السلام عليكم يا شباب
عربيتي فيات 128
من اسبوع كده سير الكاتينه باظ وانا ماشى )جزء منه تآكل ( مكتتش اعرف حاولت ادور العربيه اكتر من مره روحت للميكانيكي وقالى هنغيره بي بنسبه كبيره العربيه جابت صبابات
وقد كان اتغير .. صوت تكته جامده فى الموتور
قالى هنحل المكنه ونشوف .. جبت طقم صبابات جديد و غيرت جوانات الموتور ... ركب الخراط وظبط الوش .. استلمت العربيه بس عندي مشكله كبيره ... مشكله السخونه .. اول ما بدور العربيه مفيش 3 اربع دقائق والمروحه تشتغل ومبتفصلش ... رجعت للخراط عشان اشوف التاكيهات فتح وشاف .. قالى كله مظبوط واحد بس كان قافل 5 مم .. وقالى فى ركبه عندك بايظه .. بس دى ماتعملش سخونه ... تعمل صوت بس ولما تضيع خالص نبقى نغير عامود الكامه ... جربت العربيه تانى ... نزلت مشوار كان اخر النهار عشان اقدر احكم على العربيه ميكنش الجو حر جدا .. المروحه اشتغلت مافصلتش طول الطريق وانا ماشى طريق مصر اسماعيلية يعنى طريق مفتوح ركنت العربيه بتاع نص ساعه ولا ساعه الا ربع جيت ادور تانى وقبل ماتحرك المروحه اشتغلت تانى وفضلت شغاله لحد لما وصلت البيت ... مع العلم دورة المايه كويسه لسه عاملها صيانه كامله ريدياتير 3 ماسوره نحاس وثرموستات 80/90 ومكنتش بتعمل كده قبل الموضوع ده كله ... الميكانيكي لما رجعتله امبارح بيقولى هاتلى قاعده موتور ( عشان كان قايلي هنغيرها ) وممكن الكاتينه يكون فيها سنه وده اللى بيسخن العربيه .. طبعا انا مش مقطنع بكلامه ده ... العربيه كده مابتبردش وبتسخن بسرعه جدا وبالذات على الطوالى ... وللعلم انا معنديش مؤشر حراره بس انا عارف العربيه كانت بتمشى ازاى ودلوقتى ازاى .. وللعلم برضو الموتور كان اول مره يتحل وهو موتور 1100 ومن بعد ما رجع من عنده بقى فايق عن الاول ... ياريت تفيدونى انا لحد دلوقتى صارف 800 جنيه والعربيه مبحركهاش :(