الموضوع: تجربتى مع الرجيم

السلام عليكم .
طبعا الموضوع ده تكملة لموضوع ارتجاع المرئ اللى حكيته قبل كده


انا كان وزنى حوالى 97 (طولى 176 ) وكان ليا كرش طبعا وطبعا مش هقولقوا بقى على التعب لما امشى ولما اجى اوطى اربط الشوز دا غير لما اجى اشترى لبس مالاقيش مقاسى وكده .
بعد اللى حصلى وشوفت الموت بعنيه ( وليس المُخبَر كالمعاين) حصل انى بقيت خايف اكل ومشيت على التعليمات بالضبط
- افطر الصبح على الساعة 10 حوالى نص رغيف او رغيف صغير ويكون بلدى (انسى الفينو والشامى) مع حوالى 4 او 5 معالق فول بدون زيت ولا ملح ( الحقيقة ساعات باحط نقطة زيت زتون او حار) مع بيضه مسلوقة وممكن حتة جبنة منزوع الدسم واهم حاجة الخياااار والجرجير ( لازم خضراوات ) وممكن نص كوباية شاى خفييييف بدوووون سكر

- الغدا بيبقى لحم من غير دهن او (فراخ منزوعة الجلد ) وفى يوم بيبقى سمكة مشوية مع خضار مش مسبك والاحسن سوتيه مع 3 او 4 معالق رز دا بيكون الساعة 7 تقريبا وانسى بعد كده محطش حاجة فى بقى ممكن ثمرة جوافة او موزة صغيرة لو الجوع قرصنى ( طبعا مش هقولقو على قرص الجوع والمعاناة دى )

تقريبا دا بقى اكلى لمدة 4 شهور نسيت كل اللى كنت باكله قبل كده ( المكرونات والبيتزا والمحاشى والمنبار والحاجة الساقعة وحتى العصائر المعلبة لانها كلها مواد حافظة والبسبوسة وكل الحلويات وحتى المخلل ( كنت بموت فيه )
وبعد 3شهور نزلت لحوالى 76 كيلو تخيلوا والحمد لله مبسوط انى عديت المرحلة دى
طب ايه المزايا والعيوب
اولا العيوب
-بتظطر احيان كتير تاكل لوحدك عشان متشوفش اللى جنبك بياكل ايه
- بتحتاج شوية عزيمة محترمة هتلاقى بقى الزوجة بتتحايل عليك تاكل واللى يقولك دا انت كده بقيت كويس
- بتحس انك دخلت فى مرحلة جديدة فى حياتك دا لو انت كبير فى السن شوية يعنى بتحس انك خلاص كبرت وعجزت لانك مش قادر تاكل اللى كنت بتاكله وانت شاب
- لما حد بيشوفك ويكون بقاله فترة ماشفاكش بيتخض ويسألك فى ايه او يكتم قلقه فى نفسه ويسأل اصحابك بعد كده عامة الكل بيفتكرك عيان ويبقى متوجس لدرجة ان انا احيانا صدقت انى عيان
- بيحصلك فى الاول حالة ضعف عام وخموووول شديد على ماجسمك يتعود

من فوائد نقص الوزن
- طبعا لما تخس طبيعى بتوفر فلوس كتير لان واحد قريبى راح عمل تدبيس معدة صرف حوالى 40000 ج دا غير المخاطرة
- بعد فترة جسمك بيتعود وبتلاقى نفسك خفيف كده وطاير من على الارض
- بتبتدى تحب المشى والخروج
- طبعا بتلبس كل اللى انت عاوزه لانك بتلاقى مقاسك بسهولة ( انا اول مرة البس جينز من 20 سنة

بعد فترة كان لازم حسب نصيحة الاطباء لازم العب رياضة ههه تخيلوا قالك عشان تشد الجلد والترهلات .
فى الاول طنشت لكن بعد فترة لما لقيت منظرى مش هو ابتديت ابحث فى الموضوع
طبعا كان عندى مشاية كهربا عمرى ماستعملتها ابتديت امشى عليها وبعد شوية قالك روح جيم بصراحة اتحرجت اروح لكن جبت بعض الادوات اللى بتبقى فى الجيم وابتديت امارس رياضة فى البيت وطلع الموضوع جميل جدا . وادعوا لى اكمل ان شا الله

ايه العزيمه الجباره دة
دة انا 125 كيلو وطولى 175
وامل حياتى انزل ل 100 كيلو مش عارف