الموضوع: أتمنى منكُم المشوره فى شراء سياره ومعى 150.000 جنيه

طالما هتستخدمها في ذيادة دخلك (عمل ) يبقي لازم اولوياتك تبقي الاتي
1- زيرو
2- فتيس مانوال وبما انه مش متوفر دلوقتي في 95% من الموديلات يبقي تتاكد ان العربيه اللي هتختارها محدش اشتكي من الفتيس الاوتوماتك بتاعها
3- توكيل محترم وقطع غيار متوفره خارج التوكيل باسعار مقبوله وخاصة العرضه للتلطيش لا قدر الله ( فوانيس - مرايات - اكصدامات - الخ)
4- ما يكنش توكيلها غبور او منصور
5- بعد ما تستقر علي العربيه وقبل الشراء تدخل تقرأ كل كلمه اتقالت عنها من ملاكها علي المنتديات وتعرف عيوبها ومميزاتها وبما ان مفيش عربيه ما فيهاش عيوب يبقي تتاكد انك معندكش مشكله مع العيوب ده ..

واخيرا لازم تكون عامل حسابك انك انت اللي هتشتغل علي العربيه مش هتديها لسواق

المشاركة الأصلية كتبت بواسطة muhammad ahmad

hany121
بدءً جزاك الله خيراً
هاتكون زيرو ان شاء الله
وأعتقد إن مانيوال فى الطرق هنا صعب جداً
شارك وسنترا وهيونداى وكيا والأقرب شارك واللهُ المستعان
طيب عندنا توكيلات إيه تثق فيها وعيوب غبور ومنصور كبيره بالشكل ده
بفضل الله حتى الأن مُستمر بالقرآه عن الموديلات المذكوره
ان شاء الله لن أعُطيها لأحد
سلمت يمناك يالغالى
عَفاك الله وراعاك

المانوال متعبه فعلا لكن كعملانيه وشغل افضل من الاتوماتيك وبلا اعطال تقريبا
التوكيلات السيئه مشاكلهم وبلاويهم ماليه المنتديات (سوء معاملة العميل لدرجه بتوصل ان موظفيهم يشتموا العميل وحاجات تانيه علي شاكلة اخبط دماغك في الحيط- بيتهربوا من مسئولية اصلاح اعطال عيوب الصناعه - اختراع صيانات بينيه (بين الصيانات المتعارفه اللي هي كل 10 الاف فيقولك صيانة 5 و 15و25 الف الخ) للتشييك علي العربيه ومراجعة السوائل وتربيط عفشه وطبعا مش ببلاش بالرغم ان وكيل كيا بيعملها ببلاش والاكتر انه يقولك لو ما عملتش الصيانة البينيه تسقط من الضمان؟؟ّ!! يعني لما تروح بعد 22 الف كيلومتر ويقولك الطنابير عايزه تتغير تقوله متغيرها العربيه لسه في الضمان يقولك لا العربيه خرجت من الضمان علشان سيادتك ما عملتش صيانة ال 5 الاف وال 15 الف قال يعني لو كنت عملتهم الطنابير ما كانتش هتبوظ!!!

طيب يا سيدي مهو انا عملت صيانة الالف وال10 الاف وال20 الف يقولك ده النظام ...

من تعاملي الشخصي وتجارب بعض الاعضاء اقدر اقولك ان توكيل eim اللي هو وكيل كيا ورينو الافضل نسبيا.. في احد الاعضاء كان كاتب انه كان عندوا مشكله في رينو فلونس والناس خيروه بين عربيه جديده واعتقد فئه اعلي من اللي كانت معاه او يسترد فلوسه وفي المقابل بعض التوكيلات ممكن تخلي العميل يضطر للجوء لحماية المستهلك والقضاء علشان مشكله تتحل بالف ولا الفين جنيه

ربنا يوفقك لما فيه الخير لك استاذ محمد ..

انا لما اتكلمت عن توكيل eim مكانش قصدي اوجهك للسيراتو لاني عارف ان الفئه الاولي خارج ميزانيتك ده غير انها فاضيه وما تستاهلش سعرها زي كل الموجود في السوق للاسف لكن انا كنت بأدي لحضرتك مثال فقط. ..

لو كنت بتخطط لتشغيلها مع اوبر او كريم حاول تشتري قبل ما يقننوا اوضاعهم علشان احتمال ناس كتير تلجأ للشراء وطبعا التجار القنوعه بتعنتا ممكن يرفعوا الاسعار...