نصيحة بخصوص l3

**nolf_44** · 14-12-2015 08:46 PM

محتار بين L3 و Aveo
بافكر فى الافيو على انها شبقروليه و معروفة بس مش فيها حتى ربع الكماليات اللى فى L3 و زيادة على كده الراجل اللى فى التوكيل نفسه لما سالته على عفشتها هو قاللى انها ناشفة و محتاجة تتربط كل شهر (انا مش عارف ده كتير ولا قليل)

طبعا L3 مش محتاجة اقول على مميزاتها انا هاقول على تخوفى منها من اللى قرأته فى المنتدى الكريم(بقالى 3 ايام بافتح الموضوعات من اولها لاخرها)
- التوكيل (سوء التعامل - قطع الغيار - الدخول باولوية الحضور مش بالحجز - اجبار الصيانة بزيوت رديئة) يا ريت حد يقولى على فرع كويس
- مشاكل الفتيس اللى بيقولوا عليها التصقيف (ياريت حد يوصف الصوت ده اللى انا فاهمه انه صوت زى ما ادى العربية غيار قبل معاده) وتوضيح تغيير الزيت بره التوكيل و تغيير الكلاتش بيصلح الموضوع ده ولا لا وده لازم فى كل العربيات احتياطى ولا فى العربيات اللى يظهر فيها التصقيف بس و لازم الاتنين مع بعض ولا على حسب الضرر ممكن واحد لوحده

اتمنى انى ماكونش طولت عليكم
اعتذر لو الموضوع مكرر بس انا تقريبا مش لاقى كلام قريب فى الموضوع ده والكلام من 2014
اتمنى كل واحد عنده معلومة او نصيحة يقولها

**shake** · 15-12-2015 10:01 AM

بص انا كان قدامى الاتنين بسؤالى عن البى واد دى لكذا ميكانيكى كلهم اجمعوا انها بتبقى حلوة وهى جديدة بس وانا معايا الافيو مش شايفها ناقصة كماليات وحتى لو ناقصة دى كماليات ممكن انت تركبها بنفسك بس زى ايه يعنى وعفشتها مش ناشفة ولا حاجة

**Almaestromomen** · 15-12-2015 12:09 PM

بص يا حاج .. العربيه المانيوال مافيهاش مشاكل .. والاتو كمان بس ممكن حظك يطلع وحش في واحد اوتو مشكلة في الفتيس ويقال انها بتتصلح بتغيير زيت الفتيس .. بخصوص التوكيل المعامله اتحسنت كتير لما الشكاوي كترت وكمان الصيانه رجعت بالحجز تاني ده مؤكد .. قطع الغيار بتزيد كل يوم عن التاني لان العربيه جديده مش كل قطع غيارتها موجوده واللي مش موجود الناس بتركبله ياباني .. وزيت الموتور موبيل مهواش رديئ اوي يعني ده اسم عالمي .. والله اعلي واعلم .. انام عايا مانيوال من 8 شهور ولله الحمد لسه عروسه

**Ahmed emad has** · 15-12-2015 12:44 PM

الافيو ملهاش علاقة بشيفروليه اصلا ده اسم بس . الافيو عربية سيئة جدا في كل حاجة وثباتها سيئ جدا علي السرعات العاليه . الl3 افضل نسبيا . لكن يعيبها سوء التوكيل و الصيانه الخاطئة للفتيس الي بيسبب تلفه غالبا و يعيبها سوء التقفيل المصري لكن كل العربيات التقفيل المصري في نفس المستوي واسوء ......

العربيات دي سعرها بقي عالي اوي . انا بقتﻻح ان اي عربية مستعملة هتبقي افضل مليار مرة من العربيات دي

**nolf_44** · 22-12-2015 04:01 PM

شكرا لكل اللى ردوا

انا حاليا ابتديت ادور على حاجة مستعملة و بافكر فى لانسر بومة او تويوتا 2008 او 2009
تقريبا الاتنين فى نفس السعر و برضه نفس سعر ال3

معلش لو حد يقولى احسن حاجة فى الثلاثة انا متردد جدا