الموضوع: موضوع للنقاش ياترى احنا مع ولا ضد اوبر وكريم

معاها طبعا لان كده كده سواقين التاكسى مش ملتزمين بالقانون الى بيطالبو بتطبيقه اولا هو الى بينقى يروح فين و ده بيخلى الناس تقف بالساعات من غير وسيله مواصلات ثانيا عدم التزام بالعداد بص يا سيدى يا اما يقولك العداد بايظ و ده كتر اوى و عمال بيزيد يا اما يكون لاعب فى العداد و فجاءه الاقى نفسى رايح مشوار امبارح ب 60 جنيه اركب مع سواق يوصلنى ب 110 جنيه ياعم ازاى هو كده ادفع و انت ساكت و حسبت الكيلوات و وقت الانتظار المكتوب فى العداد اول مروحت لاقيتهم 55 جنيه ده غير المعامله الزفت او السواقه الزفت و تاليف الطرق الزحمه و الطويله

مع اوبر و كريم بس يدفعو ضرايب عن المشوار الواحد عشان يبقى فى منافسه حقيقه مينفعش ادفع بتوع التاكسى ضرايب و الملاكى ميدفعش و هو بيعمل نفس الشغل بس كده

اخيرا اوبر داخله فى صراع مع كل الدول الى شغاله فيها مش مصر سواقين التاكسى فى العالم كله قرفانين منها و ممكن تعمل بحث عن الموضوع ف احسن اننا ننظم الموضوع قانونا و يدفعو الضرايب و الدنيا تمشى بس يتحاسبو على كل المشوار الى بيعملوه فقط مش بالسنه او الشهر و خلاص

فيه شبه اجماع على رفض بلطجة بعض سائقي التاكسي
الحل ليس في سحقهم
الحل في تقويمهم و اصلاحهم ...بمراقبتهم بالقانون و تطبيقه عليهم
الناس دية عليها اقساط و ده مصدر دخلهم الوحيد
ماذا تظنوهم فاعلون اذا انقطع عيشهم..........سيتجهوا للجريمة بلا تردد
افضل النظر لبعيد و ليس للمصلحة الوقتية...وان انحي مشاعر الغضب عند وزن الامور

انا مع اوبر قلبا وقالبا, بصراحه سواقين التاكسى لو هما بيراعوا اكل عيشهم مكنش الناس قرفت منهم
اول ما نزل التاكسى الابيض ابو عداد الناس فرحت بيه جدا, حتى لو كان حيبقى اغلى شويه من التاكسى العادى , بس كفايه ان العداد حيكون موجود و مقعدش احمل هم الخناقه مع سواق التاكسى, وكان بيقبل اى مشوار لانه مشغل العداد.
حاليا التاكسى الابيض زى اللى قبله, عداد مقفول , تقدير جزافى و تعسفى, تناكه فى المشوار , لا مروحش لا مدخلش, فطبيعى الناس قرفت منه.
على الاقل مع كريم واوبر , يوم ما يضيق بيا الحال حلاقى شركه اكلمها اخد منها حقى, انما السواق دا حتكلم معاه ازاى, وحاخد حقى منه ازاى.
للاسف سواقين التاكسى لا بيطبقوا قانون ولا بيحترموا عميل .

سبجان الله فعلا شبه اجماع ان الناس عايزه الخدمه النظيفه حتى لو هدفع اكتر يعنى ادفع مقابل حاجه اخدها بس لازم تقنين وضع سواقين التاكسى وفعلا تقويمهم هو الحل مع تطبيق قانون عليهم

أنا ضد أوبر وكريم

ومع سواقين التاكسي البلطجية قلبا وقالبا

عشان احنا وطن مينفعش يبقى نضيف وتتقدم فيه خدمة محترمة

فاشمعنى دي يعني اللي هتمشي

لازم يتقتل جوانا أي حلم أو أمل أو ضوء أخضر

لازم تحطموناااااا

اكيد طبعا بلا نقاش معا استمرار اوبر وكريم
وعلشان نسكت بلطجية التاكسى اللي بقى كل همهم هو فين حق الدولة من الضرائب والتامينات
فجأة واحدة بقى حامى الحما
لازم تقنين وضع الشركات دى
الشركات دي اصبحت امر مفروض ولا يمكن الفرار منه

بالمناسبة كان في بوست منشور على الفيس بوك على لسان سائق اوبر
بيقول : كان في شارع رمسيس ومعاه عميل وفي رائد شرطة واقف في اشارة وجنبه واقف سواق تاكسى ابيض
سواق التاكسى بيقول للظابط ياباشا امسك الراجل ده واسحب رخصه علشان مشغل عربيته في اوبر تاكسى وده ممنوع راح الرائد سال سواق اوبر رد عليه قاله لا انا مش تبع اوبر خالص
الرائد سأل سواق التاكسى انت عرفت ازاي انه اوبر قاله علشان رابط الحزام !!!!!!!
راح الظابط نده لامين الشرطة قاله اعمل مخالفة حزام لسواق التاكسى
تتخيل ان دي عقليات ينفع تتعامل معاهم
----------------
قصة تانية برضه حصلت
سواق اوبر كان معاه عميلة قاعدة ورا على الكنبة
اتفاجئ انه في كمين مش بيعدى عربية الا مايشوف الرخص
راح وقف على اليمين وشغل الانتظار
جاله امين الشرطة بيقوله واقف كده ليه
قاله مستنيين زمايلنا بيشترو حاجة وجايين على طول
امين الشرطة قاله ماينفعش تقف كده حرك العربية واطلع قدام واستناهم براحتك
راح ناطط على كرسى السواق وخد العربية ويا فكيك