استفسار بخصوص لادا 2110؟؟لأهل الخبرة.

**Mohammed sami** · 24-01-2016 08:50 PM

السلام عليكم و رحمة الله وبركاتة

دى أول مشاركة ليا في المنتدى و اتمنى تساعدونى لانكم اهل خبرة
انا نويت اشترى عربية و فى قدامى واحدة لادا 2110 روسى هبص عليها خلال أيام
العربية عجبانى و حلوة بس فى ناس زميلى نصحونى بلاش قالولى قطع غيارها مش موجودة و أبعد عنها من إللى قريتة هنا و على مواقع تانية لقيت ناس كتير بتشكر فيها و ناس بردة بتذم انا عاوز حاجة ف حدود 28000 بالكتير و دى كانت معقولة و مناسبة
فعاوز مشورتكم يا ترى العربية الروسى حلوة و لا لا ؟
و هل قطع غيارها متوفرة مع العلم انى من اسكندرية؟
و يريت لو فى نصيحة من حد جربها و ساقها او امتلكها لو حالتها حلوة اشترى و لا ابعد

و شكرا ليكم و اسف على الاطالة

**A7medelfe2y** · 25-01-2016 03:47 AM

العربيه بشكل عام مش وحشه
قطع الغيار متوفره في اماكن وبسعر كويس واماكن تانيه هتلاقيها قليله او تحديدا بعض القطع الي هتحتاجها هتلاقيها نادره
كنت فكرت فيها لابن عمي وبعدين ريحت دماغي وجبتله اكسيل
لاني سالت عندنا في طنطا في شارع سعيد وسكه المحله والناس خوفوني منها
اسال الاول الميكانيكي بتاعك ومحلات قطع الغير بالقرب من مكانك

**Mohammed sami** · 25-01-2016 02:31 PM

المشاركة الأصلية كتبت بواسطة a7medelfe2y

العربيه بشكل عام مش وحشه
قطع الغيار متوفره في اماكن وبسعر كويس واماكن تانيه هتلاقيها قليله او تحديدا بعض القطع الي هتحتاجها هتلاقيها نادره
كنت فكرت فيها لابن عمي وبعدين ريحت دماغي وجبتله اكسيل
لاني سالت عندنا في طنطا في شارع سعيد وسكه المحله والناس خوفوني منها
اسال الاول الميكانيكي بتاعك ومحلات قطع الغير بالقرب من مكانك

متشكر لسرعة رد حضرتك بس بصراحة انا لسة مش عندى ميكانيكى عشان اسئلة دى هتكون اول عربية اجيبها ف حياتى و هتعلم عليها السواقة بردة
عشان كدة قلت اسئل الاول قبل مجيبها انا بحاول اشوف محلات قطع غيار لادا ف اسكندرية عشان اسئل على قطع غيارها متوفرة ام لا

بس سؤال الناس خوفوك منها ازاى اية المقلق بخصوصها و خلاك تغير رايك بخصوصها؟؟

**A7medelfe2y** · 26-01-2016 01:33 AM

قطع غيارها عندنا في طنطا مش منتشره بشكل كامل
يعني في حاجات موجوده
حاجات تانيه هدوخ عليها
حاجات تالته موجوده بس غاليه
تحسسك انك مبتشتريش للادا
بص حضرتك
لو هتمشي بالراحه وتحافظ علي نفسك دا بعد ستر ربنا طبعا
يبقي خليك في الاكسيل
هتزود 5000 ولا حاجه عشان تبقي كويسه
بس اما يحصل فيها حاجه ممكن تصلحها ب 20 جنيه وعند اقرب حلاق

**MAGEDSAMIR** · 29-01-2016 08:05 PM

بخصوص لادا 110 عربية جميلة وناعمة وقوية جدا جدا وموتور 1500 اتنين كامة الروسى قوى جدا وموفر بنزين جدا وعفشتها خدمة شاقة وجسم العربية كله معالج ضد الصدا وقطع غيارها متوفرة جدا فى القاهرة. بس الروسى افضل من المصرى وموتوره اقوى من ال 1600 المصرى