الموضوع: اويل سيل الكرنك :"(

الأويلسيل Oil Seal بشكل عام هو القطعة الكاوتش اللي بتتحط حوالين أي عمود بيدور علشان يمنع الزيت من التسريب أثناء دوران العمود..



فيه منه أنواع كتير وأشكال ومقاسات حسب الاستخدام المطلوب...




تكلفته تعتمد بردو على الاستخدام.. من أول 5 جنيه لحد 500 جنيه (ده بشكل عام... مش شرط في العربيات)..


أويل سيل الكرنك هو أويل سيل عادي بس بيستحمل الحرارة العالية والدوران العالي... فيه منه اتنين في الموتور .. . واحد بيبقى موجود على عمود الكرنك ورا الطارة الرئيسية اللي تحت (بتاعت السير الرئيسي).. والتاني على نفس العمود بس من الناحية التانية ناحية الفتيس ورا الحدافة..




علشان تغير الأويل سيل الأمامي اللي ناحية السير .. لازم الطارة تتشال مع السير طبعا مع أي جزء بيعوق الحركة زي الدينامو وكمبريسور التكييف ...
بس المشكلة إن المنطقة هتبقى مزنوقة خصوصا إن الجزء ده قريب جدا من الفخدة (عند قربة المية اللي في الصورة).. فاحتمال فعلا الموتور يكون عايز يتسقط ... بس غالبا مش هتبقى محتاج تسقط حاجة لو اتفضى مكان كفاية للصيانة.




إنما لو عايز تغير الأويلسيل الخلفي اللي ناحية الفتيس... فده فعلا لازم تسقطله الموتور علشان تغيره... لإنك لازم تحل الفتيس والحدافة علشان توصله.


طبعا... مراجعة مقاس الزيت لازم تتم كل أسبوع سواء كان الموتور بيسرب زيت أو لأ... وفي حالتك.. لازم تراجع على مستوى الزيت كل يوم وتزود الناقص... لحد ما تغير الأويل سيل.


للأسف .. مفيش حاجة تقدر تعرف بيها إذا كان فيه حاجة حصلت في الموتور ولا لأ إلا إذا فتحنا الموتور وشفنا إيه الأضرار اللي حصلت (ده لو كان حاجة حصلت)... فخلي الأمور كده وربنا يسهلك إن شاء الله..


بس إوعى تطنش موضوع الزيت ده نهائي... لإن الزيت هو روح الموتور.


...