اسوأ تكييف في العالم تكييف الفلوانس فيس ليفت !!!!!!!!

**Mohamedgam** · 15-11-2015 01:10 PM

التكييف شحنه مظبوط تماما وكل الدايره سليمه بيعمل حركه غريبه جدا
الكومبرسور اول مايبتدي الهوا اللي خارج يسقع يروح فاصل ١٠ ثواني بالضبط يروح الهوا برودته تقل جدا واول ما يبدأ يسقع تاني يروح فاصل برضه ١٠ ثواني فبالتالي الهوا اللي خارج مابيلحقش يوصل للبروده العاليه فبالتالي الصالون مابيسقعش الموضوع ده ملحوظ جدا جدا لما بتبقي سرعه المروحه علي السرعه الاولي او الثانيه
السرعتين دول تقريبا تبريدهم معدوم حتي في جو الايام اللي احنا فيها دي دلوقتي
لدرجه ان انا كنت مسافر الغردقه مع العيال الصيف ده وكنت مشغل التكييف علي السرعه الرابعه ويادوبك كان الهوا نسمه لطيفه بس
رحت التوكيل اللي في القطاميه قاللي التكيف تمام
حد من الاصدقاء شار عليا اققفل مواسير السخن
بس انا باسأل هوه تكييف الفلوانس كده فعلا لان انا ركبت عربيات كتير ياباني وكوري والماني عمري ماشوفت تكييف ضعيف كده مع افتراض انه سليم طبعا
حد من الاعضاء ممكن يكون عنده حل او يرشدني لمكان كويس يكشف علي التكييف

**تامر.محمد** · 15-11-2015 01:47 PM

دي مشكلة واضحة مش سلوك عادي للتكييف (الصراحة العنوان ضللني و خلاني افتكرت الكلام على مشكلة عامة)

مفيش تكييف عربية بيعمل اللي حضرتك بتقول عليه و يبقى على 4 و نسمة لطيفة بس عموما

**محمد مجدي 22** · 15-11-2015 05:36 PM

انا فعلا سالت واحد قبل كدة و قالي نفس الكلام
قالي انو فعلا سئ جدا

**dr_mohamed16** · 15-11-2015 09:03 PM

لا طبعا التكييف مش تمام
مفيش عربية فى الدنيا تكييفها بيعمل كده
روح التوكيل اتخاق معاهم

**Hany Saad** · 15-11-2015 09:54 PM

دى مشكلة كباس التكييف مش مشكلة الفريون
الفريون عندك مظبوط و ده اللى التوكيل بيكشف عليه فقط....انما اللى عند حضرتك عرض ميكانيكى مش نقص فريون
لأنك بتقول ان خلال ال ١٠ ثوانى اللى بيشتغل فيهم بيكون تبريده تمام لكن مشكلته لما بيفصل
الفصل السريع ده عايز كشف على الكباس او الكلاتش بتاع التكييف او ترموستات التكييف من حد بيفهم...ضغط الفريون عندك تمام
طبعاً اللى بيقول ان تكييف الفلوانس سىء جداً ده كلام حماده بالجنزبيل مع إحترامى
جرب تعمل الحرارة على اقل درجة و هنا المفروض التكييف ميفصلش....روح للتوكيل الأول و شغل على اقل درجة و لو فصل قوله مش المفروض يفصل ابداً عند اقل درجه....و لو معرفوش العيب شوف حد متخصص تكيفات
انا اعرف حد كويس فى اسكندرية

تحياتى

**Hany Saad** · 15-11-2015 10:00 PM

نسيت برده أقول....مش ممكن لما كاوتش العربية البريدجستون يتخرم.....أقول أسواء كاوتش فى العالم كاوتش البريدجستون!!!!
حضرتك عندك مشكلة فى التكييف واضحة جداً لأن تكييف العربيات كفكرة كلها زى بعض و مفيش تكييف بيفصل بعد ١٠ ثوانى أبداً، فمش معنى كده أن تكييف الفلوانس أسواء تكييف فى العالم...العنوان صعب شوية
ان شاء الله مشكلتك تتحل على خير

تحياتى

**تامر.محمد** · 16-11-2015 09:30 AM

عموما , اللي حضرتك وصفته ده عرض لعيب في الكومبريسور
و فيه احتمال قائم برده , يعمل كده , ان شحن الفريون زايد شوية
فممكن حاجة بسيطة تعملها انك تعدي على بتاع تكييف يراجع على الشحن