الموضوع: كده السيريون جابت وش سلندر ولا ايه

باذن الله خير اللى فهمته انك كنت ماشى بالعربيه سخنت منك فتحت الكبوت لقيت الدنيا مبلوله ميه قبل اى حاجه راجع مستوى الزيت افتح غطا الزيت وشوف عليه رغاوى بلون الطحينه من جوه افتح غطا الريداتير وراجع لون الطحينه زود ميه للاخر ودور الموتور وكمل ملو ميه للريداتير للاخر لاحظ هل العربيه سخنت بسرعه منك ولا طبيعى زود صوت الموتور ولا حظ حاجتين الاولى فيه فقاقيع هوا بتظهر على سطح ميه الريداتير ثانياهل فيه تسريب ميه من الريداتير او الخراطيم والوصلات لدوره التبريد راجع حركه دران وفصل المروحه لو كهرباء او سير المروحه مشدود ولا مرخى او مقطوع اخر حاجه شوف هل العربيه بتجيب ميه من الشكمان مع نقص مستوى الميه فى الريداتير وسخونه اعلى من الطبيعى لو كله تمام يبقى اطمن محصلش حاجه

ممكن يكون طرطشة المياه المتسربة ادت لقفله كهربائية اوقفت مروحة تبريد الراديتير
او نسربت المياه فنقصت الى حد كبير فارتفعت حرارة العربية
المهم تعرف التسريب ده منين

أشكركم واحد واحد على الردود السريعة والمفيدة. النهاردة كلمت ميكانيكي وحكتله اللي حصل بالتفصيل الممل هو طمني وقالي إنه بنسبة كبيرة هتكون طرمبة الميه. هيجي يشوفها اليومين الجايين وهعرفكوا بإذن الله اللي هيحصل.

المضحك بقه إن أنا طبيب يعني متعود إن الناس تجيلي وتحكيلي على الشكوى ويردوا على أسئلتي في ترتيب الأعراض وكده وهو ده بالضبط اللي أنا عملتوا وأنا بحكيلو كأني بتكلم عن عيان بالضبط. فكل الاحترام للي بيفهم في ميكانيكا السيارات وعلى الله يكون الميكانيكي اللي هيبص عليها واحد من الناس المحترمة اللي بتفهم دي.

ردودي البسيطة على قد فهمي الضحل في الميكانيكا. أولا المروحة شغالة تمام مفيش مشاكل، مفيش أي نوع من أنواع الطحينة في الحوض أو الزيت. حاجة مكسورة أو خرطوم مقطوع؟ معرفتش أشوف حاجة لكن غير مستبعد. الملاحظة الغريبة إن فتحت فلتر الهوا كانت بتطرطش ميه لما العربية كانت سخنة.

أنا حزين على عربيتي العيانة لكن إن شاء الله تقوم وتجري على الدائري أحلى من الأول كمان. وربنا يسلمكم وعربياتكم من أي مكروه.