مشاكل فتيس dct للعربية byd

**ahmed sayed22** · 06-02-2016 07:13 PM

الفتيس DCT اللى نازل فى العربية بى واى دى BYD >>>> f3&L3

اللى هى من موديل 2015 .. او من وقت ماغيروا الماتور اللى بتكنلوجيا الميتسوبيشى

وجابوا ماتور بتكنلوجيا الهوندا ... المهم التفيس ده 6 سرعات .. فتيس عبقرى بمعنى الكلمة فى التسارع والسحب وكل شىء

ولكن العيوب اللى ظهرت مع الجميع لان المشاكل دى مشاكل عامة .. اما بقى اللى مش حاسس او اللى اول مرة يركب اوتو اصلا دى حاجة بتاعته بقى

العيوب اللى بتظهر يارجالة : سماع صوت الغيارات بين الاول والتانى والتالت صوت تكه .. نتشه من الاول للتانى .. رجرجه على المطالع او لما تجيب R رجرجه فى العربية كلها ... وتسمع صوت جامد لما تيجى تحط العربية على P وطبعا بحطها على n وبعدين اشد فرامل اليد وبعدين P عشان ماحدش يقول ان السبب هو ده يعنى

وتروح للتوكيل بعد حورات كتير يديك معاد تجيله فيه ويغيرلك الكلاتش اللى هو الاسطوانة فى المانويل ... لان الفتيس ده هو اه اوتوماتيك لكن على اسطوانتين دبرياج واللى هو قبل ما يجى الغيار بيكون هو جاهز بيه .. متلقم جاهز .. وبعد مايغيرلك توكيل الامل .. الكلاتش بتاعك ؟ !!

هل المشكلة بتتحل ؟ .. لأ يا رجالة مش بتتحل بعد 2000 كيلو بترجعلك تانى كما كانت .. والكلام ده انا مش ناقله عن حد ده اللى تم معايا ومع الناس اللى انا اعرفها مش بفتى عليكم

وفى ناس الفتيس بيوصل معاهم لمراحل اكبر من كدا وهى ان الفتيس ماينقلش اصلا لازم يبطل العربية ويسيبتها تبرد شوية .. عشان تبدأ تنقل تانى كلها مواضيع كبيرة ودى بتبقى اخر مرحلة لو انت مش فاهم ايه اللى بيحصل فى عربيتك وفاكر ان الموضوع عادى فى الاخر بتجيبها على ونش للتوكيل

انا بقولكم الكلام ده ليه ؟ عشان ضميرى وغيرى مايقعش فى نفس المشكلة ويلبس نفس العربية بعيوب فتيسها .... طلع افتكاسات بقى من شخص قعد يقولك غيروا زيت الفتيس ومشكلتكم هتتحل

روحنا ياسيدى وغيرنا زى الفتيس واتغير لنا كلاتش واتعمل سوفت للفتيس .. وكل حاجة زى ماهى يعنى المشكلة مش فى الزيت اصلا ولا الزيت هيحل حاجة

ابعدوا عن الاوتو لحد ما التوكيل يلاقى حل نهاااائى .. المشكلة مش فردية يا رجالة دى مش عامة بأعتراف التوكيل وشكرا ليكم

وارجو من ادارة المنتدى تثبت الموضوع ده للاهمية ولنصيحة الناس

**ahmedsrs** · 06-02-2016 07:31 PM

تكنولوجى ال دى سى تى وال دى اس جى اثبتت فشل فى مصر

**Gallant** · 07-02-2016 08:14 AM

جزاك الله كل خير

**scientist9508** · 07-02-2016 03:32 PM

نصيحه غاليه و تستحق كل التقدير على أمانتك و خوفك عل الناس

**egyption88** · 08-02-2016 04:22 PM

هو فعلا كل اللي حضرتك قلته دا حاصل عندي وانا عربيتي لسه 7000كلم والكلام دا من صيانه ال 1000 كمان...وعملت كذا موضوع عشان نلاقي حل لكن كدا انت جبت نهايتها...سؤالي بقى واتمنى تفيدني .. المفروض اعمل ايه مع التوكيل عشان يفيرولي الكلاتشات او الاسطوانة هل بتتم بالادب ولا كعادة التوكيلات لازم سياسة الصوت العالي والشكاوي والذي منه؟؟

**ahmed sayed22** · 09-02-2016 01:22 AM

بص هو فى مدير جديد جه اسمه محمد نبيل .. الراجل ده محترم ونفسه يعمل حاجة .. بس للاسف مفيش فى ايده حاجة .. روحلوا وهيدوك معاد .. هتديلهم فى اليوم ده العربية .. وهتستلمها بعد ٣ ايام .. بس للاسف ماهو ده اللى تم معايا وبعد ماخدتها بالظبط ٢٠٠٠ كيلو .. ورجعت كل المشاكل تااانى ! .. فى خطوات هاخدها ان شاء الله وهنبقى عدد محترم .. انا عايز ابعتلك لينك الاكونت ع الفيس عشان اى حاجه او جديد فى الموضوع اكلمك .. ولكن مش عارف ابعته ولا ايه لا يكون فى مشكلة او قوانين المنتدى

**egyption88** · 09-02-2016 03:32 PM

شكرا يا باشا على اهتمامك وعموما عشان الرد هنا ليه قوانين ومش بيكون سريع انا هبعتلك رقمي في رسالة عالخاص ممكن تكلمني او ابعتلي اي حاجه على الواتساب مثلا ونتواصل سوا ونرتب اي خطوات مع بعض ونحاول نجمع حد تاني من اصحاب المشكلة دي ونبتدي نتحرك كلنا في اتجاه واحد عشان اللي بيحصل دا حرام احنا شاريين عربيات جديدة