أشترى رينو لوجان أعلى فئة و لا نيو أوبترا 2016 حد يساعدنا ارجوكم

**engphp** · 14-05-2016 03:19 AM

أشترى رينو لوجان أعلى فئة و لا نيو أوبترا 2016 حد يساعدنا ارجوكم

الرينو لوجان الفئة الاعلى سعرها بقى 146000
النيو اوبترا 2016 بقت 143000

اشترى مين
مين احسن و ينفع فى السفر
و الامان
اداء كويس
حد يفيدنا بالله عليكم

**adel_edrees** · 14-05-2016 06:29 PM

و الله لا دى و لا دى زود شوية و هات السينترا

**bluemail** · 15-05-2016 06:08 AM

حاول تشوف النترا hd
او نيسان سنترا
بالتوفيق

**adel_edrees** · 15-05-2016 08:48 AM

السنترا فيها فئتين الأولى ب 161 ألف و الثانية ب 170 ألف الفرق بين الأثنين أن الأولى مش موجود فيها كشافات ضباب و جنط 16 و سبويلر و النظام الذكى لركن السيارة و فوانيس ليد عجلة القيادة من الجلد و نقل الحركة منى عجلة القيادة حامل أكواب خلفي و مسند يد خلفى اللوجان أنا سمعت أن سعر ها و صل ل 148 ألف جنيه لكن أنا شايبف أن الفرق يستاهل السنترا عربية تانية خالص و بتتجمع فى مصر يعنى رخص و توافر قطع الغيار و ألا يقوللك أستنى لما نجيبها فرنسا و لا ديولو أنا بأنصحك نصيحة أخ

**Colin Chapman** · 15-05-2016 05:24 PM

المشاركة الأصلية كتبت بواسطة engphp

اولا شكرا ليكم كلكم

ثانيا الميزانية هى الى تحكم فانا بسال عن افضل شئ فى ميزانية لا تزيد عن 145 الف
و بالتالى هيبقى اللوجان و الشيفورلية هما المقارنة
و طبعا اثناء منا بكتب ردى هنا فهتلاقوا ان الشيفورلية قلت و اختفت فى المعارض و هتزل تانى من يوم 17-5 و سعرها هيوصل 148 الف
اما الرينو فهى ثابتة حتى اللحظة على 146 الف و فى خبر انها هتوصل الى 155 الف خلال اسبوع تقريبا

فمبدئا الى عاوز يشترى و ينجز حتى لو قسط لانه مستفيد

بالنسبة بقى للإسطوانة بتاعة
الرينو وحشة
الرينو قطع غيارها مش موجودة و لو موجودة غالية

فانا بقالى 12 يوم بلف على العربية و تفاصيلها فى الشوارع

فى صقر قريش هتلاقوا مكانيكية بالهبل للرينو
و فى اماكن بتبيع قطع غيار للرينو كويسة
مثلا
واحد ميكانيكى لما سالتة قالى الرينو وحشة و قالى فانوس الجنب يعمل 1000 جنية حرام عليك عيالك و قعد بقى مشغل الاسطوانة اياها
و لما رحت اسال على المراية كهربا لقيتها 350 بالضبط
تيل الفرامل بتاعها و انضفهم 225
ده سعر اليوم على فكرة

و بعدين الى بيركب عربية بيبقى عارف انه هيدفع قطع غيار
يعنى على كلامكم الى نفسة يجيب عربية بى ام ميشتريهاش لان قطع غيارها غالية
او لان الميكانيكى مش فاهم ماتورها لانه صعب علية فنروح نشترى عربية ماركة معينة عشان خاطر الميكانيكى
قال يعنى بنشتريها لية هو

و بعدين
فين منطق
بدفع كم مقابل اية

يعنى ادفع 148 الف فى شيفورلية ملهاش ملة

و لا عارفين اصلها و حتى اصحاب توكيلها راكبين المانى
هاخد اية منها عشان ادفعلها 148 الف
و لو اتحطط مقارنة مع رينو فالرينو تكسب لانه اصلا مفيش وجة مقارنة
صينى و فرنساوى
تقفيل مصرى و تقفيل مغربى
قطع صينى و اتجمعت فى مصر
و التانية فرنساوى او داتشيا رومانى او عفريت حتى المهم مش صينى

ارجوكم ابتعدوا عن الخرافات و ادخلوا اى عربية و شوفوها قبل متحكموا عليها
احنا بنشترى عربيات لنفسينا مش للميكانيكى

و لا عشان اصحابنها و لا حاجة
و امان عيالنا اهم حاجة افتكروها كويس

**رامي مصطفى** · 15-05-2016 07:34 PM

حضرتك طلبت مشوره في لوجان ولا اوبترا في اول الموضوع وبعدها مدحت في اللوجان وعايبت على الاوبترا وان اي صيني لو ببلاش مالوش لازمه!!!!!
هل حضرتك اقتنعت ولا لسه مذبذب او ايه اللي حصل

**adel_edrees** · 15-05-2016 09:47 PM

معلش هوه حضرتك داخل بتسأل أيه رأينا و ألا حضرتك مقرر أنت عايز تشترى أيه و ألا أنت بينك و ما بين نفسك عايز ترد على نفسك أن الشيفروليه صينى و أن اللوجان قطع غيارها موجودة و سعرها حيزيد فأنزل أشتريها بكره و خلاص أنا ما قلتش أن الرينو وحشة و لا الشيفروليه وحشة أنا بأقول أنها كانت حلوة لما كات الشكل القديم ب 80 الف الأوتوماتيك لكن لما تغلى الغلو الفاحش ده يبقى لا و ألف لا حضرتك شكلك مقرر عموما ألف مبروك مقدما و ربنا يديك خيرها و يكفيك شرها بس فى حاجة أنا مقتنع بيها value for money القيمة مقابل الفلوس أو القيمة مقابل ما سأدفعه و فى النقطة دى بالذات العربيتين اللى حضرتك قلت عليهم سواء الأوبترا أو اللوجان يستحقوا صفر فى موضوع القيمة مقابل ما سأدفعه