جزاك الله عنا خيرا
عرض للطباعة
جزاك الله عنا خيرا
كلام ممتاز.......
ولكن المشكلة 90 % من السيارات لايوجد لها كتالوج؟؟؟
فالتحديد بيكون عشوائي او بالخبرة
حتي بعض شركات الزيوت المعروفة كلمته....
كنت محتاج زيت للسيارة واخد مواصفات السيارة وقاللي مش حعرف احدد زيت.. لان الكتالوج غير موجود...
قاللي خلاص انت بتحط زيت ايه وانا اعطيك زيه!!!!!! طبعا كلام غير علمي...
السؤال
كيفية تحديد مواصفات الزيت في حالة عدم وجود كتالوج؟؟
زي ما حضرتك قلت... الموضوع ماشي عشوائي أساسا.. وكل واحد بيسمع لغيره حتى لو كان "غيرُه" ده معاه عربية مختلفة تماما... وللأسف فاحنا اتربينا على عدم اللجوء للكتب أو المراجع اللي فيها العلم الحقيقي... وبقت حياتنا عبارة عن فهلوة وبس.
المشكلة الأساسية إن الموتور متصمم بناء على افتراضات كتير... منها أنواع الزيت المتاحة في السوق... وبيتبعها عدة تجارب للتأكد من إن الافتراضات دي صحيحة... وكل ده قبل ما الموتور ينزل السوق..
علشان كده بنقول إن الكتالوج هو الأساس...
في حالة عدم وجود الكتالوج .. ففي رأيي أسلم الحلول هو اللجوء إلى مواقع شركات الزيوت اللي فيها إمكانية اختيار الزيت من عندهم بناء على ماركة وموديل وموتور السيارة...
أغلب المواقع دي بتاخد مواصفات الزيوت المطلوبة في كتالوجات العربيات الجديدة وتسجلها عندها بحيث توجد مكافئ لها من الزيوت الموجودة عندها...
المشكلة إن أغلب المواصفات بتكون مناسبة للجو وطريقة الاستخدام في أوروبا وأمريكا... ونادرا لما تلاقي حد عنده مواصفات مناسبة للشرق الأوسط... يعني المعلومات اللي عندهم مش موثوقة 100%.
عشان كده ما ينفعش تروح لموقع زيوت واحد... لازم تجرب في أكتر من موقع...
خد المواقع دي وشوف...
Find the right oil | Shell Global
Which oil for your car? | Mobil 1™ UK
http://applications.castrol.com/oils...en_gb/c/search
https://www.motul.com/us/en-US/products/recommendation
Penrite Australia - NetLube
...
طبعا شكرا جداااااااااا لشرح حضرتك الوافي والي بصراحه افدني جدااااااا , طيب انا دلوقتي معايا لانـــسر شارك 2009 وكنت بعملها صيانه ال 80 الف من اقل من شهر مثلا او شهر وغيرت الزيت لـــ " ليكي مولي 5W-30 Special Tec
وطبعا الزيت الي كان محطوط فيها بتاع التوكيل الي هو Total Quartz 5W-40 , وانا غيرت بناءا ع كلام الناس بصراحه انهم يعني شكروا اوي في الليكي مولي وانه زيت رائع جدا وبيفرق في السحب فهل كده انا أخطات في اختيار الزيت ؟
* طبعا انا عارف اني اخطات اني مش رجعت للمواقع والكتالوج
السلام عليكم ورحمة الله وبركاته
هندسة لي سؤال لو تكرمت
طبعا انا دخلت على كل الروابط اللي حضرتك حاططها علشان اعرف الزيت المناسب للعربية واتلخبط تاني
انا عربيتي فيرنا موديل 2015 عامله 29000 كم الكاتلوج كاتب اللزوجات التالية
1- 20w50
2- 10w50
2- 10w40
3- 10w30
4- 5w40
5- 5w30
وطبعا زي ما فهمت منك قبل كدة ان اللزوجة هي اللي لازم تكون عاملة تقاطع مع درجة حرارة البلد (مصر) واللي عامل التقاطع هو 10w40 ومعديه بينما 10w30 واقف عند 40 م فالمرفوض اختار مين فيهم
بينما الروابط بتاعت شركات الزيوت كلها مطالعالي نتيجة واحدة وهي اني استخدم 5w30 !!!
فانا احترت بصراحة امشي مع مين وليه ؟؟؟
السؤال التاني
الكتالوج حاطط لزوجة 5w40 و 5w30 في الاخر وحاطط شرط جنبهم حسب طريقة القيادة والمنطقة ؟؟
طيب مش لو اللزوجات دي هاتبقى تخليقية مش هاتفرق معها درجة الحرارة في مصر بناء على كلام روابط شركات الزيوت ان 5w30 يشتغل لحد درجة حرارة 40 م
فممكن بالراحة وحبة حبة علي تفهمني الموضوع وجزاكم الله خيرا
دي صورة الكتالوج زي ما حضرتك قلت... ورجاء حار لحضرتك إن لو عندك الكتالوج الأصلي ياريت تصورلنا الصفحة بالكامل لزيادة التأكيد من المعلومة..
http://www10.0zz0.com/2014/10/19/18/862992544.jpg
طيب...
زي ما أنا قلت قبل كده... المواقع دي ما تقدرش تعتمد عليها 100%.. لاختلاف الجو والمواتير اللي نازلة مصر... دي حاجة.
الحاجة التانية... أنا قلت فعلا إننا هنختار الزيت اللي يغطي كل مدى درجات الحرارة في مصر.. وده بينطبق بشكل عام على 90% من مستخدمي السيارات في مصر ... لظروف الجو أولا.. وظروف التشغيل ثانيا.. لإن معظم العربيات في مصر بتمشي مسافات قصيرة وغالبا بتغير زيت مرة كل سنة.
علشان كده.. موضوع درجة الحرارة اللي فوق الـ40 له استثناءات طبعا... تختلف على حسب طبيعة استخدامك والمنطقة اللي حضرتك عايش فيها في مصر.
إزاي؟؟
حضرتك تقدر تستخدم زيت 10w-30 لو قدرت تقدّر إن المدة اللي الزيت هيقعد فيها في الموتور مش هتيجي في الصيف اللي درجة الحرارة فيه تعدي الـ40...
تقدر كمان تستخدمه لو كنت ساكن في السواحل الشمالية (اسكندرية - دمياط - بورسعيد - مطروح) لإن نادرا لما الحرارة بتعدي الـ40 هناك.
يعني تقدر تتحرك في درجات الزيوت المتاحة في الكتالوج.. بس في حدود.
مسألة طبيعة القيادة أكيد بيأثر في اختيار لزوجة الزيت.. وده شرحناه من ناحية التحميل الشديد والقيادة الشاقة.
فيه حاجة تانية يمكن ما قلتهاش وممكن تفتح الباب واسع قوي قدام معظم لزوجات الزيوت التخليقية الخفيفة ..
إحنا ممكن نروح على درجة اللزوجة الأخف عند بداية التشغيل (اللزوجة اللي قبل W).. ويقال إن معظم الزيوت التخليقية آمنة في الحتة دي... إنما التغيير في درجة اللزوجة التانية (اللي بعد الـW) ما ينفعش خالص.
يعني لو قدامنا زيت معدني 10W-40.. تقدر تحط 5W-40 تخليقي ومفيش مشاكل .. حتى لو كانت الـ5W-40 مش مكتوبة في الكتالوج...
لو أخدنا الحكاية في اعتبارنا.. يبقى زيت الـ5W-30 التخليقي اللي بينصحوا بيه في المواقع يكافئ فعليا زيت الـ10W-30 المعدني اللي عندك في الكتالوج.... وكذلك زيت الـ5W-40 التخليقي يكافئ الـ10W-40 المعدني.
بيني وبينك الكلام ده مش قادر أنصح بيه..
ليه ؟؟؟؟
لإني ما شفتش مراجع أو مواقع بتقول الكلام ده غير موقع واحد.. ومش مشهور أو معروف على النت.
ومع ذلك أنا مازلت على استعداد لتغيير رأيي لو لقيت سند علمي أو مواقع قوية ومعتمدة بتقول نفس المعلومة.
عموما.. أنا شخصيا أفضل إني أحط زيت معدني فيه يحقق كل المطلوب في الكتالوج عن إني أحط زيت تخليقي يحقق نص المتطلبات وافضل قلقان عالموتور...
معلش... أنا ما دفعتش قليل في العربية علشان أضحي بموتورها... أو حتى أشك إني هضحي بيه.
يمكن تقول عليا متحفظ أو دماغي مقفلة... بس لما الموضوع ييجي لحد نصيحة ناس هتاخد بيها وممكن يبقى ليها تبعات سيئة.. أنا بصراحة ببقى حذر جدا.
أنا مش حمل دعوة واحد نفذ نصيحة وجابت نتائج سيئة.
...
انا رأيي تمسك العصاية من النص مش يبقي افضل ولا ايه؟
يعني تحط اللزوجة 10w40 وتبقي في نفس الوقت تخليقية
ودي موجودة في Amsoil ومتوافرة في السوق
واعتقد باردو اللزوجة 10w30 هتبقي افضل في توفير الوقود
بس فيه حاجة دلوقتي بفكر فيها ؛
الكتالوج كاتب اللزوجة 10w30 اخرها 40 درجة طب هل لو اللزوجة دي في زيت تخليقي 10w30 مش هيبقي افضل وهتعدي ال 40 ( علي اساس ان الكتالوج يقصد اللزوجة دي في زيت معدني مش تخليقي) !!؟؟
ولا انا بفكر غلط؟
متألق كالعادة
طب فى نقطة محيرانى شوية:
إيه سبب تحديد حد أقصى لحرارة الجو الخارجية طالما درجة حرارة تشغيل الموتور شبه ثابته أثناء تشغيله
يعنى الزيت اللى مناسب لغاية جو حرارته ٤٠ مئوية هيشتغل فى موتور حرارته تقريبا ٩٠ مئوية
طب ما نفس الزيت اللى يناسب جو حرارته ٢٠ مئوية هيشتغل برضه فى نفس درجة حرارة الموتور
يبقى أنا أخدت حرارة الجو القصوى فى الإعتبار ليه؟