الموضوع: مساعدة في الاختيار

اللادا افضلهم علشان الريجاتا والـ ١٣١ خلاص عجزوا قوى ومش بتقدر تلاقى حاجتهم بسهولة سواء جديد أو إستعمال - اللادا قطع غيار باالهبل جديد واستعمال ولكن اكشف عليها مظبوط من كافة شئ.

المشاركة الأصلية كتبت بواسطة hamad1409

جزاك الله كل خير يا هندسة
في ناس بتخوفني من السفر لكن انا بنشوفها دايما ع الطريق موجودة

وهل رنج السعر ده كويس
وايه هي الحجات اللى لازم ناخد بالي منها

وجزيل الشكر لحضرتك على اهتمامك

العفو الله يكرمك ويوفقك فى حاجه كويسة
اللادا عربيات أثبتت كفاءة فى مصر من زمان ومنتشرة وقطع غيارها موجودة واللى بيصلحوها كتير فلو حضرتك طلباتك من العربية انها تستحمل البهدلة والسفر فهى إختيار موفق ولكن حسن الاختيار هو العامل المهم فى شراء اى عربية بمعنى الكشف الكويس من كافة شئ - حالة الموتور - البودى والبارومة والصدا - الأبواب بتفتح كويس وتقفل كويس ولا لأ - الكبوت والشنطة مقفولين كويس ومطبعين عالعربية ولا مفارقين من ناحية وناحية - الفرامل والسيرفو كويسين - العفشة وحط تحتها هى والفرامل ١٠ خطوط يعنى لازم يتكشف عليهم مظبوط - عمود الكردان مافيهوش صوت ومش معووج - الفتيس مش بيعض فى النقلات - الدبرياج - علبة الفيوزات تكون سليمة ومش فرح العمده كلها توصيلات واسلاك والغطا بتاعها سليم لأنها غالية - الجاكمان مايكونش كله لحامات ومفكك من بعضه - الكاوتش والبطارية حالتهم ايه - الموتور مش بينفخ من المقاس ولا من غطا التاكيهات - ماتشمش ريحة بنزين وانت ماشى - العربية لما تبصلها من قدام او من ورا تكون واقفة على حيلها مش واقعه ولا ناحية وناحية وتلمحها من الجنب ناحية الابواب من بعيد علشان يبان لو فيها شغل سمكرة ومطبقه خفيف - الفخد قدام وورا مايكونش فيها جونط لحام وعك بالمعجون وشيل فرش الشنطة وشوف ايه الحالة خصوصا ان فيه زى علبتين بطول الشنطة مايكونش فيهم لحام ولا عوجه أو تطبيقة - الكورونة مايكونش فيها صوت ونة علشان ساعات بيحشوها نشارة خشب علشان تقلل الصوت - حالة الفرش والكراسى والكنب ومكن الزجاج - الأنوار شغالة من كله واشارات ومارشدير وستوب فرامل وفلاشر .
وفى النهاية ربنا يوفقك فى حاجه كويسة ويباركلك فيها
وبالنسبة للأسعار معنديش فكرة بصراحة عنها - بس أعتقد لو لقيتها بالمبلغ ده مش حاتكون كويسة وحتلاقى فيها شغل كتير .