عذراَ للتدخل بعد الباشمهندس وسيم ماشرحلك ازاى تكشف على الموتور .
أن حاقولك على حاجات بتشوفها الأول فى الموتور وبتحدد إذا كنت حتاخده ولا لأ - يعنى كشف نظرى مبدئى :
- لو لقيت الموتور نضيف قوى كأنه مغسول بالبنزين مثلا ولا الجاز يبقى شكراً.
- لو لقيت الموتور كله جلخ وسواد وملزق يبقى مخلوع من عربية مصرى وشكراً برضه لأن الموتور الاستيراد حتلاقيه عليه زى تراب ابيض او بنى يعنى أملاح .
- افتح مقاس الزيت وغطا تعبئة الزيت وشمهم لو شميت ريحة زيت محروق يبقى شكراً
- شوف لون الزيت لو لقيته جديد ونضيف قوى يبقى شكراً لأن التاجر غيره ولو لقيته اسود خالص يبقى برضه شكراً - الزيت لازم تلاقيه درجه من درجات البنى بس مش غامق قوى.
- حتلاقى فى الموتور كذا كوعه للميه بتوع الطلمبة والترموستات واللى رايح او راجع من الرادياتير - ممكن تلاقى الكوعات دى عليها حته خرطوم ومش باينه اخلع الخرطوم وشوف الكوعات دى كلها سليمه ولا منقرة ومتاكله او معموله بلحام عالبارد اللى هو انبوبتين ديفيكون لأنهم ممكن يدوخوك .
- لفف الموتور بالإيد وشوفه بيلف ولا قافش وهل بيلف زى الملبن يبقى شكرا ولو بيلف كويس فى حته وتقيل فى حته يبقى ماشى الحال.
- تشوف الركب بتاعة قواعد الموتور سليمة ولا فيها ودنه مقطومة لأنها أحلى حاجه بتتقطم من الشيل والحط عند التجار.
- يكون الموتور كل حاجته عليه من طلمبات ولا مارش ولا دينامو ومايقولكش استنى حاركبلك مارش ولا دينامو - كمان كل ضفيرته عليه ومساميره تراجع عليها بالمسمار.
ده الكشف الظاهرى ولا يغنى عن وجود ميكانيكى ثقة معاك والحاجات اللى قالك عليها المهندس وسيم
المفضلات