الموضوع: تقرير عن شيري انفي 2017 واول انطباع عنها . . .

في البداية انا كنت راكب كيا سيراتو لمده 3 سنين هنا في مصر وقبلها كنت عايش في الخليج وكان مع الوالد مرسيدس زلموكه, وقبلها كابريس كلاسيك بوكس وبيسموها هناك الصابونه وختمنا قبل ما ننزل بالشيفروليه ابيكا 2007 . . .
نويت علي الانفي خصوصا اني ناوي عليها كاستثمار وناوي اشتغل عليها في اوبر ان شاء الله تعالي . . .
المميزات بالنسبه ليا كانت ان العربيه تبع غبور, وغبور لما بيمسك عربيه ويجمعها محلي بتنتشر بغباء وسعرها بيغلي في السوق بغض النظر عن جوده العربيه كتجميع محلي, وده شوفته شخصيا في الفيرنا, ومؤخرا في الام جراند, اللي ماليين الشوارع, وده شئ ولو انه متأخر شويه ولكنه بيفتح مجالات شغل لناس كتير, وبيدينا ولو شويه فهم عن المركبات دي مش مجرد بنستورد ونجيب المستورد يفهمنا المنتج ونفتح توكيل وخلاص. . .
ايضا المميزات ان العربيه 1500 سي سي
- العربيه عاليه عن الارض بارتفاع ملحوظ
-العربيه واسعه من جوا
-كمبيوتر الرحلات
-التانك 50 لتر
-العربيه غرقانه كماليات بقا من سينسور بارك لمرايات كهربا لفوانيس كهربا لفوج لايت وحاجات دلع كتير تغري عين المشتري في ظل ارتفاع اسعار السيارات الكوري والياباني

دي كانت المميزات قبل الشراء, العيوب بقا
-ان العربيه مش منتشره في السوق ويا ترا هلبس ولا هتطلع كويسه
-اني سوقت كتير ونازل اقربهم من كوري ف كنت متخوف شويه
-الموتور صغير عليا, انا اتعودت علي المواتير الكبيره بحكم ظروف معيشتي ف الخليج, ف كنت برضو متخوف

ولكن باستخاره ربنا وفقني الله واشتريتها كاش من سمير ريان

نبدا بقا التقرير علي خيره الله, , ,

جسم العربيه الخارجي :
موضوع الجسم الخارجي والشكل بيبقا نسبه وتناسب واراء واذواق, فالمجمل انا شكل العربيه عاجبني من قدام مع بعض التحفظ علي الشكل من الخلف, , ,
-العربيه عاليه عن الارض حتي لو محمل full capacity


الماتور والفتيس :
انا لسا في التليين طبعا ف مقرصتش علي الموتور. ولكن من اول انطباع ان الموتور قوي وتقدر تحمل عليه وانت متطمن
-الفتيس مانويال 5 سرعات طبيعي خالص, حاجه مكنتش متعود عليها وعجبتني وهي ان مدى الغيار قصير جدا, يعني من المور للاول ومن الاول للتاني ومن التاني للتالت وهكذا المشوار اللي بتاخده عصايه الفتيس قصير. ودي ممكن متعجبش ناس كتير بس دخلت دماغي وعجبتني


المقصوره الداخليه :
ودي من اكبر مميزات العربيه, من حيث انها واسعه جدا من جوه حتي اوسع من الكيا سيراتو اللي كانت معايا (2008 الشكل القديم)
-الطابلوه مصروف عليه كديزاين وان كان الماتيريال مش قوي
-شكل العدادات حلو, وفي موديل 2017 خلوها ابيض في ازرق وان كنت افضل انها فضلت احمر زي الموديلات اللي قبل كده
-كميه اماكن تخزين غير عاديه, مش اقل من 5 او 6 اماكن للتخزين ودي حاجه حلوه جدا
-للاسف العربيه نازله بسماعتين بس قدام ولكن في مكان لسماعتين ورا, ولكن كمجمل صوت الكاسيت حلو ونقي
-الدريكسيون خامته سيئه جدا جدا جدا جدا
-الكلاكس مشوار طويل او تحسه في لاج ثانيتين كده
-الكراسي عاليه عن ارضيه العربيه ودي حاجه انا بكرهها جدا, خصوصا ان اغلب العربيات الجديده بتبقا مرمي تحت كده, انما ف الانفي 2017 انت فوق, قريب جدا من السقف وشايف الكبوت كله ودي حاجه انا مبحبهاش, بحب اكون تحت وتتم عمليه القياده بطريقه تقديريه مني ولكن هنتعود

-الشنطه واسعه وجميله


وده كان اول انطباع عن العربيه لما استلمتها وروحت بيها البيت, واعذروني لو كنت نسيت حاجه انا اول مره اعمل تقرير, ولو في اي استفسار انا في الخدمه

الف مبــروك
ربنا يباركلك فيها ..