الموضوع: لماذا أقدم بنكا "الأهلى" و"مصر" على رفع الفائدة على شهادة الادخار لـ12,5%

المشاركة الأصلية كتبت بواسطة hobiko

سبحان الله انا كمان

على المنتدى ده ......... لما كان بناقش تهجيصة فرض ضريبه 400 جنيه على تذاكر السفر بالطيران

الناس كلها كانت داخله تقول ........... روحوا خدوا الفلوس من رجال الأعمال الحرامية

لما الحكومة بدأت تتعرض لهم و تضغط عليهم ....... مش صلاح دياب بس ...... لأ و محمود الجمال و 16 رجل اعمل تانيين و قبليهم رجل الأعمال أيمن الجميل فى قضية رشوة وزارة الزراعة و تحفظت على اموالهم

بقى الحكومة بتضرب الأستثمار و بتبهدل رجال الأعمال !!!!!!

نفس اللى حصل لما الحكومة فرضت ضريبة الأرباح الرأسمالية على البورصة .......... اتشتمت و اتهاجمت من طوب الأرض ...... بحجة برضه ضرب البورصة و تطفيش المستثمرين ....... لغاية لما الحكومة لغتها .......... اتشتمت برضه من هما هما نفس الناس :)

سيدي الفاضل
إذا كنا ننظر لمصلحة البلد فعلا فلابد من سياسة اقتصادية سليمة تساندها سياسة نقدية سليمة
السياسة الاقتصادية السليمة هي التي تهدف إلى تشجيع الاستثمار والانتاج السلعي والخدمي وليس تخويف رجال الاعمال ودفعهم دفعا لتهريب أموالهم وتصفية أعمالهم ، هذا يؤدي إلى زيادة الضغوط على الجنيه المصري ، ولن تفلح أي سياسة نقدية في إصلاح الوضع.

دعني أضرب لك مثالا بسيطا عن أضرار السياسة النقدية:
الناس فرحانة برفع سعر الفائدة على الجنيه ، هذه السياسة ترفع سعر الجنيه مؤقتا في الاجل القصير ، ولكنها ضد سياسة تشجيع الاستثمار والانفاق ، وسوف تؤدي إلى ركود الاقتصاد في الاجل الطويل حيث يتجه الناس الى الادخار في البنوك ، ويرفع تكلفة الاقتراض على المستثمرين

تحياتي

بالمناسبة لوم الأفراد دائمًا يدل على الفشل
يعني إيه الحكومة تاخد قرارات بناءً على شوية هلاسين
السيسي ناقصه مستشارين على درجة عالية من المهنية
دي الحقيقة
محدش يقولي الحكومة ..
كلنا عارفين إن السيسي اللي بيحرك كل حاجة وخصوصًا ملف رجال الأعمال
البلد كلها بتمر بفترة زي الزفت .. والسيسي عنده الشجاعة الكافية للضرب تحت الحزام
لكبار رجال الأعمال .. أمال الصغيرين هيعمل فيهم إيه !

ماهر بك
اول مرة اشوفك منفعل
نصيحه منى حاول تاخد راحه شويه لان واضح انك واقع تحت ضغط عصبي شديد
لان مش دي طبعتك

الاول اسمحلي انى اصحح نقطة الـ 10.000 دولار مش مقتصرة على الايداع فقط
لكن تشمل اي عمليه بنكيه سواء ايداع او سحب أو تحويل لازم بيتم الابلاغ عنها اتوماتيكيا من السيستم نفسه مش يدوي حتى

ثانيا لما نتكلم عن الدولار والجنيه لازم نحلل السوق الاول على ارض الواقع ونشوف الاطراف واحد واحد ومصلحته فين
صاحب شركة الصرافه او المتعامل في الدولار : من مصلحته ان يبقى في سوق سوده لان طول ما السعر عنده اغلى من البنك بأكتر من 3 قروش فده بيخلي الحركه تزيد
لكن لو الفرق بينه وبين البنك قرشين بس وقف حال له لان الي بيسحب دولار هيحولهم من البنك مصري اسهل بدل ما يخدهم دولارات ويروح يغيرهم من الصرافه مش مستاهله عشان قرشين

المستورد : مصلحته ان الدولار يغلى مش يهبط لان الدولار لو زاد 20 قرش هو هيزود من تمن السلعه 1 جنيه بحجة ارتفاع الدولار (وده كلنا شوفناه بعنينا الفترة الى فاتت)

المواطن العادي : لما اللاقى ان السعر فى البنك مثلا 8 جنيه وبرة 8.5 وانا معايا 10.000 دولار يعني فرق 5 الاف جنيه متقنعنيش اني اغيرهم فى البنك واخسر 5 الاف (حتى لو انا فاهم كلامك ده كويس اوي ومقتنع بيه)

لو بعدنا شويه وجينا نبص من بعيد هنلاقيها اشبه بدائرة كل ما الحركه فيها بتلف كل ما تزيد سرعه والدائرة توسع
عشان تحل لازم تكسر الدائرة دي من اضعف نقطه فيها تقدر عشان توقف التريند بدل ماهو تصاعدي وطالع زي الصاروخ تبدأ تقلل سرعته وتعكسه

فى سنه 2004 كان الوضع شبيه بالوضع الحالي مكنش فى دولارات فى البنوك وبره كان وصل لـ 8 وكل الناس بتقول هيوصل لـ 10 فى اسابيع او كام شهر بالكتير وأكيد حضرتك وكتير من الاعضاء فاكرين الايام دي كويس
فجأة الدولار ثبت وبدأ ينخفض
اللي كتير اوي من الناس متعرفوش فى الفترة دي تم القبض على اغلب اصحاب شركات الصرافة وتجار العمله اللي هما اساس السوق السوده
اهلهم ومعارفهم كان كل اللي عايزين يعرفوه هم فين بس ومعرفوش هم فين ( ده عن ناس اعرفهم شخصيا مش سمع من حد )
بعد كام اسبوع خرجوا وانتهت السوق السوده وبقى اقصى سعر للصرافه 3 قروش اعلى من البنك
بدأ الدولار ينزل وبعد ما الناس كانت بتتكالب على شراء الدولار بـ 8 قبل ما يغلى أكتر
بقت بتحاول تخلص منه بـ7 و كمان 6 قبل ما يرخص أكتر لان التريند اتعكس
كان في ديسمبر 2010 الدولار بـ 5 وكسور

نصيحه : متركزش مع حد لاننا فى مجتمع شرقي وكل واحد بيستميت انه ينصر رأيه واتجاهه حتى لو عارف ان الي بيعمله ده غلط عليه نفسه قبل ما يكون للبلد كلها فهيعمله برضوا حتى لو هيخسر عشان يبين انه اتجاهه ورأيه كان صح من الاول
روق شويه ومادختش اللى بيحصل على الاعصابك
حاول تفصل دماغك كام يوم عن أي حاجة
ولو ده صعب حاول تحدد كام موضوع متفكرش فيهم خالص لمدة كام يوم
لازم تقف مع نفسك شويه وتعرف انك بالطريقه دي محدش هينفعك لما تدمر نفسك وصحتك
انا عارف انك ممكن تتصور اني بطلب منك تبقى زي اغلب الشعب بياكل وينام وأخر حاجه بيفكر يعملها انه يشغل مخه لو حتى دقيقين في اليوم لحد ما مخهم صدى انا مقصدش كده ابدا لكن الوسط فى كل شيئ حلو
لانك المرحله الجايا بعد قلة النوم من التفكير هتلاقي نفسك الكام ساعه اللي انت المفروض نايمهم مخك شغال فيهم تقريبا بنفس الطاقه وانت صاحي والواقع حل محل الاحلام في النوم يعنى تقريبا مبقاش في راحه لمخك نهائي
لازم تقف مع نفسك
وتأكد ان ربنا موجود

أعتقد ان انخفاض الدولار النهاردة ب20 قرش دي مجرد حركة مؤقتة مصاحبة لظرف أستثنائي بسبب المزاد الأستثنائي اللي كان النهاردة, و دي حركة كان بيتخططلها بقالها فترة من أيام هشام رامز, يعني مهياش مفاجأة و مهياش مقياس لأي حاجة..