السؤال ده بيشغل بال ناس كتير قوي... إزاي نختار اللزوجة المناسبة لزيت الموتور؟؟




إجابة السؤال ده سهلة خالص... ومفيش خلاف عليها

دايما اللزوجة المناسبة هي المكتوبة في كتالوج العربية...




ولو كنت بتختار اللزوجة بناء على تجربة حد تاني أو كلام سمعته من ناس تانية.. فأنا بقوللك ياريت تغير الفكرة دي وتفتح كتالوج عربيتك... لإن ببساطة كده.. مفيش حد يعرف العربية أحسن من اللي عملها.. وتوصيات نوع ولزوجة الزيت مش محطوطة من فراغ.. إنما سبقها تجارب كتير الصانع عملها قبل ما ينزل الموتور ويوصي بالزيت المناسب.


المشكلة إن بعض الناس بتفتح الكتالوج وتقرا اللي فيه.. بس لسه بردو محتارين.. وأنا عامل الموضوع ده مخصوص علشانهم... وإن شاء الله لما يقروه الحيرة هتروح.


[gdwl]عايز أؤكد على نقطة مهمة جدا ... إن الزيت ماهواش لزوجة وبس... إنما فيه حاجات تانية غير اللزوجة لازم نحطها في اعتبارنا واحنا بنختار الزيت المناسب... زي مستوى الأداء أو الجودة بالإضافة لنوع زيت الأساس.. وفعليا.. هي دي الحاجات اللي بتفرق زيت عن التاني. . مش اللزوجة خالص..

لو عايز تعرف تفاصيل أكتر .. تقدر تدخل على الموضوع ده:

http://www.nilemotors.net/Nile/341680-a.html
[/gdwl]


خلينا نعرف الأول إزاي نقرا الكتالوج...


كل اللي هتعمله إنك.. تفتح قسم الصيانة في الكتالوج.. وتدور على صفحة تغيير الزيت...




لو ما لقيتش مواصفات الزيت المطلوب في الصفحة دي.. احتمال كبير يكون الكتالوج حاطط مواصفات كل الزيوت والسوائل بتاعت العربية في قسم تاني (خاص بالمواصفات).. وغالبا بيكون آخر قسم في الكتالوج.

في أغلب الكتالوجات... لازم تلاقي تلاقي رسمة موضح فيها إيه هي اللزوجات المسموحة وإمتى تستخدمها

زي كده...



أو كده..




بص معايا على الرسومات دي كويس..

هتلاقي تدريج في أحد أجناب الرسمة (تحت أو فوق أو على اليمين أو الشمال).. المهم إن التدريج ده بيوضح درجة الحرارة بتاعت الجو الخارجي.

هتلاقي كمان كذا مستطيل أو خط أو سهم... وكل واحد منهم مكتوب عليه رقم (أو كذا رقم) لزوجة... ومش كل الخطوط بادءة ومنتهية في نفس الأماكن ..

الخطوط دي بتوضح درجات الحرارة الخارجية اللي ينفع نشغل فيها الزيت... يعني هتلاقي مثلا (20W-40) بادئ من الشمال مع درجة حرارة (0 °م) على التدريج.. ومنتهي مع درجة حرارة (40 °م)

علشان نختار صح.. نعمل التالي:

1- نشوف على التدريج الموجود فين درجة الحرارة بتاعت الجو اللي المفروض العربية هتشتغل فيه.. وفي أغلب الحالات .. جو مصر ما بتقلش درجة الحرارة فيه في الشتا عن صفر م، وفي الصيف غالبا بتبقى في حدود الـ40 أو أكتر.

2- نشوف على الرسم فين الخطوط أو المستطيلات بتاعت الزيوت اللي بتتقاطع مع المدى اللي حددناه... لازم الخط اللي بيتقاطع مع المدى يكون مغطيه كله... مش حتة منه بس..
مثلا..



حسب الرسمة اللي فوق دي.. اللي ما ينفعش مثلا نستخدم زيت بدرجة 10W-30..


لو عايز تعرف تفاصيل أكتر عن معنى درجات اللزوجة دي والفروق ما بينها.. التفاصيل دي هتلاقيها في المشاركة الجاية..



طيب .. أحيانا .. ممكن نلاقي أكتر من درجة لزوجة ممكن تشتغل معانا في مدى درجات الحرارة اللي حددناه... نعمل إيه؟

الحالة دي موجودة كتير في الكتالوجات... بمعنى إن الكتالوج يكون مديلك أكثر من درجة لزوجة وكلهم ينفعوا يشتغلوا في الجو اللي العربية ماشية فيه...


في الحالة دي نختار اللزوجة ازاي؟؟؟

قبل ما أجاوبك .. عايزك تعرف شوية حاجات بسيطة...

1- بشكل عام... الزيوت اللي لزوجتها عالية بتدي حماية أعلى من الزيوت الخفيفة.. خصوصا مع وجود أحمال عالية أو مع الحرارة العالية..

بس في المقابل .. الزيوت اللزجة بتعمل مقاومة داخلية كبيرة في الموتور.. وبالتالي ده بيخلي استهلاك البنزين أعلى.. ده غير إن اللزوجة العالية معناها سرعة انسياب أبطأ.. ودي ممكن تبقى مشكلة مع بداية تشغيل الموتور وفي الجو البارد بالذات (الجو البارد هو اللي أقل من صفر °م).

الكلام ده تقدر تقول عكسه تماما في الزيوت الخفيفة.


الصورة دي بتبين الفرق في الانسياب بين اللزوجة العالية والمنخفضة.. ومتقاسة في درجة حرارة 35 تحت الصفر


2- عمرك ما هتلاقي كل المميزات في منتج واحد... ده على فكرة مبدأ عالمي...

لإن لو حصل وكان ممكن إننا نعمل منتج فيه كل المميزات فلا يمكن يكون رخيص.. وهتلاقي نفسك بتدفع تمن حاجات انت مش مستفيد بيها.. وساعتها مش هيبقى فيه منتجات منافسة في السوق.. وده معناه انهيار الاقتصاد على مستوى العالم.


طيب .. بعد المعلومات دي أقدر أجاوبك .. إزاي نختار اللزوجة..

الموضوع راجع لحاجتين أساسيين:


طريقة استخدامك + أولوياتك بالنسبة للعربية


إزاي؟؟

1- طريقة استخدامك للعربية

عموما... فيه حالات معينة لو بتحصل معاك كتير يبقى لازم تروح على اللزوجات الأعلى.. وهي:
1- تحميل السيارة بحمولة وأوزان عالية أكتر من نصف الحمولة القصوى المسموح بيها في الكتالوج (غالبا الحمولة القصوى بتبقى 500 كجم).
2- قطر أو سحب سيارات أو مقطورات (كرافان مثلا).
3- صعود مرتفعات أو نزولها (زي جبل المقطم مثلا).
4- القيادة الرياضية والتسابق (سيارات السباق بيتحطلها زيوت تقيلة دايما).
5- السيارات الخدمية (زي سيارات التاكسي أو سيارات دوريات الشرطة مثلا)

بمعنى إن العربية لو بتشتغل تاكسي مثلا... فاستخدام لزوجة ثقيلة أكيد أفضل... لإن في العادة التاكسي معرض لظروف تشغيل قاسية ومتنوعة (هو ورزقه كل يوم)... وموتوره شغال علطول ومش بيقف.. فعيوب الزيت الثقيل (اللي هي تأخير الوضول إلى أجزاء الموتور في بداية التشغيل) هتبقى شبه مالهاش وجود.. لإن الموتور فعليا ما وقفش أصلا.. أو على الأقل وقف مرة واحدة بس في اليوم.

على العكس من الكلام ده بالنسبة للعربيات الملاكي اللي استخدامها خفيف... فالزيوت الخفيفة مطلوبة لإن عدد مرات دورانها عالبارد (يعني كل الزيت راقد في الكارتير والكامات فوق مفيش عليها زيت) خلال اليوم الواحد أكيد أكتر..

أحيانا بتبقى العربية شغالة مشاوير خفيفة ولكن المشوار نفسه بتكون العربية فيه محملة أو بتطلع أماكن مرتفعة (زي المقطم مثلا)... في الحالة دي نحاول نجيب زيت تخليقي بلزوجة عالية شوية زي 5w-40 مثلا.

ما تنساش كمان إن جو مصر والشرق الأوسط ما فيهوش جو بارد زي أوروبا وكندا وروسيا... يعني أبرد درجة حرارة ممكن العربية تتعرضلها هي (صفر مئوية).. وده في عرف الزيوت ما هواش برد.. وما تنساش إن حتى الزيوت بلزوجة 20w-50 ممكن تشتغل كويس لحد درجة 15 تحت الصفر.


أوعى تغير لزوجة الزيت بمزاجك .. اختار من الزيوت اللي تنفع مع الجو اللي هتسوق فيه العربية حسب الكتالوج . . . . دايما.


2- أولوياتك
وهنا فيه اختلافات كتير بين الناس...

فيه واحد عايز يشغل العربية بأقل تكاليف ممكنة... وفي الحالة دي الاختيار هيبقى للزيوت المعدنية غالبا.. خصوصا لو كان فيه بدائل رخيصة مغطية متطلبات الكتالوج (أغلب العربيات الاقتصادية - زي اللانوس مثلا - ما بتطلبش متطلبات عالية للزيوت).

وفيه واحد عايز يوفر بنزين فيروح للزيوت الخفيفة... وفيه واحد تاني مش فارق معاه البنزين بس عايز يحس بالأمان شوية فيروح لزيوت أثقل حبتين.



طيب هل ينفع نعمل خلطة جديدة من أنواع اللزوجات الموجودة في الكتالوج؟؟؟ يعني لو كان الكتالوج بيقول حط زيت 5W-30 أو 15W-40 مثلا...

ينفع نحط 5W-40؟؟؟ ماهو الدرجات دي مكتوبة في الكتالوج!!!


الحقيقة .. الخلطات دي غير مأمونة العواقب... ولو كانت درجة الزيت دي كويسة كانت بكل بساطة اتكتبت في الكتالوج.

ده غير إن كل كتالوجات السيارات بتقول بمنتهى الوضوح إن أي تغيير في درجات اللزوجة المذكورة في الكتالوج "يؤدي إلى تلف المحرك"..

ما قالوش "ممكن يؤدي".. لأ.. قالوا "يؤدي" علطول.. يعني نتيجة حتمية.



طيب لو العربية ماشية فوق الـ100 ألف كيلومتر... مش المفروض نزود اللزوجة شوية؟؟

في الحقيقة... الموضوع ده ما تقدرش تقول إنه مرتبط ارتباط مباشر مع المسافة اللي ماشياها العربية... لإن حالة الموتور بيحددها حاجات كتير غير مجرد المسافة اللي ماشياها العربية..


تخيل عربيتين...

واحدة ماشية طول النهار في الزحمة... والتانية ماشية كل مشاويرها سفر بسرعات معقولة...

اللي ماشية في الزحمة عداد الكيلومترات بتاعها قليل بس حالتها الميكانيكية عموما سيئة.. في حين اللي مشاويرها سفر ماشية كيلومترات كتير جدا .. بس حالتها الميكانيكية أحسن بكتير.

فالحقيقة إن الكيلومترات ما هياش مقياس رئيسي في تحديد حالة الموتور.. وإن كان ليها دخل بدون شك.


في رأيي اللي يخليك تستخدم لزوجة أعلى حاجة واحدة... إن معدل نقص الزيت يكون عالي.

غير كده... اللزوجة الخفيفة "حسب الكتالوج" أكتر من كافية.


لو عايز تفاصيل أكتر عن الحكاية دي.. ادخل على الموضوع ده

http://www.nilemotors.net/Nile/477071-100.html


...