الموضوع: استفسار بخصوص تغيير تيل و طنابير اماميه ماروتي

السلام عليكم و رحمة الله - معلش على قلة المشاركه معاكم و لكن ده مايمنعش اني لما بتزنق بجري على نايل موتورز على طول و ربنا يباركلنا فيكم - انا عربيتي ماروتي 2013 و كنت جايبها زيرو عامله حوالي 53 ألف كيلو يعني ما بستغناش عنها العيب الأخير اني لما بدوس فرامل العربيه بتترج جامد مع صوت صفير طبعا العيب ده ما ظهرش بالساهل بالعكس -ابسلوتلي- ده خد مني وقت و مجهود و فلوس للميكانيكي اللي جاب اجلها - المهم الموضوع ابتدى ان تيل الفرامل الاصلي اتاكل و لما سألت "الفتايين" قالولي روح رجلش الفرامل رجلشتها و مشيت لحد ما جاب آخره و سمعت حكه وشميت ريحه من الفرامل قلت اغيره قالولي التايواني افضل نوع اشتريته ب65جنيه و ركبته و من ساعتها و الصفاره كانت بتصحي الجيران من النوم و انا راجع بالعربيه فبناء عليه قررت اغير التيل جبت تيل صيني ابو 37 جنيه الصوت راح حوالي اسبوع و رجع تاني قلت كده خلاص مش عيب تيل اكيد الطنابير فيها حاجه فسألت الميكانيكي قاللي نفكهم و نخرطهم فعلا لما فكناهم و حطناهم ع المخرطه لاقينا فيهم اعوجاج جامد المهم عملناهم و تمام و ركبت التيل التايواني و الطنابير المخروطه و العربيه مشيت لوز العنب حوالي اسبوع و العفاريت ركبتها تاني و من ساعتها كان اهتزاز خفيف لحد حاليا ما بقت رجه جامده و تحس انك راكب عجله حربيه -ملحوظه انا كنت عملت كروس للعجل من حوالي 20 الف كيلو يعني غيرت الأماميين خلفيين مع عكس اليمين شمال - السؤال الآن هل اخرط الطنابير تاني و لو اني مش مستريح للقصه دي ولا اشتري نوع ايه طنابير جداد و تيل جديد عشان موضوع الفرامل حضراتكم عارفين انه حياه او موت - و لكم وافر الشكر ----

صحيح حبيت أضيف احضرتك معلومة. التيل في الماروتي ٣ أنواع: الأصلي أو اللي في جودة الأصلي و ده ناشف و ليه ميزة و عيب. الميزة انه بيمسك في الطنبورة مرة واحدة و بيخلي الفرامل ممتازة (جودة الفرملة من ناحية التباطؤ الفوري). عيبه انه بياكل الطنبورة حتي لو جديدة و أصلية

نوع وسط ة ده فيه منه صيني و تايواني و هوه زي الأصلي في إن حدوته المعدن اللي اللحمة بتاعة التيل محطوطة عليها مصبوبة حديد صلب و ناشفة. متين يعني. يتميز لحمه بإنه أنعم شوية من الأصلي و حنين علي الطنابير و في نفس الوقت فرملته جيدة جدا مش ممتازة. بالمختصر ممكن الاعتماد عليه و تقدير مسافة الفرملة معاه و بيخدم كويس جدا في المواقف المفاجئة.

النوع الأخير صيني ردئ جدا حدوته المعدن مش حديد صلب و ساعات بتكون انتيمون و عليها طبقة خارجية من مادة مطاطة بتسيح مع الفرامل و بتخلي مسكة هيدروليك الفرامل فيه عاملة زي اللي بيدوس علي حتة جبنة او صابونة مرة تمسك كويس و عشرة لأ. و اللحمة بتاعته ناعمة جدا و حنينة أوي علي الطنابير و ده بيخللي الفرملة بتاعته "بالنصيب" يعني تضرب الفرملة و تدعي يا رب أقف قبل ما ألبس في اللي قدامي. النوع ده خسارة فيه الفلوس