الموضوع: مقارنة بين النيسان صنى والتويوتا كرولا 1300 اوتوماتيك

الاخوة الكرام
من خلال تجريتى مع التويوتا الكورولا اقدر اقولك مميزات وعيوب الكرولا 1300 اتوماتيك 2006 وقد حاولت ان اكون موضوعى بشكل كبير – اقول ال ليها وال عليها بدون مجاملة ولا ظلم ولكن كل هذه المميزات والعيوب من وجهة نظرى انا فقط وقد تختلف من شخص الى اخر ويسعدنى مشاركة الاخوة الكرام بوجهة نظرهم

المميزات:
-اقتصادية جدا فى استهلاك البنزين
-تكيفها تلاجة - تشغله على سرعة مروحة 1 فقط والا هتتجمد - ولا يؤثر على سحب العربية ولا يكلبش الموتور عكس الانسر
-مرتفعة عن الارض يعنى متخافش من المطبات الصناعية العالية خصوصا لو معاك ناس كتير فى العربية وايضا تعرف تنزل منها براحتك لو ركنت جنب رصيف عالى (الباب هيفتح بسهولة علشان عالى عن الرصيف ومش هيخبط فى الرصيف كما فى العربيات المخفضة) ومش تقعد تنط جوا الصالون من كرسى لكرسى علشان تنزل من الباب التانى (عندى تجربة اليمة مع ارصفة الشوارع الداخلية والانسر القديمة المنخفضة على الارض)
-عفشة وباور ومساعدين ودواسات ناعمين جدا عكس الانسر
-كاوتش للخدمة الشاقة لزوم مطبات ونقر شوارع مصر
-الثبات والهدوء (ترمى الابرة ترن فى الصالون) حتى فى السرعات العالية تحس انك ماشى على سرعة 20 كم
-تابلوه ابانوس وصالون فخم
-واسعة من الداخل والكراسى واسعة و مريحة
-ميزة ضم المريات بالكهرباء دى مش موجودة فى اغلب العربيات ودى تنفعك اوى لو ماشى فى شارع داخلى زنقة وفى عربية داخلة عكسك – تضم المريات فى السريع بدوسة زرار
-اضائة شديدة فى الفوانيس الامامية تخليك تشوف الطريق بوضوح فى الليل وايضا نور الصالون جامد اوى
-ميزة الشريحة الالكترونية فى المفتاح - لازم المفتاح الاصلى هو ال يدور الموتور فقط - يعنى لايمكن تدور الموتور بأى طريقة اخرى (يعنى مفيش حرامى يسرقها - بس اوعى تضيع المفتاح الاصلى)
-معزولة بلكك وفلتو كويس وخصوصا فى الخلف - يعنى مفيش صدا ولا برومة
-ممكن تسوجر الشنطة الخلفية لو هتضع فيها اشياء ثمينة وتلغى خاصية فتح الشنطة من الداخل – وكمان عاملين مفتاح مخصوص احتياطى لا يفتح الشنطة علشان تسيب المفتاح ده ما سايس الجراج وتبقى مطمن انه مش هيعرف يفتح الشنطة ولا من جوه ولا بالمفتاح ال معه
-احزمة الامان ناعمة اوى ومش خنيقة ولاتقفش على صدرك كما فى السيارات الاخرى – تحس انك مش لابسها
-شكلها شيك وبرستيج عالى جدا
-سعرها ثابت ومش هتخسر فيها لو حبيت تبيعها بعد كده لانها مطلوبة ومعروف سعر سوقها كام
-بيعها سهل اوى ومطلوبة دائما وخصوصا الاتوماتيك (اغلب الستات مبيعرفوش يسوقوا المانيوال والستات هى صاحبة القرار فى الاغلب) يعنى الكورولا مش هتقعد فى ارابيزك زى عربيات تانية تقيلة فى بيعها و ملهاش سوق فى مصر زى الالفا روميو والاودى
-عربية متدوالة بكثرة يعنى الصانيعية اشتغلوا فيها كتير وشافوها كتير وعارفين بيفكوا كل قطعة فيها ازاى ومش هيعكوا ولا يستكشفوا فيها ولا يلعبوا فيها البخت عكس العربيات القلة ال تلاقى الصنايعى يقف يبلم ادامها ومتعرفش تركب ليها انذار ولا سنتر ولا كاسيت لان محدش عارف اولها من اخرها ولا فيوزاتها واسلاكها مشاية ازاى (زى المازدا 3 الجديدة مثلا)
-قطع غيارها متوافرة بكثرة وفى منها استعمال الخارج والتايوانى واخيرا الصينى (مثلا ممكن تجيب فانوس تايوانى او صينى رخيص – مش لازم تجيب الاصلى فى الفوانيس مش قضية)
-اسعار قطع غيارها متوسطة يعنى مش غالية اوى زى العربيات الاوربية (الفيكترا والاوكتافيا) ولا رخيصة زى الكورى (الهونداى والدايو)
-تعتبر السيارة الاكثر مبيعا فى العالم العربى
-ضمان 3 سنوات او 100 الف كيلو ايهما اقرب


عيوبها:
-الاوتوماتيك بتاعها مش بيجمع بسرعة علشان توصل لسرعة 150 مثلا يدينى ويديك طولة العمر (الاوتوماتيك مريح جدا فى الزحمة وخصوصا وقفة كوبرى 6 اكتوبر - بس لعنة وسئ جدا على طرق السفر السريعة) لو بتسافر كتير هات مانيوال احسن –انما لو بتتزنق فوق كوبرى 6 اكتوبر او بتمشى فى شوارع زحمة وما اكثرها فى مصر خليك فى الاوتوماتيك وريح رجلك الشمال من دوسة الدبرياج ال تجيب دوالى
-اخر سرعة ليها 160 كم فى الاتوماتيك ولو جبت اخر الدواسة بتنزل للترس التالت وتلاقى صوت الموتور علَى جدا و عملك فضيحة على الطريق
-بسبب علوها عن الارض (ميزة وعيب فى نفس الوقت) تخليها ساعات تعوَم من الخلف لو دخلت على ملف بسرعة و كان فى كات ايز فى الارض (خلى بالك من منازل ومطالع الانفاق مثل الازهر وصلاح سالم وغيره)
-وبسبب العلو ايضا بيقولوا انها ممكن تتقلب على السرعات العالية (الحمد لله لم اجرب هذا واكيد مفيش حد عايز يجرب – ربنا يكفينا ويكفيكم شر الطريق)
-كل العربيات الكورولا فى مصر XLI يعنى مفيهاش عداد RPM والموديل GLI هو الوحيد ال فيه RPM ومش موجود فى مصر بينزل لدول الخليج فقط علشان 1800cc واحنا يدوبك لسه شايفين ال 1600 بالعافية
-صوت الموتور عالى مقارنة بباقى السيارات (يمكن علشان مفيش RPM قالوا نسمعك صوت الموتور احسن)
-الابواب ناشفة - لازم تشد و ترزع الباب جامد علشان يقفل وخصوصا لو الزجاج مقفول (يمكن وضعوا جوانات وكاوتش ابواب جامد لتوفير عزل صوت وهواء وهدوء اكثر داخل الصالون)
-صوت الزنان (صفارة التنيبه داخل التابلوه) مزعج جدا لو عديت سرعة 120 كم يحسسك انك فى العد التنازلى لاخر لحظات حياتك ويخليك تنزل عن سرعة 120 كم غصب عنك علشان تسكته (ممكن ناس تشوفها ميزة امان)
-وضع الكاسيت فى التابلوه صعب جدا - علشان تفك او تغير الكاسيت شغلانة صعبة جدا ولازم تفور وتفك حاجات كتير اوى علشان تفك الكاسيت
-فيها مشكلة كبيرة من وجهة نظرى- المفتاح لا يخرج من الكونتاكت الا على وضع P فقط (زيها زى BMW) و هذا الوضع بيكلبش السيارة ولا تتحرك يعنى مش هتعرف تركن صف تانى وتقفل على حد عكس كل العربيات انك ممكن تخرج المفتاح وتسبها على وضع الموورN وبالتالى يمكن دفعها للامام والخلف بسهولة – يعنى ولو ركنت صف تانى وقفلت على عربية واتاخرت شوية تلاقى صاحب العربية ال قفلت عليه جاب ناس وعاملين يشدوا ويزقوا ويرفعوا فى عربيتك ويكسرولك الاكصدام و برضة عربيتك مش بتتحرك - ناس بتشوف ده ميزة امان بس لاسف مش فى مصر - انتم اكيد عارفين الركن هنا فى مصر صعب ازاى وما اكثر الصف التانى والتالت كمان
-تيل الفرامل بيتاكل بسرعة فى الاوتوماتيك بلاضافة الى ضعف معدل الفرملة عن المانيوال لان الفرامل بتكبلش العربية والموتور معها ايضا
-الصاج بتاعها خفيف وضعيف اوى (ورق يعنى) – وخصوصا الرفرف الامامى – لو واحد سند عليه جامد بيطبق بسهولة جدا ويبقى شكله وحش ومش بيرجع لوضعه بالسمكرة على البارد – تلاقيه شكله معضعض
-لعشاق الموسيقى - الكاسيت الاصلى صوته مش حلو اوى تلاقى Bass عالى اوى بس مفيش Treble خالص ولا يشغل اسطوانات MP3 – يقال ان الموديلات الجديدة تشغل MP3 ولم اتاكد من الخبر
-علو مؤخرة السيارة مع البومبيهات الخارجية ووجود مساند رأس فى الكنبة الخلفية يجعلك لاترى بوضوح وانت ترجع الى الخلف
-يمكن تغيير قراءة عداد الكيلو متر عكس السيارات الاوربية – شفت عربيات كتير لعبين فى العداد و مخليين القراءة 18 الف كيلو مع ان حالة العربية شقيانة وعاملة 100 الف كيلو على الاقل علشان كده قراءة العداد مش هى المقياس ال تحكم بيه على العربية
-سعر السيارة الزيرو يعتبر غالى ومبالغ فيه مقارنة بفئتها وامكنياتها (تيويتا ايجبت الوكيل هى ال بتحدد السعر لانها هى الوحيدة ال بتدخل الكورولا مصر – عكس الانسر فى ناس كتير بتستوردها وتدخلها مصر مع نفسها علشان كده سعرها مش غالى اوى)
-زحمة الصيانة فى التوكيل (العباسية وابو رواش) – لازم تاخد ميعاد قبلها بشهر – زى ماتكون هتعمل الصيانة فى اليابان – علشان تيويتا ايجبت هى المحتكرة كل حاجة

شكرا علي تقييمك.





_________________
محمد عبدالله