والان وبعد مرور 100 يوم من شراء الكورولا 2008 professional عملت فيه 10000 كم اليكم تقييمى للسياره
اولا:الشكل
طبعا الشكل وجهات نظر ولولا اختلاف الازواق لبارت السلع وانا عن نفسى اول ما شفت الكورولا الجديده ما مكانتش عاجبنى تصميم الفوانيس الخلفيه ولكن بعد ما شفتها على ارض الواقع عجبنى تصميمها وخصوصا من قدام والفوانيس المسحوبه زى الكامرى والعربيه ليها وقار وهيبه تدل على انها عربيه محترمه
تقييمى للشكل 8 من 10

ثانيا الكماليات

طبعا انا معايا البروفيشنال ودى فيها تكييف بكر عادى وكاسيت سى دى mp3 وطاره مالتى فانكشن للتحكم فى وظائف الكاسيت والسى دى من الطاره وطبعا العدادات فيها شاشه لبيان معدل استهلاك البنزين والمسافه التى يمكن قطعها بالنسبه للوقود المتبقى فى المتوسط ودرجة الحراره والساعه وطبعا الفرامل abs كتجهيز اساسى و 4 سماعات وكاوتش مقاس 205/55/16 بجنوط عاديه والفتيس وعجلة القياده مغطاه بالجلد الطبيعى وعدد 2 وسائد هوائيه وعتلات مثبته فى الدريكسيون لتغيير السرعات والنقلات
بالنسبه للادفانسيد
فيها جنوط سبور 16 وزينون وبخاخات ومثبت سرعه وعدادات اوبيتريون بشاشه معلومات وتكييف تاتش و 4 وسائد هوائيه و 6 سماعات
بالنسبه لصوت الكاسيت صوته نقى وممتاز ولكنه عيبه انه صوته مش عالى قوى وده يمكن لانه 4 سماعات بس انما فى الادفانسيد 6 سماعات طبعا السى دى mp3 وده مش موجود فى الخليجى
طبعا العربيه مصفحه بالكامل من تحت بس لما بصيت عليها من تحت لقيتها اوطى من الخليجى بسبب التصفيح بس العربيه ما شاء الله مش بتحك فى المطبات
تقييمى للكماليات فى الادفانسيد 8.5 من 10 (لعدم وجود فتحة سقف واسبويلر )


ثالثا :الموتور والسرعه

العربيه طبعا فيها الموتور الجديد dual vvti وده احدث تكنولوجى من vvti العادى وميزته ان الموتور اهدى واستهلاك البنزين افضل والموتور اقوى طبعا 124 حصانا وعزم 157 نيوتن.متر انما الخليجى 106 حصانا وعزم 145 نيوتن.متر
الموتور ميزته انه مغطى بالكامل ومفيش سلوك باينه وده بيدى فخامه لشكل الموتور وبيفكرنا بالاوكتافيا a5
وافضل ما فيه انك مش هتسمع صوت الموتور اطلاقا لو العربيه واقفه ودايره يعنى مش هتعرف تحدد الموتور شغال ولا لا
بالنسبه للتسارع ان حسبته ولقيته كالتالى
من صفر الى 100 كم 10 ثوانى
من صفر الى 120 كم 13 ثانيه
من صفر الى 160 كم 25 ثانيه
من صفر الى 180كم 34 ثانيه

العربيه سرعتها القصوى تتراوح بين 210 و 215 كم حسب ظروف الطريق وفى حالة لو الهواء مقابلك جامد مش هتعدى 200 ودى ارقام ممتازه لعربيه 1600 سى سى
العربيه طبعا موتورها ممتاز جدا وافضل ما فيه التسارع على السرعات العاليه بعد 140 مفيش اى عربيه 1600 سى سى هتقدر تسبقك ولكن على السرعات المنخفضه فيه عربيات خفيفه ممكن تسبق
تقييمى للموتور 9.5 من 10


رابعا :الثبات ونظام التعليق



طبعا الجديد فى الكورولا 2008 ان ثباتها اصبح افضل بكثير قوى من كورولا 2007 والعربيه بصراحه ما شاء الله ممتازه قوى على الطريق وبتديك احساس بالامان والتحكم الكامل حتى لو ماشى على 180 كم وطبعا لو قارنا الكرولا 2008 ب 2007 فى الثبات هنلاقى الفرق كبير قوى لان العربيه ذادت فى الوزن حوالى 200 كجم والكاوتش بقا 16 بدلا من 14 والعرض 205 بدلا من 185
وتم تغيير نظام التعليق بالكامل والعربيه اصبحت اعرض واوطى من 2007
بالنسبه للراحه على المطبات .....افضل ما فى نظام التعليق انه جمع بيت الراحه والثبات يعنى العربيه مريحه على المطبات وفى نفس الوقت فيها ثبات كافى لمنح الثقه والامان لدى السائق وللامانه عفشتها انشف شويه من كورولا 2007 ولكن طبعا ده من اجل الثبات ولكن مجملا العربيه مريحه جدا بالمقارنه بالعربيات اللى فى نفس الفئه
تقييمى للثبات ونظام التعليق 9 من 10


خامسا العزل داخل المقصوره


العربيه عزلها اكيد افضل من كورولا 2007 وقفلة الباب المميزه جدا فى الكورولا 2008 بتديك احساس بمدى العزل الجامد وبصراحه العربيه عزلها جميل جدا وبتحس لما تقفل الزجاج كانك انعزلت على العربيات والعالم اللى خارج السياره واللى بيضيف احساس بالهدوء هو المحرك الهادىء جدا فى السرعات العاديه وفى الشد صوته ناعم جدا ومحبب ومش مزعج وحتى الكاوتش من نوع ميشلان الالمانى ملهوش اى صوت على الطريق وكل ده بيعمل هدوء داخل الكابينه والعزل فى الكورولا 2008 من اكثر الاشياء المميزه فى السياره
تقييمى للعزل 9.5 من 10


سادسا :الخامات الداخليه والتقفيل
بصراحه شديده ان شايف ان الخامات معقول والتقفيل جيد جدا ورايىء بعد ما سمعت بعض الناس بتقول الخامات سيئه المعاينه على الواقع
تقييمى للخامات والتقفيل 8.5 من 10


سابعا: المقصوره الداخليه والعملانيه

العربيه من الداخل واسعه جدا وتقريبا نفس وسع الكرولا 2007 ولكنها اعرض من الداخل وبها حاملات اكواب فى الامام والخلف ومكان لحفظ النظاره او الاوراق المهمه والرخص والمراءه اللى فى الشماسه عند فتحها يتم فتح اللمبه الصغيره اللى معها وتغلق اوتوماتيكيا عند علق المراءه ودرجان للتخزين امام الراكب الامامى مش درج واحد والشنطه واسعه جدا جدا جدا جدا
تقييمى للمقصوره والعملانيه 9.5 من 10


ثامنا : استهلاك البنزين


طبعا شركة تويوتا مشهوره بتوفير استهلاك البنزين فى سيارتها ولم تشذ الكرولا عن القاعده لان فيها تكنولوجيا موتور احدث من القديمه فتوفيرها للبنزين اصبح افضل من الكورولا القديمه كمان
على سرعة 100كم بيبقى معدل استهلاك البنزين 5.9 لتر لكل 100 يعنى حوالى 350 كم فى الصفيحه وده معدل ممتاز لسياره 1600 ولكن المعدل ده بيتغير طبقا لاختلاف السرعات ونوعية البنزين وظروف الطريق انا بحط 92 علطول وطبعا اللى يهمه استهلاك البنزين انصحه يشترى الكوكو لانها ممتازه فى النقطه دى



تاسعا :الفتيس mmt(multi mode transmission)

هتكلم هنا عن الفتيس وهحاول بقدر الامكان اقول كل اللى اقدر اقوله فى النقطه دى لان حصل شكاوى كتير فى الاول من الفتيس بمجرد نزول السياره
اسباب الشكوى:
طبعا الناس اشترت السياره وركبوها وفاجاه لقوا العربيه تسارعها بطىء جدا وعند النقل بين الغيارات بيحدث تاخر فى الاستجابه للنقل للحاره اللى بعدها طبعا ده راجع لان اللى اشتروها مكنوش فاهمين نظام الفتيس كويس وكيفية التعامل معاه
بصراحه انا لو كنت من اللى اشتروا العربيه فى الاول كنت هفتكر عندى خلل فى العربيه وكنت هروح التوكيل علطول
طب سؤال: اهل الفتيس كدا فيه مشكله وشركة تويوتا بتنصب علينا فى مصر؟
الاجابه :اكيد لا ولكن الفتيس به تكنولوجيا مختلفه يجب فهمها اولا عند التعامل مع السياره
الفتيس مبنى فكرة عمله على فتيس مانيوال ولكن بدون دبرياج ولكن يتم نقل من خلال كلتشات مبرمجه مثبته بالمحرك وهو نفس فكرة عمل الايزى ترونيك

الفتيس يحتوى على 3 انظمه

1- E
وده النظام الاقتصادى الذى بوفر البنزين وده اللى الناس كانت بتستخدمه واشتكوا من ان السحب بطىء طبعا النظام مبرمج ان العربيه تنقل بسرعه وانت ماشى بطىء حتى يكون الموتور مستريح قوى وعدد لفاته قليل فيوفر بنزين جامد ده معناه انك تبقى ماشى على 50 والعربيه على الرابع تضغط بنزين علشان تزود السرعه تلاقى السحب بطىء جدا وهنا مصدر الشكوى وعلى فكره النظام ده مبرمج انه ينقل براحه بين النقلات يعنى بيتاخر شويه فى النقل (بياخد راحته يعنى عند النقل علشا ن كدا الناس قالت فيه نتشته ولكنها مش نتشته هى مجرد تاخر فى النقل)
عن نفسى لا افضل النظام ده لانه بالرغم من توفيره للبنزين الا انه بطىء فى السحب والنقل
تقييمى للنظام 7 من 10(لميزته فى توفير البنزين)

2- ES
وده نظام القياده الرياضيه العربيه مش بتنقل بدرى بتنقل عند لفات موتور عالى واكيد السحب افضل بكتير عير ان النقل بين الحارات اسرع بكتير وعلى فكره النظام ده مبرمج على حسب نوعية قيادتك ولكن برضه ممكن تغير فى البرمجه من خلال عتلات التغيير للنقلات فى الدريكسيون التى تتيح النقل لسرعه او حاره اعلى او اقل وده طبعا اللى هيجرب النظام ده مش هيلاقى اى شكاوى اللى الناس قالت عليها كلها فى نظام E وانا شخصيا بفضل النظام ده ومش بستخدم E الا نادرا

تقييمى للنظام 9 من 10


3 - M
وده نظام المانيوال وده يتيح للسائق الاستفاده القصوى من اماكنيات الموتور واستغلال كل طاقته وكانك بتسوق سياره مانيوال بالظبط من خلال سحب الفتيس ناحيتك على M وتغير النقلات من خلال PADDLE SHAFT او من خلال + او_ اللى فى الفتيس
تقييمى للنظام 10 من 10

عيوب الفتيسMMT

1- اشتكى البعض من ان العربيه احيانا تديها E وتلاقى صوت الموتور على قوى وما نقلتش على التانى طبعا ده عمره ما حصل عندى ولكن ظهرت عند صديق لى وبعض الناس فى اوربا اشتكوا منها فى تويوتا اوريس اللى نازله بنفس الفتيس من 2003 طبعا الحل تضغط ضغطه + لعتلات التغيير اللى فى الدريكسيون هتلاقى العربيه نقلت للتانى وتفسير الاوربيين لعدم النقل الى التانى فى E هو ان اثناء صعود المرتفعات يتم تحويل النظام الى مانيوال للحصول على عزم اكبر وراحة اكبر للموتور

2- احيانا العربيه لما تيجى ترجع للخلف تستنى 3 ثوانى وبعدين ترجع واعتقد سبب المشكله دى ان العربيه بتكون ماشيه لقدام فاجاه لما تقف وترجع علطول يحصل تاخر فى الاستجابه للرجوع للمحافظه على الفتيس

مميزات الفتيس MMT
1- توفير فى استهلاك الوقود
2- عزم المانيوال وفى نفس الوقت راحة الاوتوماتيك فى الزحام

تقييمى للفتيس 9 من 10 بدون E
تقييمى للفتيس 7 من 10 بوجودE (لفائدته فى توفير البنزين )


عيوب السياره:
1- التكييف جيد جدا وليس ممتازا لان الكورولا 2007 تكيفيها اقوى ويمكن التكييف اصبح اضعف لانه موجه للسوق الاوربى فى الاصل
2- صعوبة الرؤيه الخلفيه خصوصا عند الركن
3- صعوبة معرفة الوقت لانها فى الشاشه اللى فى العدادات اللى فى اقصى اليسار
3- المرايات مش SHAFT يعنى مش بتنطوى زى الكرولا الخليجى و 2007

فى النهاية :
احب اقول انى الحمد لله رب العالمين راضى جدا عن السياره تويوتا كورولا 2008 ولو رجع بيا الزمن كنت هشتريها برضه بس اعتقد انى تسرعت شويه لانى كان الافضل اجى على نفسى واجيب الادفانسد لانها افضل وتستاهل فرق الثمن بكمالياتها الغزيره ولكن الحمد لله على كل شىء

وتقبلوا تحياتى