الموضوع: بخصوص درجة لزوجة زيت المحرك 50w30 !!

الالتزام بالكتالوج هو سر العمر الطويل للعربية.. وأي شيء مخالف للكتالوج هو أحد مسامير نعش العربية.

ده مبدأ رئيسي ما ينفعش نخالفه.. ﻹننا مش إحنا اللي صممنا العربية ولا نعرف الأنسب ليها بدون شك..

بالنسبة للزوجة الزيت.. فهي فعلا المفروض تكون 5W-30.. والمكتوب في الكتالوج ده غلطة مطبعية .. وتقدر تتأكد لو عندك نسخة تانية الإنجليزي.


أما بالنسبة للزيوت المناسبة بالدرجة دي (API SG). فأي زيت في السوق بلزوجة 5W-30 هيكون مناسب جدا..

وأنا شخصيا أرشح لك زيت موبيل1 -X1


أما بالنسبة لموضوع استخدام الزيت المعدني.. فدي واحدة من ضمن المفاهيم المغلوطة اللي ماشية في السوق للأسف

الموضوع ده فيه تفاصيل أكتر..

http://www.nilemotors.net/Nile/477071-100.html


...

المشاركة الأصلية كتبت بواسطة أحمد الشرباصي

انا ممنون جدا لاهتمامك

بس انا لما سالت حضرتك عن موضوع زيت ال ١٠٠٠٠ كان سببه أنى بقيت بمشي ال ١٠٠٠٠ فى ٣ شهور والموضوع بالنسبالي اقتصادي

فببساطة ايه رأيك أغير ل ١٠٠٠٠ ولا افضل زي ما انا ؟

غير للزيت التخليقي وإن شاء الله مفيش مشاكل..

أقصى شيء ممكن يحصل مع حضرتك إن الزيت ينقص بمعدل كبير شوية.. يعني حوالي 1 لتر كل 5000 كم تقريبا...

وحل المسألة دي إنك تشتري 1 لتر زيت من نفس نوع الزيت اللي حطيته في الموتور وتزود منه..

ده أول حل..

والحل التاني إنك تزود اللزوجة شوية وتبقى 10W-30..

والحل التالت .. إنك تدور على زيت بلزوجة 5W-30 بس يكون مخصص للعربيات اللي ماشية مسافات طويلة.. عادة بيبقى مكتوب عليها جملة (Long Life) من ضمن الاسم التجاري بتاعها..

للأسف الزيوت دي مش موجودة في مصر غير نوع واحد من موبيل 1.. وللأسف ما ينفعش مع عربيتك لإن لزوجته 5W-50

وطمنا عملت إيه.


...

المشاركة الأصلية كتبت بواسطة tameem2010

لا منصحكش تحط زيت 10000 بعد ما كانت العربية بتمشي بزيت 5000
ده تخليقي وده معدني
طالما حطيت فيها معدني يبقى منصحكش تكمل بتخليقي
لان المعدني بيرسب على الشنبر وبيكون لسه موجود
مش زي التخليقي خالص
خاصة ان لزوجة المعدني اكبر من لزوجة التخليقي وبالتالى لما ينزل المعدني كله هتلاقي فيه خلوص بين الشنبر والشميرز قد يكون زيادة عن الطبيعي مليمتر او اقل كمان بس ده هيسبب ان الزيت التخليقي يبخر ويقل منك قبل 10000
والله اعلم

يا فندم لو الخلوص وصل لفرق 1 مليمتر زي ما حضرتك بتقول يبقى يترمي أحسن .. وحتى العمرة الكاملة مش هتنفع معاه.

الكلام بتاع المعدني والتخليقي ده لا أصل له من الصحة بتاتا.. وأصل الأسطورة اللي بتقول الزيوت التخليقية ما تنفعش مع المواتير القديمة ماكانتش مدخلة خلوص المواتير في حسبتها نهائي..

المسألة اقتصادية أولا وأخيرا.

والحالة الوحيدة اللي تخلينا نروح على زيت تقيل شوية (مش شرط معدني أو تخليقي) هي إن الزيت يكون بينقص بمعدل كبير

فقط لا غير..

وللعلم...

لزوجة الزيت مالهاش دعوة بكون الزيت معدني أو تخليقي..

فيه زيوت معدنية بلزوجة 5w-30
وفيه زيوت تخليقية بلزوجة 20w-60... أيوة.. 60 مش 50

فرجاء حار من الجميع عدم إبداء الرأي بدون سابق علم.

والخبرة في الموضوع ده بالذات لا قيمة لها... ﻹن خبرات المصريين في الموضوع ده مبنية على فهلوة بدون أي مرجع... للأسف.


...