خناقه محترمه مع كهربائي حمار

**dr.mero90** · 19-03-2016 11:31 PM

السلام عليكم و رحمه الله و بركاته
طبعا انا حكيت لحضراتكم عن الحادثه اللي حصلتلي من شهر و نص و العربيه اتدمرت و الحمد لله خلصت دهان يوم الخميس و لسه مستلمها امبارح من السمكري اخدتها بقي انهارده للعفشجي ربطنا ع العفشه و كل حاجه تمام رحت لكهربائي و قولتله عاوز اركب كتاوت للنور و تظبطلي رجلاش النور و هنا ابتدت المشكله البيه مش عارف اصلا يعني ايه كتاوت و شكلا كده اول مره يوصلها كتبلي شويه حاجات كده كلبسات و شيكارتون و سلوك وكده و خلاني بشتري الحاجه و راح مغير الفيوز بتاع النور بفيوز اكبر من المقاس عشان لو لط ف حاجه او وصل توصيله غلط الفيوز ما يفضحوش
طبعا انا رحت اشتريت كل حاجه و رجعتله تاني و مش اخدت بالي من الفيوز بس اخدت بالي انه بيوصل سلك و يقعد ساعه يفكر عشان يعرف هيعمل ايه بعد كده و سيبته و قولت يمكن تعبان و لا حاجه سيبه براحته قعدت عنده يجي 3 ساعات كل شويه يختفي من قدامي و مش الاقيه و ف الاخر وصل الكتاوت و لسه بجرب و العربيه قالت خد عندك بقي الاشاه اللي كنت مركبها عماله تشتغل و تطفي لوحدها و صابع الولاعه بقي نااااار اللمبات اللي ف التابلوه كلها اتحرقت و انا هتجنن ازاى ده حصل و الفيوز مش فصل رحت نازل فاتح كابوت العربيه و مطلع الفيوز لقيته مغير مقاس كام فيوز كده بارقام اكبر رحت مطلع الفيوزات بكل احترام و قولتله هات الفلوس اللي اخدتها و رحت نايم تحت العربيه و واخد العده و فاكك كل حاجه ركبها و قومت من تحت عربيتي نفضت نفسي من التراب و بقوله يعني مش حرام عليك تحرق ضفيره العربيه كلها عشان اتحرجت تقول انك مش هتعرف توصل كتاوت قاللي و انت هتعمل عليا مهندس و ايه يعني شويه لمبات اتحرقت ف ستين داهيه اجيبلك غيرهم ساعتها بقي ما حسيتش بنفسي الا و انا بقطع علي جسمه السلك بتاع الكتاوت مش عارف دا حصل بس هو استفزني و اتغر ف اني بكلمه باحترام و هدوء
انا مش عارف اللي عملته صح و لا غلط بس اعذروني اي واحد منكم كان مكاني كان هيعمل اكتر من كده لما تلاقي عربيتك بتتحرق قدام عينيك بسبب صنايعي حمار

**EgyArmy** · 19-03-2016 11:39 PM

انا كنت ضد فكرة العراك زمان بس حاليا اقسم بالله العظيم انت رد فعلك بالنسبالى حاليا يعتبر هادى ده اقل واجب غيرى هيقولك انت فى مكانه و ممكن تحصل مشاكل اكبر بسبب الصنايعيه و الجيران هقولك العمر واحد و الرب واحد انا بقيت اهزق ناس و اتعارك مع ناس فى محافظات تانيه اساسا بره اسكندرية حتى و مش بفكر فى المنطلق ده طول مانت صح ربنا هينزل عليك قوة سواء فى الكلام او الصحه متعرفش جت منين هتقولولى كدة مش دولة و مخالف للقانون هقولكم هيا كدة يا أما هتعيش ضميرك مأنبك و حاسس انك عمرك مااخدت ولا هتاخد حق يعنى انتوا متخيلين ان المفروض كان يرفع قضيه عليه مثلا ؟ فلتكن غابه يا شعب

**dr.mero90** · 19-03-2016 11:40 PM

نسيت اقول لحضراتكم اني اكتشفت بعد اللي حصل ان مش هو صاحب الورشه و انه صبي هناك و ان صاحب الورشه كان بيصلح عربيه عطلانه و طبعا دي كانت اول مره اروح للورشه دي و اللي بعتني هناك كان العفشجي و من ثقتي ف العفشجي المحترم وثقت ف اختياره و رحت على طول و استحملت عشان الشغل و بعد اللي حصل جه صاحب الورشه و صلح الحاجه علي حسابه و انا كنت مقهور ع الحاجه اللي اتحرقت و منهم طبعا الشاشه اللي راحت ف داهيه و مش رضيت اخد من صاحب الورشه فلوس و لا اخليه يجيبلي غيرها هو قعد يحلف بالطلاق انه لازم يغير الحاجه اللي باظت علي حسابه قولتله عشان الحلفان بس هخليك تغير لمبه التابلوه ام 2 جنيه و بس كده مش عاوز منك حاجه و حسبنا الله و نعم الوكيل فيك و ف اللي خلاك تشغل واحد زى ده عندك

**dr.mero90** · 19-03-2016 11:43 PM

المشاركة الأصلية كتبت بواسطة egyarmy

انا كنت ضد فكرة العراك زمان بس حاليا اقسم بالله العظيم انت رد فعلك بالنسبالى حاليا يعتبر هادى ده اقل واجب غيرى هيقولك انت فى مكانه و ممكن تحصل مشاكل اكبر بسبب الصنايعيه و الجيران هقولك العمر واحد و الرب واحد انا بقيت اهزق ناس و اتعارك مع ناس فى محافظات تانيه اساسا بره اسكندرية حتى و مش بفكر فى المنطلق ده طول مانت صح ربنا هينزل عليك قوة سواء فى الكلام او الصحه متعرفش جت منين هتقولولى كدة مش دولة و مخالف للقانون هقولكم هيا كدة يا أما هتعيش ضميرك مأنبك و حاسس انك عمرك مااخدت ولا هتاخد حق يعنى انتوا متخيلين ان المفروض كان يرفع قضيه عليه مثلا ؟ فلتكن غابه يا شعب

و الله يا فندم انا ضد فكره العنف اصلا بس هو اللي استفزني و خرجني عن شعورى بكلامه الغبي و انا مش النوعيه اللي بتمشي تتخانق مع اي حد بالعكس انا لما بقع ف مشكله بيبقي اخر اختيار بالنسبه لي هو العنف لاني مش من النوعيه اللي بعرف اشتم و اعمل مهرجان بالكلام لما بتعصب ببقي مش شايف حاجه خالص و مش بعرف اتكلم و ممكن افضل اضرب ف اللي قدامي لحد ما يموت

**MaZaGAngeE** · 19-03-2016 11:52 PM

انت صج انك روقته ...

**dr.mero90** · 20-03-2016 12:09 AM

المشاركة الأصلية كتبت بواسطة mazagangee

انت صج انك روقته ...

تعرف حضرتك ان اللي انقذه من ايدي بنت صغيره عندها يجي 6 شهور تقريبا علي دراع مامتها
انا نازل ضرب فيه و اول ما عيني جت ف عينها و عينها خايفه و بتعيط من المنظر اتمنيت الارض تتشق و تبلعني و الغريب اكتر ان مفيش حد من الناس رغم ده كله حاول حتي يحوشني عنه هي الناس مالها يا جدعان طب افرض اني ظالم و بضربه ظلم هتقفو تتفرجو بردو ؟
استرها معانا يا رب

**MaZaGAngeE** · 20-03-2016 11:20 AM

المشاركة الأصلية كتبت بواسطة dr.mero90

تعرف حضرتك ان اللي انقذه من ايدي بنت صغيره عندها يجي 6 شهور تقريبا علي دراع مامتها
انا نازل ضرب فيه و اول ما عيني جت ف عينها و عينها خايفه و بتعيط من المنظر اتمنيت الارض تتشق و تبلعني و الغريب اكتر ان مفيش حد من الناس رغم ده كله حاول حتي يحوشني عنه هي الناس مالها يا جدعان طب افرض اني ظالم و بضربه ظلم هتقفو تتفرجو بردو ؟
استرها معانا يا رب

الناس وصلت لمرحلة من القرف و الزهق و الملل من الوضع الحالي .....

**Mohamed Desoky** · 20-03-2016 11:42 AM

السلام عليكم ورحمة الله وبركاته اى واحد تروحله فى اى مهنه عمره مايقول مش عارف لازم يشتغل يعمل اى حاجه المهم الفلوس الفلوس وبس ياساده احنا فى دوله بتشحت من الخارج والداخل صبح صبح ياعم الحاج 5ج منتظرين ايه من البلد اوالشعب كله حاتط ايده فى جيب التانى ناس بتبيع ضميرها وشرفها بلفلوس بنسرق ومفيش انتاج مستعجلين على الفاضى الشعب ده مات اكلينكيه لا يشعر لايحب لايخاف الله كلنا هالكون اللى من رحمه الله