الموضوع: ترموستات استرا اتش وفكترا سي map controlled thermostat

طبعا في مواضيع كتير جدا قيمه اتكلمت على فوائد الترموستات وليه غلط يتلغي .. مش هتكلم عنها هنا واللي ميعرفهاش ياريت يدور على المواضيع دي الاول لان اللي جاي مبني عليها.


الترموستات اللي هنتكلم عليه بالتفاصيل موجود في :

مواتير استرا اتش
z16xep
z16xe1
z16xer
موتور فكترا سي
z16xep

الترموستات فالعربيات دي ذكي وبيتم ترحيل او تعديل درجات التشغيل بتاعته عن طريق الكنترول بتاع الموتور

بمعنى الترموستات العادي القديم اللي مش متصل بكنترول الموتور بيشتغل بانه بيتمدد لما الميه اللي موجوده فيه تسخن فيفتح عند درجه حراره متصمم عليها مسبقا وكل مره هيفتح عند نفس درجه الحراره دي (لوسليم)
الميه لما بتبرد بينكمش و يبدا يقفل البلف عند درجه حراره معينه متصمم عليها كل مره هيقفل عندها (لو فضل سليم :) )

طبعا عشان يخلي الموتور في رينج درجه حراره التشغيل المصمم عليها واالي بيكون عندها اقل تاكل و افضل توفير بنزين و اعلى اداء

عامتا التحكم في الحراره صعب جدا ومحتاج رد فعل سريع او حتى يتنبأ قبل ميحصل سخونه اصلا !!! لان السيطره على الحراره مش سهل
ازاي يعني ؟

يعني انا عايز الترموستات يفتح عند درجه حراره اعلى في الوقت اللي بكون مش قارص على الموتور ومش طالع مطلع جامد ولا في حمل على الموتور

وعايز الترموستات يفتح عند درجه حراره اقل لو في حمل على الموتور زي الحرق الجامد او طلوع مطلع جامد فاكيد الحراره الناتجه عن الحمل هتكون زايده عن الطبيعي فمفروض اتنبأ وافتح الترموستات بدري قبل مالميه تسخن

طبعا الترموستات التقليدي مش بيعمل كدا هيفتح عند درجه معينه ويقفل عند درجه معينه متصمم عليها وليكن هيفتح عند 100 هيفضل يفتح عندها ملوش دعوه بحاله او وضع الموتور

طب ازاي الترموستات بتاعنا بيغير درجات الحراره بتاعه الفتح والقفل ومش بتكون ثابته على طول ؟




الترموستات بتاعنا شغال زي القديم بالتمدد يعني الميه تسخن جواه يتمدد يفتح تبرد ينكمش يقفل لكن الجديد انه الترموستات مزروع جواه سخان heater متوصل بكنترول الموتور

لو كنترول الموتور حس ان الموتور متحمل عليه وهيسخن يلحق يبعت اشاره للسخان يسخن الترموستات فيضيف طاقه حراريه مجموعه على حراره الميه اللي جواه اصلا فهيفتح عند درجه حراره اقل من الحقيقيه

"يلحق البلا قبل وقوعه يعني"

لو الوضع رجع طبيعي والموتور اصبح مش متحمل عيه السخان هيفصل و يرجع الترموستات كانه ترموستات تقليدي يفتح ويفل بالتمدد عادي جدا وهيفتح عند درجه حراره عاليه عشان يوفر بنزين


معلومات عن دوره التبريد


موتور z16xep
دوره الميه لو فاضيه خالص تاخد 6.3 لتر

موتور z16xe1
دوره الميه لو فاضيه خالص تاخد 5.9 لتر

موتور z16xer
دوره الميه لو فاضيه خالص تاخد 6.9 لتر


طلمبه الميه بتضخ 160 لتر فالدقيقه عند 6000 RPM

الترموستات بيفتح بالتمدد بدون تدخل الكنترول (بدون تشغيل السخان) عند 105 درجه
بيفتح بتدخل الكنترول بتشغيل السخان عند 90 درجه


لما الترموستات بيخرف غالبا بيعلق على الفتح لانه متصمم على كدا .. في حاجه اسمها الوضع عند التلف fail safe state
نادرا مابيخالف القاعده ويعلق على القفل (السواق الحقيقي بس هيلحق الموتور)

الكود اللي بيتسجل

P0115 وده ممكن حاجات كتير من ضمنها الترموستات الكود ده باختصال كنترول الموتور مستغرب درجه حراره الميه او مش عاجباه

لو درجه الحراره مش بتوصل ل 103 ابدا !!! كدا في مشكله فالترموستات انه معلق عالفتح

وللتاكيد العربيه فيها اتنين كولنت او اتنين حساس لدرجه الحراره واحد عالموتور وواحد على الردياتير

لو الترموستات معلق عالفتح

هتلاقي درجه حراره الميه فالردياتير هتزيد و حراره الموتور لسه موصلتش 103 ... الكلام ده يتشاف بجهاز الاعطال طبعا

او وانت ماشي هتجيب التيست مود وتابع درجه حراره الموتور لو بتبرد جامد مع المشي كدا الترموستات معلق عالفتح


في كود تاني P1217 ده الكنترول بيحس ان الترموستات علق على القفل لان درجه حراره الردياتير هتكون بارده والموتور هيكون سخن

في اكواد تانيه زي P1116 ده خلل كهربي في دايره السخان او السخان نفسه باظ اللي موجود جوا الترموستات


https://www.youtube.com/watch?v=A2AfMX1PcwU

الله ينور عليك يا احمد باشا .... وبصراحة بعد تجربة الثرموثتات مهم جدا وبيفرق كتير مع اداء العربية ومش خسارة فيه ال 1000 جنيه بس لازم اصلي جديد ومعاه الجوان بتاعه اصلي برضه