الموضوع: عايزني امضي على القائمة المنقولات قبل مالحاجه تيجي

المشاركة الأصلية كتبت بواسطة hilal

سوف اتكلم من الناحية الشرعية
اولا : الزوجة غير ملزمة شرعا بشراء منقولات بيت الزوجية وهي مسئولية الزوج
ثانيا : الزوج ملزم شرعا بدفع مهر للزوجة

إذا كان أهل الزوجة يساهمون في شراء المنقولات فهذا من باب تيسير الزواج ، وتفضلا منهم ويستحقون الشكر لما يقومون به

وإذا كانت الزوجة تتنازل عن مهرها تيسيرا على الزوج ، فهذا تفضلا منها تستحق الشكر عليه أيضا.

كيف ترفض ان توقع على قائمة منقولات تضمن بعض حقوق الزوجة التي قدمتها عن طيب خاطر؟

هي ليست ملزمة شرعا بتأثيث بيت الزوجية ، وانت ملزم شرعا بأداء المهر المتفق عليه

تبقى نقطة مهمة ، هي حسن اختيار الزوجة
إن أسأت الاختيار من البداية فلا تلومن إلا نفسك ، لأن المشاكل لن تتوقف عند قائمة المنقولات فقط
بل ان قائمة المشاكل لن تنتهي

مع احترامي لرأيك لكني اختلف معاك في معظم كلامك..

لو هنتكلم من منطلق ان الزوج هو المطالب شرعا بتأسيس بيت الزوجيه وان اهل الزوجه بيساعدوا تفضلا وتيسيرا عل الزوج يبقي المنطق يقول انه يمضي بس علي المنقولات اللي هم هيشتروها مش علي كل شيء ...

اما بخصوص حسن الاختيار. فمفيش واحد بيتعمد يسيء الاختيار انما اوقات كتير التصنع واخفاء الحقيقه والتجمل بيخدع وبيصور للواحد انه هيتجوز ملاك من السما وبعد الجواز بيكتشف الوش الاصلي اللي بيظهر بسرعه في بعض الاحيان واوقات بتبقي العروسه تقيله وعايزه تحكم التدبيسه فبتستني لحد ما يحصل حمل وبعدين تطلع اللي جواها وبتكون من ضمن اسلحتها القايمه اللي ممكن بيها تحبسك والعيل اللي هيتبهدل لو اتربي بعيد عنك ...

اخيرا. الناس برغم تحفظها علي القايمه وانا منهم. الا انهم قالوا انه لو هيمضي علي قايمه يمضي انما علي الحاجه اللي جت فعلا وشافها وراحت بيته لكن ما يمضيش علي حاجه ما جاتش وممكن ما تجيش...

اما بخصوص سؤال حضرتك ازاي ترفض ان توقع على قائمة منقولات تضمن بعض حقوق الزوجة التي قدمتها عن طيب خاطر؟ اقول لحضرتك اولا انه ما رفضش لكنه عايز يمضي بعد ما يشوف الحاجه وده حقه.. ثانيا القايمه ما بتضمنش بعض حقوق الزوجه اللي قدمتها (اللي هي مساهمتها في المنقولات) ده بتضمن كل حقوق الزوجه اللي قدمتها واللي ما قدمتهاش ومع كده هو مش ممانع ولا جاب سيرة انه رافض ...

علي فكره. كتير من ولاد الاصول لما بييجوا يمضوا العريس علي القايمه بيبقوا محرجين انهم بيطلبوا ده ولكن بيبقوا مضطرين لاسباب زي العرف وشكليات العيله الخ ..فلما حد يطلب يمضيني علي قايمة منقولات لسه ما اشترهاش والله اعلم هيشتريها ولا لأ . ده يبقي شخص بجح وانا شخصيا ارفض اناسبه حتي لو بنته نازله من السما بجناحات...

المشاركة الأصلية كتبت بواسطة ahmedabohgr

حيرتووني! ! !

انا مش شايف حيره خصوصا ان 95 % من الردود كانت بتقول ما تمضيش علي حاجه ما شفتهاش بعينك ودخلت بيتك...

انا هكرر رد الزملاء تاني وفي الاخر القرار قرارك وانت اللي هتتحمل مسئوليته.. قائمة المنقولات بتحبس في حالة انك ما ردتش كل مسمار مكتوب فيها بمجرد ما يطلبوها ومن حقهم يطالبوك بيها بعد ما تمضي عليها ب 5 دقايق ولو المواصفه اختلفت يعتبر تبديد . بمعني لو كتبوا غرفة نوم مكونه من سرير ودولاب وتسريحه وكمود من الخشب الزان وهي خشب ابيض وطالبوك بيها بعد كده ما ينفعش تقول للقاضي هي ده الغرفه اللي جابوها وقيس علي كده كل حاجه تانيه...

والله العظيم انا ليا واحد صاحبي مراته واهلها خدوا العفش ورفعوا عليه قضية تبديد وبرغم انه قال للقاضي ان العفش عندهم في العنوان الفلاني وطلب من القاضي يطلع معاه حد من القسم يعاين ويثبت صحة كلامه الا ان القاضي حكم عليه بسنه حبس والولد لما سمع الحكم جاتله سكته قلبيه ومات... الله يرحمه ويجازي اللي اتسبب في موته

المشاركة الأصلية كتبت بواسطة hany121

والله العظيم انا ليا واحد صاحبي مراته واهلها خدوا العفش ورفعوا عليه قضية تبديد وبرغم انه قال للقاضي ان العفش عندهم في العنوان الفلاني وطلب من القاضي يطلع معاه حد من القسم يعاين ويثبت صحة كلامه الا ان القاضي حكم عليه بسنه حبس والولد لما سمع الحكم جاتله سكته قلبيه ومات... الله يرحمه ويجازي اللي اتسبب في موته

ربنا ينتقم منهم
تباً للزواج لو بالشكل ده