الموضوع: لو لقيت عربية ملاكى شغالة تاكسى تركبها؟؟؟؟؟؟

أنا مستغرب قوي من نتيجة الإستطلاع:k20:
لغاية دلوقتي 42.25% موافقين و بيقولوا عادي

كده الواحد يفكر بقى يقلبها تاكسي بعد الضهر !!

المشاركة الأصلية كتبت بواسطة yasserwin

انا لسا من شوية فى عباس العقاد شايف ماتريكس ملاكى وحاطط عليها من فوق اللمبة بتاعت التاكسى ومشغلها

على فكرة انا برضوا شفتها في الشيراتون
كانت ماتريكس لونها اسود ملاكي وحاطط اللمبة دي
انا وقتها استغربت وقولت ده ملاكي وعاملها تاكسي
ولا منظر بس !!!!!!!

عادي وكلها أرزاق وعملتها كذا مره قبل كده وممكن بيقبلوا اجره اقل من السرفيس العادي

بس لو بنات يفضل يكونوا مجموعه ومش بنت لوحدها

الموضوع ده عادي جدا ً يا جماعة وأكيد معظمنا اتعرضلوا قبل كده

لكن أنا بقى أعرف حاجة أجدد كتير من موضوع الملاكي دي

واحد صاحبي بيحكيلي إنه واقف الساعة 1 بالليل مستني تاكسي لقى واحد بموتسيكل صيني من إياهم بيقله رايح فين يا كابتن ، قاله رايح كذا ، قاله طب تحب أوصلك ، الي يغيظ بقى إن صاحبي وافق وركب معاه واداله في الآخر اتنين جنيه وهو نفس السعر الي كان هيدفعه للتاكسي

واحد تاني قالي بردوا ع الموضوع ده حصل معاه بس موافقش طبعا ً

يعني الملاكي ممكن تكون أمان شوية لكن متوصلش لدرجة "مكنة صيني"

المشاركة الأصلية كتبت بواسطة GMakram

مستحيل طبعا اركب ملاكى على انه تاكسى لسببين اولا وده الاهم ان سائق الملاكى ده بيتحايل على البلد والقانون وبيأخد رزق مش بتاعه وده حرام ثانيا محدش يضمن فعلا هو ممكن يعمل ايه وانا راكب معاه.بلادنا حطه مواصفات للسياره الاجره لازم نحترمها علشان نقدر نأخد حقوقنا وبعدين يعنى هيا زنقت ده الشوارع غرقانه تاكسيات مش لاقيه اللى يركبها معادا عند سيتى ستارز :)

اولا يا باشا سائق الملاكى بيتحايل على البلد هو انت شايف فيه عدالة توزيع فى البلد عشان تقول كده و الناس اللى مش لاقية شغل دى كلها يبقى لما واحد يفكر فى اى حاجة يبقى من حقه و لا ياكل عياله
و بياخد رزق مش بتاعه ما حدش بياخد رزق مش بتاعه لانه ما دام خده يبقى ربنا كاتبهوله
يعنى ايه مواصفات السيارة الاجرة؟؟؟؟؟؟؟؟؟؟؟؟؟؟؟
و ايه هى الحقوق اللى بتاخدها لما بتركب سيارة اجرة و البلد بتضمنهالك يكونش بشغل العداد مثلا
و بعدين ياباشا انت بتقول ان مفيش ناكس عند سيتى ستارز و بما انك من رواد سيتى ستارز يبقى اكيد مش حاسس باى حاجة من اللى حاسس بيها الراجل اللى مشغل عربيته تاكس

انا مش بدافع عن الموضوع ده انما انا بنقد نقدك ليه و كمان بدافع عن حق الناس المشروع فى لقمة العيش و لازم قبل ما تمنع اى واحد من شغلة شريفة تفكرله فى البديل اللى يعيش منه , اذا كان هو دماغه ما وصلتوش لابعد من كده فده مش غلطته دى غلطة البلد كلها اللى مجوعة بعض عيالها و منغنغة البعض الاخر