السلام عليكم أخوكم أحمد حازم مالك سعيد لسيريون ٢٠٠٨ ١٣٠٠ س س أتوماتيك ودي أول مشاركة لي ومحتاج مساعدتكم عشان السيريون أول مرة من ساعة مجبتها تحطني في موقف سخيف لكن كتر خيرها الصراحة حمالة أقصيه.

المهم العربية من فترة التكييف بقه تعبان صوت الموتور بيعلى والتكييف مش بيصقع في الزحمة وسحب العربية بيبقى تعبان على ال rpm الواطي تعلى عن ٢٥٠٠ معندكش مشاكل.

أنا معجنيش الموضوع ده عشان بحب أحافظ على حاجتي رحت بيها للتوكيل خلتهم يعملولي أكبر صيانة وقولتلهم على موضوع الصوت والتكييف.

دفعت ٢٠٠٠ جنيه زي الباشا وتقالي إنك محتاج تغير كومبرسور وكلتش وسربنتينه. ماشي يا سيدي الحاجات دي بكام بقه؟ قالي ١٥٠٠٠ جنيه. لحظة إزبهلال امتدت لثواني وبعدين قلتله عظيم طب والصوت قالي لأ دي خشونة وجاب سيرت بللي وحاجات غريبة كده. شكرته وخرجت.

قلت طبعا مش هدفع الهبل اللي بيقوله وكده كده أنا مش محتاج التكييف قوي خصوصا إننا داخلين على شتا.

من يومين بقى ايه اللي حصل بقه؟ ماشي على الدائري ومشغل التكييف الصراحة لقيت الصوت اللي مش عاجبني ده علي قفلت التكييف الصوت خف لكن بردو عالي. المهم روحت وكان لازم أنزل تاني مشوار قريب الصوت كان عاليوالعربية أول مرة تنور اللمبة الحمراء بتاعت الحرارة. ركنت على جنب فتحت الكبوت لقيت كل حاجة مبلولة ملمسها ميه والعربية قعدت تنزل ميه كتير. روحت بعد ما هديت مروح تاتا تاتا طبعا. تاني يوم بصيت على مستوى الزيت لقيته كويس.

طبعا أنا مش هروح التوكيل لحسان يقولي عايز ٥٠٠٠٠ جنيه ولا حاجة.

محتاج من أهل الخبرة يكون إيه اللي حصل وأروح لمين.

دي أول مشاركة لي يا ريت متبخلوش عليا بأي معلومة مفيدة عشان أنا بجد حزين على العربية كل ما بشوفها الصبح وأنا نازل.