الموضوع: تجربتى فى اجراء منظار للقاولون + محتاج راى دكتور او حد لة تجربة مع الام المعدة

السلام عليكم
كنت طبعا عامل موضوع قبل كدا انى هعمل منظار للقاولون وكنت خايف من النتيجة ومن المنظار ذات نفسة

ودا كان لينك الموضوع
http://www.nilemotors.net/Nile/476193-a.html
.. يوم الاتنين الصبح روحت المستشفى ادوانى الحاجات الى هشربها علشان تعمل اسهال لتنظيف القاولون قبل يوم الثلاثاء يوم اجراء المنظار

كنت فاكر ان المشكلة هيا المنظار اتضح انى يوم الاتنين هيبقا من اسوء ايام حياتى . المستحضر الى بيعمل اسهال عبارة عن اربع اكياس بيتحط كل كيسين على لتر مين ويتشرب قبل المنظار ب 12 ساعة اول لتر وتانى لتر قبل المنظار ب 6 ساعات

شربت اول لتر من هنا عصر يوم الاتنين وساعتين بالظبط غير معاناة الاسهال.. ترجيع فظيع وحرقان اكنى شارب ماية ناااار بمعنى الكلمة اقسم بالله كان من اسوء ايام حياتى كنت بخبط دماغى فى الحيطة من النار وممنوع طبعا اخد اى علاجات امنع الحرقان

فضلت مستمر على كدا لحد الساعة 2 بليل ربنا كرمنى من عندة ونمت شوية صحيت الفجر اخد الجرعة التانية

خت كوبيتين وكنت كويس خت الكوباية التالتة اصابنى قيئ شديد واشتغل الموال من الاول وفضلت فى العذاب دا لحد مرحت المستشفى

دخلت حكيت للدكتور بتاع المنظار انى مختش ال 2 لتر كاملين قلى انتا كدا مش متحضر كويس قولتلة متحضر مش متحضر لازم اعمل المنظار مهو مش بعد العذاب دا معملوش . وسئلتة هل طبيعى ان يحصلى كدا من التحضير . قلى لا المفروض لا يبقا فى حرقان او قيئ فقط اسهال . قولتلة امال لية حصلى كدا مسعمتش الاجابة لان فى اللحظة دى كنت خت البنج

عملت المنظار ومحستش باى الم اطلاااااااااااافا بالعكس احساس البنج كان حلو اوى

وانتظرت ساعة لحد التقرير مطلع ودى صورة لتقرير (علشان لو دكتور هنا بص علية )




. ها يا دكتور طمنى نفسى ارتاج واعرف بس سبب التعب الى انا فية ..قلى القاولون سليم جداااا (ملحوظة دا دكتور مناظير فقط الى بيعمل المنظار ويطلع التقرير للدكتور الى هتعالج عندة)



كان معاد بقا الدكتور الى هكشف عندة وهيشوف التقرير اسمة مدحت خليل فى مستشفى الشروق بالمهندسين ( دكتور مشهور ولية برنامج اسمة العيادة على قناة الحياة) كان المعاد لسة فضلة شوية


فضلت دماغى تودى وتجيب طيب دلوقتى بالعقل كدا مفيش حاجة فى القاولون اية الى يخلينى بقالى اكتر من سنة ونص خمول وكسل وضعف عام طول اليوم و كل يوم الصبح اول مصحى تكريع جامد وغزات الم فى البطن شديد حوالين السرة مع اسهال ودخول الحمام اكتر من 6 مرات واسهال وكل دا اول مصحى من النوم فقط لحد الدهر وبعد كدا الالم يختفى الا فى حالة انى شربت بيبسى ولا نسكفاية ولا اكلة تقييلة تجيلى سعتها نفس الاعراض ما المفروض كل دا من القاولون وكمان لو الاكل فى شوية توابل يجيلى حرقان على الصدر الصبح

لانى فى الكشف اول مرة عند دكتور مدحت وحكتلة ان عامل منظار معدة قبل كدا والعينة بتقول ان فى بكترية الحلزونية . رد وقلى البكتريا دى بيضحكو بيها الناس وموجودة عند كل الناس اصلا ومش من اعراضها انها تعمل اسهال ومغص هيا بتعمل حموضة بس ..

وفضلت افكر امال انا عندى اية . ما بين فرحتى ان مفيش حاجة خطيرة فى القاولون لحيرتى فى سبب تعبى المستمر جية دورى ودخلت للدكتور

هيا يا دكتور مدحت قلى القاولون زى الفل .. قولتلة تمام المفروض بقا اعمل اية علشان امنع مغص الصبح الى بيجيلى والاسهال انا تعبببببت لقيتة بيقلى لازم تكشف نفسانى

جالى ذهول . نفسانى اية يا دكتور بقلك اسهال ومغص مال دا بالنفسانى هو اى تعم انا حالتى النفسية زفت بس بسبب التعب الى انا فية وشغلى الى متعطل ومعرفة كل الناس انى شخص مريض وكل شوية حد من صحابى يتريق عم الميت اهو وتعب اهلى بسببى كل دا تعب نفسيتى

يعنى التعب اصلا هو الى عملى نفسية وحشة مش العكس

قلى بردة لازم تكشف نفسانى العلاج النفسانى هو الى هيريحك وقلى هكتبلك على نوع علاج واحد بس اسمة بانتلوك 40 تاخدة 6 شهور

حجزت فعلا فى المستشفى عند دكتور نفسانى هو رشحهولى اسمة ممتاز عبد الوهاب المفروض هروحلة النهردة


بعد الرغى الكتتييييييييييييير دا هل يعقل كلام الدكتور دا ؟؟؟؟؟ ان يكون عندة مشكلة نفسية انا مش عرفها مخليانى اقوم الصبح كل يوم تعبان كدا ؟؟

ياريت الى لية تجربة شبيها بيا او يعرف حد كان بيشتكى من معدتة وخف يعرفنى واسف على طول الموضوع بس كنت محتاج من التعب افضفض