض مخدرات....
يا نهار اسود...أيه عرض المخدرات ده؟
حضرتك بتاخد مستندات الشحنه وتطلع على المطار وتدخل مكتب شرطه يدور فى كشف قدامه فى اسامى شركات ..انت مش فيهم ...امضا واتكل على الله...

امسك نفسك بقى فى اللى جى..
انت جايب قشاره سلك او سكينه أكل أو برواز تذكارى فيه خنجر او سيف انتيكه عشان تعلقه كتحفه او انتيك فى البيت او اى ما يمكن استخدامه كسلاح او يعرف فى المستندات بسكين.
هتعرض امن عام ومش هتطلع....

اللى جايه دى جديده...
لو جايب برنتر او اى حاجه بتطبع ولو ماكينه الكاشير او بتاعه الصيديليه اللى بتطلع لك الامبلغ او الريسيبت..لو بتطبع الوان حضرتك هتطلع على مجمع التحرير تاخد موافقه اداره التزييف والتذوير..ولو بتطبع ابيض واسود تاخد موافقه الامن الوطنى اللى هو امن الدوله سابقا..

كفايه كده عشان مش حاسس بجنبى الشمال ورجليا بتنمل....

احنا دولة متقدمة جداً ... طبيعي العالم يتآمر علينا بالمنظر ده

بلد 7000 سنة حجارة ... قصدي حضارة

المشاركة الأصلية كتبت بواسطة أشرف فتحى

لأ هو الواضح ان حضرتك مفهمتش ردى......عيد قراءه التعليق تانى......
لكن برضو ممكن اكون مش فاهم قصدك...
ممكن تفهمنى ايه فايده تهريب الدولارات والدهب؟
يعنى المهرب ده هيبعهم فى البلد اللى هيهرب لها الدهب والدولارات دى ويكسب فيهم؟
أرد بدالك...
أمال الاخبار اللى انا مشيرها دى ايه؟
هقولك بص يا راجل يا طيب
فى الثمانينات كان فى قيود على سعر الدولار يعنى الدولار محدد بسعر البنك المركزى لا يزيد ولا ينقص...فبالتالى كان حضرتك الدولار ب 2.20 جنيه وده أقل من قيمته الحقيقيه أما الجنيه فى الواقع بس كنا بنعوض عجز ميزان المدفوعات بالدين الداخلى فى صوره سندات واذون خزانه ودين خارجى فى صوره قروض بفوائد من البنك الدولى او دول صديقه..
طيب معنى ده أيه...
الدولار سعره ارتفع لما صدر قرار بتعويم الجنيه....فتحول من 2.2 ل 4.8 جنيه بمجرد تعويمه لدرجه ان سعر العمله اللى كنا بنعتمده فى الجمارك شهريا يعنى سعر العمله ثابت فى حساب القيمه للأغراض الجمركيه وبينزل بيها منشور كل شهر...إتحول لمنشور يومى بسعر العمله بتاريخ اليوم...وحتى الأن ما زال سعر العمله بيتغير يوميا طبقا لسعر السوق والعرض والطلب...
طب المهرب كان بيكسب ايه؟
شايف الفرق بين ال 2.2 وال 4.8 ده كان بيستفيد بيه ويضربه فجيبه عشان كده كان فى حاجه اسمها تاجر عمله وكان غير مصرح ببيع العملات الاجنبيه خارج البنك...وكان تاجر العمله ده بيشترى منك الدولار بزياده قرش او اتنين وكانت تجاره العملات تجاره غير قانونيه...ولا كان فى مكاتب صرافه ولا شركات تحويل اموال ..
عارف زى أيه...
السولار عندنا فى مصر مدعم....يعنى العربيات بتفول على لتر السولار بأقل من قيمته الحقيقيه لو سعر الوقود إتعوم زى الدولار...نقوم احنا نعمل ايه...كل تريلا غير مصريه داخله من حدود مصر وليكن من نويبع مثلا بيدفع 106 دولار ضريبه سولار...عشان هيفول تانك عربيته بسولار مدعم او فى قيود على سعره...عشان نعوض فرق الدعم ده من غير المصريين...

يا ترى حضرتك فهمتنى ولا لسه كلامى غامض...؟

وبما انى معرفش حضرتك شخصيا ومش شايف تعابير وجه حضرتك ومعنديش فكره عن سنك...هفترض سلامه النيه فى كلامك بما اننا كلنا هنا إخوات وبنحاول نفيد بعض...لكن عشان خاطرى...حط فى اعتبارك ان اللى بيكلمك ممكن يكون فاهم بيتكلم عن أيه لكن حضرتك المعلومه مش وصلالك...ولما تقولى ان مجال شغلى ملوش علاقه بالجمارك...لما اقبلك فى مقابله لنايل موتورز نبقى نتعرف وتعرف شغلى وبقالى كام سنه فيه...!!

يا بيه ايه حكاية تعويم الجنية اللي حضرتك ماسكلي فيها
تعويم الجنية دا حصلت زمان انما دلوقت الدولار مش دا سعره الحقيقي
عايز تفهم ايه فايدة تهريب الدولار والدهب تقدر حضرتك تقري وتطلع بما انك كل اخبارك عن الدولار انقطعت من بعد خبر تعويم الجنية من سنين
مع احترامي لمهنتك ولكن معلوماتك الاقتصادية ناقصة كتير
الجميع يعلم ان سعر الدولار الان في البنوك او حتي في الصرافة ليس هو السعر الحقيقي للدولار , دي ابسط معلومة يعرفها اي واحد شغال من قريب او من بعيد في مجال التجارة المرتبطة بالدولار
ومعني ان الدولار مش دا سعره الحقيقي , ان الجنية مش متعوم زي ما حضرتك واصلك
اخيرا المعلومات ملهاش دعوة بالسن , وكمان مش معني ان حضرتك موظف في شركة خاصة انك تعرف كل شئ عن الجمارك حتي شغلة المفتش الجمركي
انا حطيت امثلة علي كلامي وعلي عمليات القبض علي مهربين عملة , سياتك بقي كنت بتنكر دا وحتي في مشاركتك دي كمان متغرب هو اللي حيهرب عملة ولا دهب حيستفاد ايه , علي اي اساس بتجيب كلامك , مينفعش تبقي حضرتك شغال مخلص في شركة خاصة وتيجي تقلي معلومات مش اختصاصك لمجرد انك تعمل في مجال الجمارك .
انا معاك اننا كلنا هنا اخوات وبنحاول نفيد بعض , انما مينفعش تكتب معلومات غلط بعيدة عن وظيفتك الاساسية لمجرد انها ليها علاقة بشغلك , في فرق انك تبقي موظف في التفتيش الجمركي وبين انك مخلص جمركي تعمل في شركة خاصة .
متزعلش مني بس انا مبحبش اللي يتكلم في غير اختصاصه ويفتي خصوصا لما يكون بيكلمني عن حاجة انا دارسها كويس ومطلع عليها دايما

المشاركة الأصلية كتبت بواسطة أشرف فتحى

طب انا هحترمك وهقولك حضرتك مش هقولك يا بيه ويا راجل يا طيب ومش هكلمك بطريقتك..
حضرتك برضو بما انى راجل غير متخصص ومعلوماتى غلط. وبفتى ووقفت عند ثوره 19 وماسكلك فى تعويم الجنيه وراجل بتكلم فى غير مجالى ومجبتش لحضرتك امثله وشرح بالارقام ومقلتش لك أقرا اللينكات بتاعه صفحه الحوادث..
فهمنى باراحه كده بحكم خبرتك وتخصصك ودراستك اللى برضو ما اعرفهاش....ازاى ؟
وخلى بالك...انا عايز افهم عشان ما اكتبش معلومه غلط ....

انا مش مدرس خصوصي يا استاذ اشرف
لو حضرتك فعلا حابب تفهم
روح اسأل اي حد شغال في الصرافة هو ليه اي بنك دلوقت بيدي العملاء الدولار ورق عشرينات بدل الورق ابو 100 .
اخبار الحوادث اللي مش عجباك دي , دي دليل علي كلامي , اللي لسه بقوله واللي حضرتك مصمم تنكره ومستغرب هي الناس حتهرب الدولار ليه !!!
معلش مش معقولة حصدق حضرتك وسياتك مجرد موظف في شركة خاصة تعمل مجال الجمارك واكذب الورق ابو عشرين دولار اللي مغرق السوق واخبار الحوادث اللي كل يوم بتمسك مهرب عملة .
حضرتك زعلان من طربقتي , لا سيدي كلمني بيها بس متفتيش لو سمحت