موضوع للنقاش ياترى احنا مع ولا ضد اوبر وكريم

**TAMERMEGAHED** · 13-02-2016 10:14 AM

السلام عليكم

طبعا هو موضوع مش خارج بعيد عن مجال السيارات الا وهو شركات الانتقالات الجديده زى شركه اوبر وكريم
طبعا بعد الضجه الى فاتت والمواقف المختلفه للتاكسى الأبيض هل هو ظالم ام مجنى عليه
طبعا كلنا نفسنا في خدمه نظيفه ومحترمه وبفلوس كويسه لما نلاقى ده نسيبه ليه
وليه التاكسى الأبيض زى ماخد فرصته على حساب التاكسى الأسود ليه مايطورش نفسه ويرجع زى اول ماابتدى وليه المنحنى بقى الطبيعى ان اى حاجه كويسه بتنزل لتحت مابتطلعش لفوق
ياريت نتناقش من كل أوجه النظر المختلفه للموضوع

هل انت مع استمرار اوبر وكريم
هل انت مع احقيه التاكسى الأبيض في منع اوبر وكريم

**dede_dodo88** · 13-02-2016 10:56 AM

لو سواقين التاكسي المعترضين مش قادرين يواكبوا المنافسة فاحسنلهم يشوفوا شغلانة تانية بدل ما يبلطجوا..

**Amr_MO** · 13-02-2016 11:43 AM

معاهم طبعا ومع استمرارهم توسعهم في كل الحافظات ولكن اذا ظلوا في نفس المستوى المتحضر ونفس جودة الخدمة من كل النواحي

وبالمناسبة اوبر شغالة في معظم دول العالم المتحضر من ضمنها أمريكا، ومحدش سمع ان السائقين هناك عاملين اضراب لأن جودة خدمة التاكسي العادي في امريكا ايضا محترمة وتقترب من الاحترافية وعشان كدة مش خايفين من الشركات الاخرى المنافسة زي اوبر

انما هنا سائقين التاكسي - الا من رحم ربك - بلطجة وقلة ذوق في التعامل وخصوصا موضوع اللعب في العدادات وقبوله قرش حرام يدخل جيبه بدون وجه حق ده اذا شغل العداد كمان، لدرجة انك قبل ما تركب التاكسي بقيت تقوله عدادك شغال ياسطى يقولك كل سنة وانت طيب اقوله وانت طيب طريقك اخضرـ تروح مكان زي المطار مثلا يقولك اصل انا هرجع فاضي، مانا ممكن اروح معاك مشوار لوسط البلد وتقعد تلف طول النهار ومحدش يرضى يشاورلك ويركب معاك لأن دي ارزاق وممكن تروح المطار وتلاقي حد تاني بيشاورلك من هناك، سواقين التاكسي مفكرين علشان الزبون هيدفع 20 ولا 30 جنيه في مشوار يبقى هو قاعد على تل فلوس، يبقى نحلبه على قد ما نقدر، ده غير السجاير وحالة العربيات المزري

يحسنوا من نفسهم الاول بعد كدة يتكلموا على الشركات المنافسة، مش بلطجة وسوء خدمة وعاوزين الناس تركب معاهم بالعافية!!

**marsguy** · 13-02-2016 11:53 AM

طبعاً مع أوبر ومستعد أنزل زقفه احتجاجيه كمان للدفاع عنهم

بس الفكره إني مش معنى إني معاهم إني عاوز سواقين التاكسي يتإذوا أو يتخرب بيوتهم. أنا عاوز كل الناس تستفيد ومش عاوز السئ يبلطج بدل ما يحاول يحسن من نفسه.

طيب إيه الحل؟ أنا شايف الآتي:

يتعمل كيان جديد لسواقين التاكسي الأبيض ده وممكن نسميه مثلاً white uber

الشركه دي هاتشغل سواقين التاكسي بنفس نظام أوبر بس طبعاً قبل ما سواق التاكسي يتقبل هايعمل إختبارات وتدريب وهايتم إختبار عربيته. لو نجح في ده كله يبقى هاينضم للشركه دي والناس تقدر تطلبه بالبرنامج من الموبايل وفي نفس الوقت يقدر ياخد زباين من الشارع عادي.

طبعاً السواق برضه هايتعمله تقييم ولو عك هايطلع من الشركه زي اللي بيحصل مع أوبر.

ممكن الحكومه تجبر أوبر على رفع سعره 10% مثلاً عشان طبعاً عربيات أوبر أنضف من التكاسي في الغالب وعشان المنافسه تبقى شريفه.

**mikho83** · 13-02-2016 03:14 PM

اوبر تفضل شغالة طبعا

**طارق _عبد السلام** · 13-02-2016 05:09 PM

للاسف مفيش ثقافه المنافسه الشريفه عندنا ..الموجود نظام البلطجه السائد..

مع استمرارهم اكيد..واتمنى البلد كلها يكون فيها النظام ...................وحقى وحقك هو السائد مش كل حاجه بالفهلوه

**melouk1** · 13-02-2016 07:04 PM

سواقين التاكسي الأبيض سواقين ميكروباصات نفس العقلية و الأخلاق ..

**Karim Alaa** · 13-02-2016 08:21 PM

معاها طبعا لان كده كده سواقين التاكسى مش ملتزمين بالقانون الى بيطالبو بتطبيقه اولا هو الى بينقى يروح فين و ده بيخلى الناس تقف بالساعات من غير وسيله مواصلات ثانيا عدم التزام بالعداد بص يا سيدى يا اما يقولك العداد بايظ و ده كتر اوى و عمال بيزيد يا اما يكون لاعب فى العداد و فجاءه الاقى نفسى رايح مشوار امبارح ب 60 جنيه اركب مع سواق يوصلنى ب 110 جنيه ياعم ازاى هو كده ادفع و انت ساكت و حسبت الكيلوات و وقت الانتظار المكتوب فى العداد اول مروحت لاقيتهم 55 جنيه ده غير المعامله الزفت او السواقه الزفت و تاليف الطرق الزحمه و الطويله

مع اوبر و كريم بس يدفعو ضرايب عن المشوار الواحد عشان يبقى فى منافسه حقيقه مينفعش ادفع بتوع التاكسى ضرايب و الملاكى ميدفعش و هو بيعمل نفس الشغل بس كده

اخيرا اوبر داخله فى صراع مع كل الدول الى شغاله فيها مش مصر سواقين التاكسى فى العالم كله قرفانين منها و ممكن تعمل بحث عن الموضوع ف احسن اننا ننظم الموضوع قانونا و يدفعو الضرايب و الدنيا تمشى بس يتحاسبو على كل المشوار الى بيعملوه فقط مش بالسنه او الشهر و خلاص

**Amr_MO** · 13-02-2016 08:25 PM

المشاركة الأصلية كتبت بواسطة م أحمد

عزيزي سائق التاكسي
حقيقي مش حقدر اتعاطف معاك ولا مع التأمينات و الضرائب اللي بتدفعها للبلد مش ازمتي
انت لو مشيت عدل و بإحترام مكنش حد ححتاج uber و careem و كانت العلاقه بينا حتبقى احسن من كده
- انت بتلعب في العداد
- بتتنك علينا وقت الذروة و تفضل تبيع و تشتري فينا
- بتساومنا في عز احتياجنا ليك في البرد و المطر و الحر
- بتعتبر مشوار المطار سفر وتبقى عايز تاخد فلوس كتير حتى لو انا ساكنه في آخر شارع المطار
- بتطلع عين أهالينا علشان تشغلنا التكييف في الصيف و تقولنا اصل نسيت اشحن الفريون
الفريون شاحح قوي عند كل السواقين واضح
- بتشغل اغاني زباله و بتعلي الكاسيت و مبترضاش توطيه
- بتخاف من مدينة نصر وشارع الهرم و كوبري أكتوبر و شارع 26 يوليو و شارع البطل عبد العزيز و صلاح سالم ومن كورنيش المعادي
امال حضرتك عايز تروح فين
- بتستغل السياح و تاخد منهم فلوس أضعاف أضعاف أضعاف المشوار
بعد ده كله عايزني اتعاطف و احس انك في خطر

و متحاولوش تلعبوا علي مشاعرنا علشان احنا مشاعرنا ماتت خلاص و اتعودنا علي العربيات النضيفه و السواقين ولاد الناس

و زيادة من عندى : يقف و يختار المشوار

الله ينور عليك بجد جبت من الآخر

مشاهدة نتائج الإستطلاع: هل يتم منع اوبر وكريم فى مصرنا المحروسه

الموضوع: موضوع للنقاش ياترى احنا مع ولا ضد اوبر وكريم

LinkBack

أدوات الموضوع

عرض

-

-

-

-

المواضيع المتشابهه

موضوع للنقاش

ياترى احنا كام واحد هنا ؟ دعوه لمالكي الباندا ! إجمع !!

رش vs رم ؟؟؟؟ موضوع للنقاش

موضوع مهم للنقاش جدا

الكلمات الدلالية لهذا الموضوع

المفضلات

المفضلات

ضوابط المشاركة