لسه شاري فلوينس 2014 من شهر

**ahmedalaamosta** · 27-12-2015 03:55 PM

السلام عليكم و رحمة الله و بركاته
انا لسه شاري الفلوينس من والدي من شهر في 2014 و انا اللي كنت بوديها التوكيل للصيانة بس معرفش فيها كتير و كنت عايز اسأل شوية اسأله و حضراتكم تفيدوني :
1- انا ساكن في هضبة الاهرام و السرقات شغالة على ودنه فا سؤالي اامن العربية ازاي مع العلم انها بكارت و Push to start
2- سينسور الباب بتاع السواق (اللي بيفتح الباب من غير ريموت) فصل و مش عارف اشتريه منين
3- لوحة زراير بتاعت السواق فيها زرار مكسور و اتغيرت حوالي 3 مرات تبع التوكيل , عايز اعرف اجيبها منين
4- جدول الصيانات عشان العربية طلعت برة الضمان
5- افضل انواع الزيوت للماتور
6- اعمل update ازاي للكاسيت عشان الخرايط

بس كده الف شكر للي هيقرا ة اللي هيرد

**Hany Saad** · 27-12-2015 04:29 PM

الف مبروك الفلوانيس
بالنسبة لاستفسارات حضرتك:
- الفلوانس الحمد لله مش بتتسرق نتيجة لجهاز الحماية المعقد بتاعها، فمتقلقش خالص من النقطة دى الا لو لا قدر الله اتكسر الزجاج و العربية اترفعت على كساحة...غير كده يصعب بل يستحيل سرقتها غير بكرتها الأصلى
- هل يا ترى اللى عند حضرتك الزر الاسود اللى فى الاكره و لا الاشعة تحت الحمرا اللى تحت الأكرة؟ غالباً بالنسبة للقطعة دى مش هتلاقيها غير فى التوكيل
- انه زر اللى دايماً يتكسر عند حضرتك؟ و هل معقولة اتكسر ٤ مرات فى سنة واحدة؟ ارجو التوضيح اكتر لانه موضوع لم نسمع عنه من قبل...مجموعة الزراير ممكن تلاقيها عند بتوع قطع غيار الاستيراد او الحوادث
- الفلوانس صيانتها كل ١٠ الاف كم، لو معاك الفيس ليفت يبقى كل الصيانات زى بعض و اخرها تغيير زيت و فلتر زيت اما لو عربيتك الشكل القديم، يبقى فيه صيانات مهمة كل ٦٠ الف كم و مضاعفاتها لتغيير سيور التقسيم و دى مهمه جداً...بس هل حضرتك عملت بالعربية ١٠٠ الف كم و هى موديل ٢٠١٤؟ لان ضمان العربية ٣ سنوات او ١٠٠ الف كم ايهما اقرب
- التوكيل بيستخدم توتال، انا معنديش مشاكل معاه و لكن فيه اعضاء اخرين مش بتفضله، فيه موضوع خاص عن الزيت المناسب برجاء البحث عنه
- هل حضرتك معاك فلوانس توب لاين بشاشة ٧" بوصة؟ علشان مفيش خرايط بتنزل للفلوانس حتى التوب لاين منها الا مبيعاتها نادرة كانت بتنزل بدون خرايط و للاسف وقفوها علشان ملهاش خرايط حتى الان

تحياتى

**ahmedalaamosta** · 31-12-2015 01:10 PM

منتظر الرد

**Hany Saad** · 31-12-2015 01:47 PM

بالنسبة للصيانة، راجع الموضوع ده فيه جدول صيانات الفلوانس:
http://www.nilemotors.net/Nile/481780-50000.html

انت داخل على صيانة ال ٦٠ الف كم و هى صيانة كبرى، فيها تغيير كل سيور و فلاتر و سوائل العربية
انا شخصياً بفضل اتعامل مع التوكيل، بس لو حضرتك مش حابب، على الأقل اشترى القطع الأصلية من التوكيل و ركب بره

لوحة الزراير هتلاقيها بره، التوفيقية او الحرفيين مش لازم من التوكيل...بس حاول تجيبها استعمال اصلى افضل من جديد مش اصلى

السينسور زى لوحة الزراير و ما اعتقدش صعب تركيبة و لو ملقتوش هاته من التوكيل....بس اتأكد انه اصلاً كان شغال عندك لانه مكانه بيبقى دايماً موجود و لكن بيبقى مفعل فى العربيات الهاى لاين فقط

الخرايط حسب نوع الكاسيت اللى انت اشتريته، دور عليها على السايت بتاعه او الانترنت او عند المحل اللى اشتريته منه

تحياتى