الفيصل فى الموضوع ده هو اختبار الكبس للموتور بس للاسف اللى بيعرف يستخدم مقاس الكبس قليل قوى ويكاد يكون نادر الوجود فلازم تدور على حد يكون عنده مقاس او عداد قياس الكبس داخل الموتور وعموما حاقولك ازاى تعمل اختبار الكبس فى الحالة دى :
١- يتم فصل فيوز طلمبة البنزين والفيشة المغذية للبوبينات .
٢- البوجيهات تتفك .
٣- يتركب العداد بتاع مقاس الكبس مكان البوجية الاول مثلا وحد يقف على العداد وحد تانى يروح يدور العربية ٥ لفات مارش بالعدد وهو دايس بنزين للاخر حتاخد القراية بتاعة العداد النهائية.
٤- حاتفك العداد بتاع مقاس الكبس وتحط فى نفس الاسطوانة شوية زيت بالمزيتة حوال ٣ أو ٤ كبسات زيت وتركب العداد تانى فى نفس الاسطوانة اللى قيستها فى الاول وحد تانى يدور وهو دايس بنزين للأخر ٥ لفات مارش وتاخد قراية العداد لو زادت كتير عن الأول يبقى الشنابر مفوتة ولو مازادتش يبقى الشنابر سليمة - وهكذا مع باقى الاسطوانات كل واحدة حانعمل فيها نفس اللى اتعمل فى الاولانية.
والاختبار ده لازم تكون البطارية بتاعتك حالتها كويسة مش ضعيفة لو البطارية تعبانة تعمل الاختبار ببطارية تانية كويسة علشان تستحمل الاختبار للاخر والقرايات تكون مظبوطة.
المفضلات