الموضوع: السيارات اليابانية.. مازالت السيارات التي يعتمد عليها

المشاركة الأصلية كتبت بواسطة borio1704

الاعتمادية ليها تعريفين.. واحد تسويقي والتاني فني...

التعريف التسويقي هو باختصار.. ثقة المستخدم في السلعة اللي بيستخدمها وإنه يقدر يعتمد عليها لما يحتاجها... بمعنى إنها هتأدي الغرض بالأساسي منها بدون ما "تقل" معاه.

التعريف الفني بيترجم الكلام ده إلى ما يسمى "متوسط الوقت بين الأعطال" أو mean time between failures والمعروفة اختصارا ب(mtbf)



إزاي بقى تخلي منتج يكون له اعتمادية عالية.... فده في حد ذاته موضوع كبير.. ما زالت الدول الصناعية الكبرى في العالم بتحاول تقلد اليابانيين ومش عارفين يبقوا زيهم..

بس من وجهة نظري.. سر اعتمادية اليابانيين هو اللي بنقول عليه في مصر "السهل الممتنع"

لو أخدت بالك ... اليابانيين ممكن يكونوا متأخرين نسبيا في نزول بعض التكنولوجيا الجديدة في سياراتهم... وأنا بصراحة شايف ده ذكاء منهم.. ﻹنهم مش بينزلوا إلا التكنولوجيا اللي أثبتت أقل قدر من المشاكل.. يعني غالبا بيكون فيه حد تاني جرب المشاكل كلها عنده وهما بياخدوا الكويس بس.

حاجة تانية... لاحظ كده إن في أي مكنة عموما.. كل ما كانت أبسط كل ما كانت مشاكلها أقل.. ودي سمة حياة اليابانيين عموما.. وبالتالي هتلاقي عربياتهم في معظمها الميكانيكا بتاعتها أسهل من تعقيد الأوروبيين والألمان خصوصا.

الدقة والالتزام المعروفين بيها اليابانيين بتخلي منتجاتهم دايما جوه حدود المواصفات اللي حاطينها.. وده مش بسبب مراقبة أو فرض الالتزام.. إنما دي ثقافة شعب اللي بتخليهم يعملوا المطلوب منهم على أحسن وجه بدون رقابة عليهم... ومش كده وبس.. دول بيحاولوا يحسنوا عليها كمان

مش عارف إذا كان عندك فكرة عن أسلوب "كايزن" الياباني للتحسين المستمر.. واللي كل العالم دلوقتي بيحاول يقلده.. وعايزك بردو تعمل سيرش صغنن على النت على جملة "toyota production system".. واللي يعتبر مثال ﻷسلوب إدارة الأعمال بيحاول العالم كله يقلده ومش عارفين يطبقوه بحذافيره خارج اليابان. . وأقرب حاجة عالمية قريبة منه حاليا اسمها "التصنيع الرشيق" أو lean manufacturing

باختصار. .. الجودة اليابانية ثقافة شعب.. وعلشان توصلهم ﻻزم تبقى زيهم.


...

اشكر حضرتك على الرد الجميل ....

انا لا اهتم بالتعريف التسويقى ... و اهتم بالتعريف الفنى

لو ركزنا مع الصناعات اليابانية .... و فى مجال السيارات .... ما ذكرته حضرتك ( السهل الممتنع ) ينطبق تماما على شركة تويوتا .... و لكن لا ينطبق على الهوندا مثلا .. و الشركتين بيتميزوا بالاعتمادية العالية ... انا بحب تويوتا اكتر ... بس لا انكر اداء الهوندا

اشكر حضرتك مرة تانية .. و ان شاء الله حبدأ ادور على الحاجات الى حضرتك ذكرتها على الانترنت

المشاركة الأصلية كتبت بواسطة mecha

الاعتماديه ببساطه في رايي الجزء بعد كام ساعه او كم هيعجز عن اداء وظيفته باداء معقول، موضوع الاعتماديه reliability
معقد ومتشعب جدا في الجزء الهندسي.
المشكله في السياره الاجزاء كتير جدا ومرتبطه ببعض . مثلا كاوتش سيء يتلف نظام التعليق
القصه بتبتدي من المصمم ، بيحسب الاحمال وظروف التشغيل وووو.....الخ وبعدين يضرب في معامل امان للاحمال الفجاءيه وغيره . ومعامل الامان مهم جدا في الاعتماديه لكن موثر في التكلفه او الحجم.ثم يوصل للمقاسات ويهندسها لاداء افضل وخامات والمعالجات ، بعدين يستقربها للاستانرد الاعلي ودا فيه مواصفات عالميه زي jis,din او مواصفات الشركه الداخليه ثم الجزء يتصنع . خلاص ؟؟ لا لسه
الجزء او المكون بيتحط تحت اجهادات وعمل فيد باك
طبعا الموضوع داخل فيه اقسام واحيانا شركات واستشاريبن
دا لما جزء جديد لكن مع تراكم الخبرات ووجود متخصصين متعددين الجهد بيقل
لو عاوز صليبه كردان ، شركه koyo ممتازين هجيب منهم
، عاوز بوجيه اجيب ngk وهكذا

في السيارات ، عمل شاسيه ومتور وفرامل ودركسيون اعتماديين امر مفروغ منه
والا السياره لا تصلح تغادر باب المصنع زي ١٢٨
حاليا الاعتماديه حوالين مجاميع الاشعال والدواره والوقود
الياباني متميز جدا في النقطه دي، المجاميع اللي تخليك تدور وتروح الشغل الصبح
وقبل ما تقع تديك انذار بتدني الاداء موش فجاءه .
بساطة التصميم الي حد ما في الياباني مقصوده بهدف تقليل down time ، توفير accessibility
وتقليل special tools .
طبعا تلاحظ الجهد الرهيب والتكلفه للوصول للاعتماديه فلازم تقليل الكماليات
لتحقيق ربح معقول وتبيع بسعر منافس.
مصر صممت وعملت حاجات اعتماديه في العهد الاشتراكي ، لكن بسبب اتباع نظام موجه يغذي بعضه البعض
وفقدان المنافسه وفلسفة الاكتفاء الذاتي والجمود وعدم تطوير المنتج، ادي للخساءر والانهيار

الله ينور عليك .....

حضرتك ذكرت ... التصميم الجيد ... و كمان متابعة الانتاج و الرقابة على المنتج النهائى ... و ده كلام رائع

نقطة الالتزام بالمواصفات العالمية زى ال din فى منتهى الاهمية .... ده غير كمان ان يكون فيه مواصفات للشركة نفسها دى حاجة مهمة جدا

موضوع ان قطعة الغيار تديك مأشرات قبل ما تبوظ دى مهمة جدااااا ....

المشاركة الأصلية كتبت بواسطة ahmed_eng2001

الله ينور عليك .....


نقطة الالتزام بالمواصفات العالمية زى ال din فى منتهى الاهمية .... ده غير كمان ان يكون فيه مواصفات للشركة نفسها دى حاجة مهمة جدا

موضوع ان قطعة الغيار تديك مأشرات قبل ما تبوظ دى مهمة جدااااا ....

لو مفيش مواصفات حضرتك ,تصبح ورشه لشغل الكاستم ودا اسوأ انواع التصنيع وكل شويه العميل يجري ع الخراط وغيره ويعدل المنتج.ومتحتجش مصمم ولا مهندس ولا جوده ولا ولا
din واحد من كتير SAE ,ISO,ASTM,ASME,JIS......etc. فيه شركات يابانيه نظامهم الداخلي متفوق علي النظم العالميه.نظام تيوتا للجوده منظمة الايزو خدته .
وموضوع الفيدباك للمنتج مع العملاء مبيستهونوش بيه.كوماتسو مره بعتت مهندس لمنجم عشان مشاكل حتة سويتش في جوي ستيك لودر.ومش اي مهندس صغير .بعتوا واحد مدقدق وكان مصر ان السويتش معمول له اختبار لعدد الساعات لكن لما شاف الجو والتراب اقتنع .