الموضوع: صدمت طفل صغير النهاردة

الحمد لله جت سليمة
انت ايه اللي بيحصلك اليومين دول
رخصتك اتسحبت و صدمت ولد!!
معلش كله تكفير ذنوب ان شاء الله

الحمد لله انها جت علي اد كده i

المشاركة الأصلية كتبت بواسطة karim_monir

النهادرة كان يوم من اصعب ايام حياتي
بعد ما صليت الجمعة وماشي من حداق القبة ومعي زوجتي واطفالي وامام مسجد الشيخ غراب طلعلي عيل حوالي 7 سنين من تحت الارض وانا كنت ماشي 40 او 50 كم بالكتير قوي لاني كنت لسع على الغيار التاني
ضربت فرامل جامد الا اني خبطت الولد خبطة جامدة رفعتة حوالي مترين لفوق ونزل اتهبد على الكبوت ومنه للارض بعد ما كنت توقفت تماما
نزلت وانا رجليا مش شايللاني والناس كتير منهم تركوا صلاة الجمعة وخرجوا
منها حتى الامام خلص الصلاة بسرعة والحمد لله ان كان فيه عربية اسعاف من الجديدة متمركزة امام باب المسجد
طبعا الشعب المصر ابو الفتي كله اللي بيقوم الولد واللي بيشربه ميه وانا في حالة رعب انهم يزودو الاصابة لو موجودة خاصة لو كانت كسر ضلوع او حوض او نزيف داخلي
اتعصبت عليهم وخدت الولد من ايدهم وسبته نايم في الارض وكان بيكلمني والاسعاف عدت الشارع بسرعة وجم نقلوة وانا وراهم على مستشفى جراحات اليوم الواحد بشارع السواح وسط بكاء هستيري من اطفالي وغباوة سائقين الميكروباص حتى في احلك المواقف
دقائق بتمر وكانها شهور والولد بيعمل اشعة مقطعية ورنين وسونار واكس راي وجميع الفحوصات
والولد بيكلمني ويديني تليفون ابوة وكلمتة يجي يشوف ابنه بس مابلغتوش انها حادثة احسن يعمل حادثة هو كمان من رعبه على ابنه
الحمد لله النتائج كلها سليمة واللي ساعد على نجاة الطفل من الصدمة رغم شدتها فضل الله اولا وان الخبطة كانت في ضهرة وفي نفس الاتجاه اللي بيجري في مش عكسه ورغم ان الكبوت والاكصدام عندي اتبهدلو الا ان الولد بخير والحمد لله وده المهم وفي ستين داهية الحديد
بس الشعب المصري بقي والفهلوة اللي بتحصل في المستشفى
بين مويدين لتحرير محضر بالقسم وتليه قضية طبعا حتى لو انا مش غلطان ابقو قابلوني على البهدلة اللي هاشوفها
وبين راي تاني اني ادفع فلوس الفحوصات بالكامل (وده اللي حصل) رغم قرار وزير الصحة المعلق في واجهة المستشفى ان اي حادثة سير تعالج على حساب المستشفى بالكامل في اول 24 ساعة مهما كانت التكاليف
نقول ايه في بلدنا بقي
الحمد لله وربنا ما يوري اي شخص موقف زي ده
واعذروني لقلة تواجدي اليومين الجايين لان اعصابي تعبانة بالفعل
وشكر خاص لكل اللي تكرم ووقف جنبي بالموقف بدون ذكر اسماء ولكل من اتصل او دعا لي بانتهاء الموقف على خير
اخوكم كريم منير

يا سبحان الله
ديه منطقتى الي كنت ساكن فيها قبل ما اتجوز وحصلت معايا نفس الحادثة في نفس المكان بالملى بس كانت بنت واقفة مستنية الناس تخلص صلاة الجمعة عشان تتسول من الناس وخبطها وجبتها فوق الكبوت ونزلت على الأرض وقامت خدت في وشها وجريت قمت نزلت انده عليها والناس ندهو عليها ولا عبرت حد وفي الأخر مشيت بس سبحان الله نفس المكان والحادثة