فيزو البطارية عمال يتحرق يا جدعان

**New Soft** · 24-07-2016 11:45 AM

صباح الخير با شباب
أنا خلاص عقلي راح مني أنا هتجنن أو أموت قريبا من مشاكل العربية دي

أحكي لكم بقي إلي حصل

أنا مروح يوم الخميس من المعادي علي المنوفية والعربية بنت التييييييييييييييييت بعد ما نزلت من الدائري جابت electronic fault المهم كلمت الكهربائي قال لي ده ممكن فيشة ال Gear Box وطبعا مطلعتش هيا قال يمكن فيوز البطارية عملت له كبري وبرضو مدورتش جبت ونش ورجعت بيها علي صقر طلع فيوز البطارية وقالوا دي طرمبة البنزين كمان فاصلة هنعمل لها قفلة مع الكوناكت المهم العربية دارت ورجعت بيها علي الشقة في المعادي أبيت والصبح أسافر تخيلوا كده أيه إلي حصل يدوب عديت دايري المعادي وراحت جايبة Check injection طبعا طرمبة البنزين فاصلة عملت لها وصلة من البطارية للبناية الموجب في الكويل الأول من جنب البطارية ودورت دارت رجعت بيها علي الصنايعي صلينا الجمعة وبص عليها قال لي ده فيوز الطرمبة إتحرق غيرناه دور دارت حلو كده لا مش حلو أول ما حركتها بطلت بيبص قال لي مفيش كهرباء رايحة المباين فوق البوجيهات وعمل توصيلة كده من علبة الفيوزات وطبق الأصل الحركة إلي فاتت أول ما حركتها قطعت خالص وقال لي كده لازم تغير علبة الفيوزات بيسموها UPC معرفش ليه بكام يا عم قال لي ب 1000 جنية قولت غير طيب غيرها ودور دارت ولف بيها لفه كده وتمام روحت البلد وخرجت بيها مشوار 20 كيلوا كده امس السبت وأنا راجع هب لقت أيه electronic fault فطبعا أول حاجة جت في دماغي الفيوز بتاع البطارية وطلع هوه جيت أعمل عليه كبري لقيت شرز ده معناه فيه قفله كلمته قال لي شوف ال4 أطراف بتوع حساس الشكمان رحت فاصله خالص وبجرب مشرزتش وصلت الحساس وجربت مشرزتش المهم دور المارش شغال بس برضو طبعا Check injection طبعا طرمبة البنزين فاصلة عملت لها وصلة من البطارية شرزت جامد جدا فصلت فيشة الطرمبة برضو بتشرز والفيوز سليم

يا جماعة اعمل أيه أنا خلاص زهقت وإتخنقت

**aymanshebl** · 24-07-2016 02:53 PM

هو انت عامل شغل على الضفيرة ممكن تخلى كهربائى كويس يشيك على الضفيرة اللى رايحة لطرمبة البنزين و كهربا البوجيهات لازم تعرف القفلة منين الاول علبة الفيوزات القديمة كانت سليمة

**New Soft** · 24-07-2016 04:42 PM

انا بالفعل هشيك بنفسي علي الضفيرة بس انا كنت عايز اعرف كده أي جزء أبص عليه الأول وياتري السلك ده ماشي فين في جسم العربية علشان أقدر أتتبعه بشكل سليم

أرجوا الإفادة أنا غالبا مش هستعين بصنايعي غير لو الأمر وصل معي إلي طريق مسدود لأنو زي ما حضراتكم عارفين كمية النصب إلي بقت في دمهم انا بصراحة معنديش ثقة فيهم انا عندي كل الأدواد المطلوبة عدا برنامج الرينو كليب لو حد يعرف إذاي ممكن أشغله علي اللاب والوصلة يبقي أكثر الله من خيره لو يدلني عليه ويقول لي أجيب الوصلة منين وبكام لو امكن وكان سعرها مناسب هجيبها

**New Soft** · 26-07-2016 09:47 PM

أيه يا شباب محدش عنده خلفية عن الموضوع بتاع الكهرباء ده ولا أيه؟

**nodey** · 27-07-2016 12:24 AM

الرينو حساسه جدا مش اي حد يشتغل فيها وديه لحد بيفهم كويس في الرينو وبعد عن الصنايعيه اللي بيعكوا

**New Soft** · 28-07-2016 02:42 PM

والله يا هندسة انا كنت بوديها لبتوع رينو بس لكن أنا حسيت إن الحوار ده فيه نصباية كبيرة أكبر من حساسية الميجان علشان كده انا قررت أشتغل فيها بنفسي بدون حوجة ليهم عموما انا هفيدكم بالخطوات وإلي وصلت له في المحاولة دي

**رامي مصطفى** · 28-07-2016 03:02 PM

ربنا يعينك ويوفقك
معلش استحمل هم العربيه وهم الصنايعيه

**eng. wesam** · 28-07-2016 11:17 PM

انا عن نفسي منصحش ان حضرتك تشتغل بايدك الا لو كنت مهندس كهرباء نظرا لحساسيه العربيه طبعا انا عارف قرف الصنايعيه اللي لايعرف يقيس صح ولا يحدد صح ولا حتي يمسك افو ولا ويرنج دايجرام ولا كتالوج هي بس مجرد ارزاق ماهو ربك مش هيسيبهم يموتوا من الجوع

الفيوزات دي قبل ماتتعامل مع المشكله لازم تفهمها الفيوزات عباره عن عنصر موصل للتيار يظل موصلا للتيار طالما التيار المار به اقل من القيمه المقننه المكتوبه علي الفيوز
مثال فيوز 10 امبير هيفضل موصل من 1 الي 9 مثلا عند مرور قيمه اعلي من 10 امبير هينصهر الفيوز لحمايه الضفيره لانه لو مفصلش عزل السلك نفسه من السخونه هينهار والعربيه لا قدر الله .......
لو نويت خلاص تشتغل بايدك لازم تعرف فيوزات ايه بالضبط اللي بتقطع والوايرنج دايجرام والوظيفه هتلاقيهم علي علبه الفيوزات هبسطهالك
مثال للتوضيح مش اكتر
مثلا طلمبه وقود تعمل بفرق جهد 12 فولت وشده تيار 6 امبير مؤمنه بفيوز 10 امبير عند احتراق الفيوز ده ملهوش الا احتمالين مفيش 3
1- الطلمبه تلفت فسحبت تيار اعلي من 10 امبير فانصهر الفيوز لحمايه الضفيره من الاحتراق او اشتعال الطلمبه نفسها
2- ممكن برضه لو سلك منهار عزله (عريان) لو سلك موجب ولامس في الارضي او في جسم السياره هيعمل كده

المشكله دي حصلت عندي وعلي فكره فكيت فرش الارضيه كلها وفي الاخر لقيت سلكين سايحين علي بعض قطعتهم وقشرت سلك جديد ووصلت واشتغلت تمام
في النهايه اسف للاطاله وتابعنا حتي يستفيد الجميع لك الشكر

**New Soft** · 31-07-2016 03:15 PM

بالنسبة للمعرفة بالكهرباء فأنا دارس دوائر كهربية بحكم داراستي وعملي وأفهم جيدا كل ما تفضلت حضرتك وشرحته

إليكم باقي التجربة

أنا شغلت العربية عملت كوبري علي فيوز البطارية ودورت لقيت طرمبة البنزين مش شغالة فجربت أديها كهرباء من البطارية لقيتها تمام شغالة الحمد لله فعملت التوصيلة إلي الكهربائي كان عملها قبل تغيير علبة ال UPC علشان يشغل الطرمبة مع الكونتاك بتاع العربية وتمام خرجت مشوار صغير يدوب 10 كيلو كده وأنا مروح بطلت الطرمبة فصلت فقولت يمكن التوصيلة فكت بصيت لقيتها سليمة إديتها كهرباء من البطارية ودورتها وروحت ببص علي الفيوزات لقيت في فيوز عطلان فأنا أصريت أعرف السلك إلي فصل تبع أيه طلع بتاع اللمبات بتاعة عصاية الفتيس لحد كده تمام غيرت الفيوز وتمام كده بدور دارت وخرجت مفيش نص كيلو وراحت فاصلة تاني ببص طلع المباين مفيهاش كهرباء طبعا زي ما إحنا عارفين إن في طرف فيه كهرباء وطرف الكهرباء بتتقطع معاه من خلال حساس الكرنك وصلت الطرف إلي فيه كهرباء وكان قاطع من البطارية ودورت دارت ركنتها وفصلت السلك وقولت بكره أدرورها وأروح أشوف أيه إلي حصل دورتها اليوم بقي ورايح مفيش 9 كيلو ولقت العربية بطلت ودخان طالع من الكبود بشوف فيه أيه لقت الكويل إلي جنب قاعدة الموتور العلوية(جنب الفتحة بتاعة الزيت أو أول كويل علي يدك الشمال) سايح والتوصيلة إلي كنت واخدها من البطارية إتحرقت وبكده العربية قاطعة خالص أخذتها علي التوكيل في طريق الباجور شبين قالوا لي لا دي لازم تروح أبو رواش هنا معندناش الإمكانيات إلي تمكنا من تشغيلها ده غير إنو الكمبيوتر بتاعها مقرأش علي ال Renault Clip لأنو غالبا علبة ال UPC إتحرقت أهم ما في الأمر إن كل التوصيلات إلي بقول لكم عليها دي كانت تحت إشراف محمد الشيخ ورامي إلي في صقر قريش
أنا قررت بكل الأسي إنو لازم تروح التوكيل حد يقدر يفيدنا لأنهم غالبا هغيروا الضفيرة وعلبة ال UPC وفي كلام إنو الكونترول بتاع الدوارة كمان